اسمي شامة عايشة في قبيلة كاينة في جبل معروف بالاشجار و الوديان لي فيه ،كاين في القمة تاع جبل قصر السلطان كبير و زوين بزاف هاد السلطان كان كريم و سخي ، انا و عائلتي كنا سكنين في كوخ، بابا مريض واحد نهار مشا احطب ضرب رجليه بالمنشار من تم هو مسكين شاد لرض و من تم بدات حياتنا كتبدل ولات ماما هزا المسؤولية كتر و حتا انا وليت كنخرج نجمع العواد و وراق شجرفي لخريف كنجمعو عواد ووراق شجر كنعونو بيهم لخشب نشعلو بيهم المدفئة و نطيبو عليهم، و من نرجع نخرج الماعز ونشطب الزريبة ، اما ختي لي صغر مني كتعاون ماما ، مكناش بغينها تحس بالنقص هيا و بابا من مرض ، نهار لحد مشات ماما تسوق و انا كيف العادة مشيت الغابة نجمع العواد و وراق شجر كان نهار زوين و الجو مشمس بديت نجمع و انا نسمع صوت ديال ضريب لفرادة قلبت مبان ليا والو قلت واقلا كنتخايل رجعت كملت شغلي شوية هي طيح حمامة ميتة على رجلي بديت كنغوت خفت صحابلي غير شي حرب ههه حتى وقف حدايا واحد شاب قاليا مالك يكما طرات ليك شي حاجة واش على قبال لحمامة سمحيلي انا لضربتها بالغلاط ، انا بديت كنغوت واش هادي عادتك مكتعرف فين تنيش نتوما ضربو ومتصوقوش على من غادا طيح هو بقا غير سكات و كيتبسم خلاني و مشا كلس على واحد الصخرا ، انا شفتو قلت الله استر و كملت شغلي هزيت الخنشة و هو اتبعني قاليا اري نهزها راه تقيلة عليك قلت لية انا ولفت ماشي اول مرة الا كنتي باغي تهزها باش نسمحك صافي سمحتك غير حيد من قدامي راه تعطلت، تبسم و قاليا واخة لي بغيتي، انا مفهتش
كيسلي بكري وعوني واحد نهار قاليا عودي ليا كفاش عايشة و معامن... ،عودت ليه تأتر بزاف و من سولتو حسيت بهدراتو ناقصة قلت معا راسي وقيلا يتيم و لا عندو مشاكل مبغيش اتفكرهم ، كان غامض و ضحوكي و قوي...،بعد لمرات كنسا واش حطاب من عودت ليه على حياتي بالخيب و الزوين لي فيها هدرتو قوتني و فرحاتني كان معقول معمرو دار شي تصرف خيب معايا، كنت كنمشي لكوخ كنبغي غير امتى تشرق شمس و نشوف لحطاب نهار لاخور ديت معايا حلوى صيباتها ماما شفتو كيحطب كيف لعادة من سلينا جلسنا حدا الواد داق لحلوى عجباتو قاليا اممم نسيبتي كتعرف طيب انا وليت كي لمطيشة قلتله هاها باسل قليا الى جيت نخطبك تقبلي على حطاب انا فرحت مبينتش ليه واخة زاعمة و لكن كنحشم قلت ليه مالك هاد لحلوى اترات عليك هااااا؟؟؟،شوية هما ابانوا ليا لبنات جيين نضت تخبيت انا وياه ورا واحد صخرة كانت كبيرة جاو جلسو و بداو كيتفقو فين غادي اتلقاو حيت كان لغد ليه لحد و فرحنين حيت غادي اشوفوسيدي سفيان ، لموهم لحطاب سمع كلشي بديت كنضحك انا وياه كانو غادي اسمعونا و انا نقول ليه راه تعطلت خاصني نمشي قاليا انا غادي نوضهم قلت ليه كيييفاش؟!! قلد صوت ديب عاااااوعااااو ...