السلام عليكم. اسمي عبدالله جيت نحكلكم قصتي لي يمكن تنفع الكثيرين. أنا من عائلة متوسطة الحال، وكيما كيقولوا معندناش ومخصناش، قريت ومكنتشي من المجتهدين، والدليل أنني عاودت الباكالوريا ثلاث مرات ومنجحتش وهادشي مع الباكالوريا القديمة ماشي بحال دليوما، هادي دليوما رجعت بحال شهادة د بتدائي ديك الوقت. المهم نكملكم ملي سقطت في الباك الوليد كان ساخط عليا وديما كيشوف فيا شوفة ناقصة حيث فقصتوا ومخليتوش يفتخر بيا قدام الناس بحال جميع الأصدقاء ديالوا، الوليدة مسكينة هي لي كانت ديما كتشجعني وكتخليني واقف، وفوقاش مكتشوفني حزين كتقولي الخير فيما اختاره الله، كلمات ديالة كينزلوا على قلبي بحال ثلج كنرتاح ليهوم بزاااف . دازت الصيفية ديك العام والوليد نفسوا حارة مبغيش يشفني جالس فزناقي لا شغل لا مشغلة، الوليد كان خدام مع البلدية كسائق لشاحنة الأزبال، الشهرية ديالو متواضعة ولكن معايشانا بخير، دخلت في الليل وجبارتوا جالس هو الوليدة و 2 خوتي بنات كيتعشاو، مكنتش عنتعشا معاهم حيث بديت كنحس براسي عالة عليهم، وانا داخل لغرفتي سمعت الوليد كيعيطلي أيوب : الوليد : أيوب أجي تعشا أنا : مخصنيش الوليد : وخا مخصكشي أجي بغيت نهدر معاك. حنيت راسي ومشيت جلست معاهم، الوليد قطع طرف دالخبز وعملولي فيدي، وقالي : الوليد : شفتي هاد الطرف دالخبز شحال جريت عليه، كنت كنفيق في الرابعة د صباح ونمشي نجمع الزبل، 15 سنة نهار كيشبه خاه، وحتى فرج عليا ربي وشبرت كميون عاد رتحت شويا، ودابا جا الدور ديالك باش تفتش على راسك شكون نتا وشني باغي تكون ؟ دخل يدو نالجيب وعطاني 2000 درهم قالي هاك بني مشروع راسك أنا كنعرفك دكي وقادر بهاد البركة تكون راسك. الوليدة ابتسمت وقالتي خذها أولدي، راك راجل، أنا فديك اللحظة دموع تجمعوا ليا في عيني، ومقدرتش نحبس، عنقت الواليد وقبلتوا والوليدة تا هي منسيتهاش. مشيت نعست فديك الليلة وأنا كنفكر !!!! شني هاد المشروع يمكن نبني بيه مستقبلي، وأنا عارف بلي خصني نبدا بشيحاجة صغيرة.
فقت في الصباح والأحلام سعدتني في اختيار المشروع، قلت نعمل شي بيع وشرا، كان ديك النهار الأحد، فطرت وخرجت مشي عند موول وحد الخزين، شريت من عندو 5 شكاير دالقطني، مخلطين ( لوبيا، عدس، حمص ...) بديت كنجول الأسواق الأسبوعية، الأمر كان صعيب في الأول وخصوصا في التنقل، كان خصني نخلص الفلوس باش نهز ديك شي، ولكن ملي تعرفت على ناس عندهم النقل ديالهم بداو كيعونوني، بديت كنربح مزيان والحمد لله، وأنا مكنش كيهموني فلوس كثر مكيهمني نشوف ولديا فرحانين بيا، كبرت المشروع وفتح لي ربي بيبان الرزق شريت واحد طموبيل، وبديت كنتقل بها في الأسواق. دازت 4 سنين وجدت راسي بأني جمعت فلوس، متسمعوش جمعت فلوس وظنوا بلي ديك شي ساهل، راه برد الشتا وحرارة الصيف كاملة تجمعتلي في الراس، المشروع كبر بزااف خدمت معايا 3 دراري شريت حانوت في المدينة لي أنا عايش فيها وزدت 2 طموبيلات اخرين. ومبقتشي كنخرج أنا للأسواق غير دراري هما لي كيمشيو يبيعو ويرجعوا بليل نتحاسبو، كنت عامل معاهم مزيان وكنتهله فيهم، وحتى هما ظريفين ومن عائلة فقيرة، كنت كنحس بيهم حيت أنا مجرب . مشات أيام