،غير سمعوه ناضو كيجريو بلهلا اطريه ليهم مت بضحك قلت كتعرف تقلد لاصوات كون شفوني معك نمشي نلقى لقبيلة كاملة صاقت لخبار ، ضحك و قال ليا متخفيش مزال عندي بزاف لمفجآت مفهتش شنو بغا اعني قال كاع بنات لقبيلة عجبهم ولد سلطان و كيمشيو اشوفوه علاش مكتمشيش معاهم ولا مكيعجبكش ،قلت ليه لا مكنسليش و سمعت بلي واخة السلطان ظريف ولدو حاس براسو ضحك شكون قالها ليك ؟؟ ،قلت غير سمعت شوف لبنات شنو ديرين عليه غير هادي تخليه اشوف نراسو قاليا لااا ماشي بالضرورة قلت مالك كدفع عليه و كضحك ؟؟!! يلاه بسلامة خصني نمشي ،من وصلت لقيت ماما مشوشة علي و غادة تقللب غير شفتني عنقتني بنتي !!! قلت ليها مالكي قالت ليا تخلعت لقبيلة كاملة كتهدر على دياب شفوهم لبنات في الغابة، شفوهم ههه ؟!! يلاه اماما مكين والو غير كيتخيلو مشيت غسلت حالتي ونعست لقيت ماما و ختي دارو كاع شغال ، فين ما كيوصل ليل كتجي عندي ختي نعود ليها على لحطاب من قلت ليها على لبنات صخفات بضحك نتوما مالين دياب عبرتو عليهم لغد ليه طلباتني ختي تمشي معايا لغابة لكن ماما مشات تسوق و مكين لي قابل بابا، صافي هاد لمرة ملقيتش لحطاب تشوشت عليه بزاف جاني لملال مولف اونسني نهدرو و نضحكو قلت ياكما مريض بغيت نمشي نشوفو لكن معرفااش فين ساكن حتى سليت و جريت لخنشة هو ابان ليا عود ركب عليه شي حد جاي جيهتي هزيت حجرة خفت ليدير ليا شي حاجة من قرب نزل من لعود و كان حادر راسو قلت ليه الى قربتي غادة نضربك بهاد لحجرة ،هوا قرب و هز راسو ، لحطاب ؟!!! اش هاد لبس و لعود شكون نتا ؟؟؟، هما اوقفو علينا لبنات كانو تبعينو بلا ميحس و هما ادرو عليه سيدي سفيييييان انا تصدمت دموع بغاو انزلو ليا بغا هوا اشرح ليا لكن لبنات ضيرين بيه و كيغتو ركب فوق لعود و مشا ، غيير مشا هما ادرو
بيا فيين كتعرفيه شنوو عجبووو فيك يا لمنفيقة دايرة راسك مفهمة والو كتلاقي معاه و كتقول فين كتشوفوه دبا غادى تشوفي علاش قادين و الله لا كان ليييك!!، خليتهم ومشيت فحلاتي بقيت غادة و نبكي و صلت شفتني ختي كنت غادة نتفركع هي لصبراتني قلت ليها هاد ايام كاملة هوا كيضحك عليا و لبنات باينة غادي اشوهوني في لقبلة ختي تصدمااات قالت ليا ميقدروش راه ولد السلطان هدا، قلباتها ضحك ايييه نمشي حتا انا صباح على الله نلقى شي حطيطيب ههه، شرقات شمس نهار لاخر مشيت على امل نشوف لحطاب لي هوا ولد السلطان اشرح ليا علاش كدب عليا غير وصلت لغابة لقيت لبنات جالسين و حالتهم عامرة تراب و كانت كل وحدة هازة بالة تاع لحفير انا مفهمت والو بغيت نهرب هما اشدوني حزمو ليا ايديا و سدو فمي بمنديل حيدو ليا حوايج لي لابسة لفوق وخشاوني في حفرة و سدوها بالحجرة لي كانت حدا الواد ، شدو لحوايج قطعوهم جابو معاهم دجاجة دبحوها عليهم و مشاو لقبيلة كيبكيو شاااامة كالها ديب !!شاااامة كالها ديب !!