وجات أيام، خواتاتي بجوح تزوجوا عملتلم عرس وكانوا فرحانين بزاف حيت مكانوش كيحلموا بعرس بحال ديك شي، مشاو خواتاتي لدارهم ، بقينا غير أنا والوليد والوليدة، جلست معاهم وحد نهار على الغدا، وأنا نقولهم. أنا : الوليد علاش معتملوش شي حجة هاد العام يغفر ربي ليكم بهم الدنوب . الوليد : بصح أولدي عندك الحق. الوليدة : ولكن قبل منمشيو أولدي بغينا نفرحوا بك. أنا : حشمت شويا حيت الوليد جالس معانا، وأنا نقوليها، الوليدة مكهرناش ولكن مكينش معامن ..هههه الوليدة : سير أولدي الله إعطيك شي بنت الناس لي تفرحك وتعيش معاها في سعادة. أنا والوليد : اللهم آمين . الوليدة كان فبالها شي بنت وهي تقولي الوليدة : نقترح عليك أولدي وحد بنت كتعجبني وكنعرف عليها بزاف. أنا : شكون الوليدة الوليدة : بنت خالك سارة لي ساكنين في جبل (البادية)، بنت زوينة وظريفة ومأدبة، ونتا كتعرف أولدي ناس دالبادية محافظين ورجالهم عندم نفس حارة على بناتهم، ماشي بحال بنات المدينة كيقولوا قافزين إلا من رحم ربي . الوليد : بصاح أولدي، نمشيو غدا نعملوا صلة الرحم وفي نفس الوقت شوف ديك البنت وإذا عجباتك نهدروا مع واليديها . جا الغد خرجت طمةبيل ديالي من الgراج ومشينا .
أنا مدة طويلة مامشيت عند خالي، كنت مشغوول، واليديا كيمشيو مرة مرة . وصلنا ستقبلونا بحرارة وباقي موالين مفراسوم والوا، على أساس جينا زيارة وصافي. عملونا وحد الكأس د أتاي وشي أكل بلدي لذيذ عسل وزيت ... وحنا مجتمعين على مائدة وأنا نقولهم ، هاد كاس د أتاي مداقو مزون بزاف، شكون لي عملوا الله اطيه الصحة. جاوبتني مرا د خالي، سارة هي لي عملاتو، أنا حشمت... الوليدة : سارة أحي أبنتي باقين مشفناكشي. مرا د خالي : مدوشي عليها كتحشم . هرجت سارة مالكوزينة، أنا حقيقة انبهرت من ديك الجمال، سمعوا هادي بعض مواصفات ديالا ( ماشي طويلة وماشي قصيرة - وجهها بياض وجنتيها يميلان إلى الإحمرار مع الحشومة ديالا وجهها رجع حمر، عينيها زرق، شعرها زعر وخا مشتفتهوش ههه. المهم بلا نزيد نوصفلكم هي تقول شي ألمانية ولا سويدية هههه. أنا فديك اللحظة نسيت راسي كنشوف حتى كنحس بسخونية أتاي فوق رجلي، هرقتو بلا شعور . الواليدة قرياني مزيان وهي تقول ليهم : سي محمد لالة عايشة حنا جينا قصدينكم والمقصود هو الله، جينا طالبين يد بنتكم سارة لولدي عبدالله والبنت تبارك الله عليها. جاوبت لالة عايشة : حنا موافقين أنا وباباها ومعنجروشي حسن من ولدكم، ولكن كيبقا رأي ديالا هو لي كيحكم. سارة شني قولتي. البنت مسكينة حشومية، مقدرتش تجاوب ناضت بسرعة مشات للغرفة ديالا. الواليدة : كيقولو ( السكوت علامة الرضا ) باسم الله نقراو الفاتحة . داز ديك العام تزوجنا أنا وسارة ومكنتش متخيل بأني غنعيش فهاد السعادة لي وجدتا معاها، واليديا مشاو للحج وحتى واليديها وأنا لي تكلفتلم بكولشي والحمد لله . وأنا كنكتب لكم هاد القصة أسامة ولدي كيقولي عطيني تلفون نلعب و آية كتقول لا أبا أنا لولا، هادوما بجوج ولادي دقول ماشي أنا باهم شبهو لمماهم زُعر وعينم زراق، ولالة سارة كتوجد وحد طاجين من ديك الشي لرفيع ، ونتوما معروضين نالغدا كاملين . والسلام عليكم
ﺍﻟﻨﻬﺎﻳﺔ