ناس قالوها لماما صخفات بابا مسكين تزاد عليه لحال ختي مشات كتجري عند لبنات و هازة مقدة قالت ليهم الا مقلتو ليا ختي شنو درتو ليها حتى نقتلكم هما نكرو و الناس تيقالو مسكينة ختها ماتت مديوش عليها كلشي كيشوفها غير كتخرف ،عرفات بلي غير كضيع لوقت مشات كتجري لقصر قالت لحارس ممكن نهدر معا سيدي سفيان موضوع مهم بزززاف، قاليها مكينش سيدي سفيان و ميمكنش دخلي تسنايه حتى ايجي قالت ليه لالا صافي ،مشات عوتني لغابة باين غادي امشي باش اشوف شامة و صلت بان ليها لعود مربوط و هو جالس اتسنى فيها مشات عندو عودات ليه كلشي قال لااا كدووب مكاين حتى دياب اكيد خباوها غير في الغابة ،قلبنا ملقينا والو مشينا جيهت لواد قاليها شي حاجة مبدلة ختي مفهماتش قال ليها اااه لحجرة لتخبيت وراها انا و شامة هداك نهار فين هيا ؟؟ ختي قالت ليه شوف لآتر تاع لحجرة شي حد جرها قاليها اه هي قد هكا خاص جماعة باش تدفع غادي ايكونو بنات لقبيلة ...اجي نقلبوعليها تبعو لآثر لقوها عيطو شاااامة شاااامة لكن تحد مجوب قال لختي آجي عونني ندفعوها صافي غير جروها هي تبان ليهم شامة ختي بكات بالفرحة و سيدي سفيان نزل جبدني كنت صخفانة تخلع بزاف دموعو نزلو من شفني هزني فوق لعود قال لختي انا غادي نديها لقصر جي نتي و عائيلتك و لبنات حسبي هو لخر معاهم .
بقات حالة فمها و فرحانة ، بقات ماشيا في الطريق وشافت لبنات جالسين كيهدرو و الضحك من الفوق مشات عندهم قالو كيف بقيتي من جهت ختك؟ ضحكااات قالو ليهاا ختك ميتة ونتي كضحكي!، قالت ايييييه ختي دبا في القصر مع ولد السلطان يا المجريمات كنتو بغين تفكو منها علم الله شنو غادي اديييير ليكم، ولاو صفرات بالخلعة خافو قالو يلا نهربو قبل ميجي لينا و نتفضحو في لقبيلة نقزات وحدة منهم و والدينا مساكن قالو الى مشينا غادي اكملو علييينا صافي هربو من تم مسمعنا عليهم شي حاجة ، من وصلات ختي لقات كروسة بجوج احصنة حدى لكوخ عرفات بلي ولد السلطان لي مسيفطها ،دخلات لكوخ ماما ماما ختي حية ،فين هيا بنتي شامة ؟!! قالت غير نودي في طريق نعود ليك نتي و بابا خرجات ماما مفهمات والو ركبو كاملين و حكات ليهم كلشي في طريق وصلو دخلو لقصر كان كبيير وزويييين بزاف بقاو حلين فمهم ،شوية نزلت لابسة قفطان ذهبي و طالقة شعري طلعت زويييينة بزاف هه، طلب السلطاني ايدي من عائلتي طابعا وافقوو ههه، نهار لاخور درنا لعرس غزاال كاع لقبيلة حضرات و حتى سلاطين لقبايل لي قراب لينا كلشي كان فرحان و انا وسفيان نضنا نشطحو قرب مني وقال ليا ...، و انا نسمع شاااامة شااامة نوضي بارك عليك من نعاس كنت كنحللللللم لا ميمكنش !!!خليني نسمع شنو بغا اقول ليااااا ،ختي بسم الله عكيك مالك؟ شوية سمعنا لبكى ولغوات خرجنا لقينا بابا ضرب رجله بالمنشار و انا نسخف ليهم
ﺍﻟﻨﻬﺎﻳﺔ