القصة ديال اليوم شوية فشكل .. ماشي من ناحية الاحداث ولكن من ناحية ديال الزمن ... انرجعكوم شوية للور ... زمن بيض وكحل .. زمن السروال طالع تال المعدة .. زمن الخير والكرم و حتا زمن الاستعمار فبلادنا ....
ماغاديش نحتاج نكول ليكم كي كان المغرب فالخمسينات .. فالبداية ديال الخمسينات .. ولكن الضروف فاش كبرت كانت مختالفة على شحال من وحدة فالسن ديالي ..
أنا هي نجمة ... البنت الوحيدة ديال الحاج متولي ... هير كانضحك .. با سميتو العربي .. ومي سميتها وردة .. كنت البنت الوحيدة ديالهم .. و فنفس الوقت كنت انا البنت الوحيدة فالعائلة ديالي لي كملت القراية حتال الثاناوي و التاحقت بالجامعة .. كنت انا البنت الوحيدة لي كانلبس دوك الصايات الطوال و القميجة و نخرج طالقة شعري .. فحين كانو البنات لي قدي كايتلواو فالحايك ولا القب والنكاب قبل مايخرجو ... و كنت انا الوحيدة فالعائلة لي كانخرج الصباح بكري نمشي نقرا و نوقف مع با فالبازار ديالو نعاونو ...
كنت من عائلة محافظة ... مي علماتني كي نحافظ على راسي و صلاتي و أخلاقي .. علماتني كي نصلي ...و با علمني كي نتعامل فهاد الحياة .. تربيت على مبادئ التسامح و الكرم و الحب ... كان ديما با كايكول ليا ..*بنتي راه الرسول عليه السلام كال لا فرق بين الناس كولهوم الا ا تقوى ..حتارمي الناس كيما كانو و بقاي متشبثة باخلاقك .. *
واحد النهار كنت كالسة فالبيت ديالي .. كانراجع شي دروس .. و دخلات عندي مي ... *نجمة ... بنتي ... بغيتي شي حاجة ماتاكلي ..*
شفت فيها و تبسمت ليها ..*الله يخلف عليك ا مي والله مافيا لي ياكل ... *
دوزات ليا على شعري و هزات كفوفها للسما ..*يا ربي تيسر ليها .. وتحفضها وفين ما حطات يديها تزيان ليها ..*
هي كادعي و انا هازة يدي للسما كانكول..* امييييييين.
*مي هاد الديعوات هوما لي كايوقفو معايا ... الله يخليك ليا ..*
مازال كانهضرو حنا نسمعو تحنحيين ... ناض مي ..*باك جا .. نوض نسخن ليه الما للوضوء.. *
*انوض معاك امي نسلم عليه..*
نض لقيتو كالس فقاع الدار وحاط بلغتو و سلهامو حداه ... تحدرت بست عليه ..*الله يرضي عليك ..*
شاف فيا و كحاز سلهامو ..*بنتي اجي الله يرضي عليك...كلسي حدايا .. بغيت نهدر معاك ..*j,
كلست حداه ..*نعام ا با ..*
شد ليا فيدي ..*محتاجك أبنتي .. فواحد الشغل ..*
ضحكت ليه ..*لي تقالت خفافت عليا ا با ..*
*الله يرضي عليك دنيا و اخرة .. وا سمعيني .. راك دابا عارفة بلي الفرانسيس هوما لي محكمين فقوانين الادارات ... و حتا الادارات كايمشو بالقوانين دياولهم .. ابنتي نتي راك فاهة و قارية الفرنسية .. بغيتك توقفي ليا فالبازار فالاوقات لي كاتكوني مسالية .. تعاملي ليا مع الضرائب .. و الوراق و كاع الوثائق .. وحتا شي مععلمين كايشريو من عندي فرنسيين ..ا بنتي نتي راك قارية و تعرفي حسن مني فهادشي..*
شفت فيه وضحكت ..*وا صافي ..هير هادي ابا .. وا ساهلة .. ماتخممش..*
ترسمات الضحكة على وجهوو..*هاكا نبغيك .. حارة و مرا و قادة و ديما هازة ليا راسي بين الناس .. الله يرضي عليك ..*
بست ليه يديه ..*امين ابا .. غدا ان شاء الله ندوز من الجامعة ل عندك .. حتا نرجعو فالعشية انا وياك راه ماقارياش العشية ..*
*تا هادا نضار .. يالاه ا بنتي ..انا نمشي نتوضا نخرج للعصر .. *
*الله يقبل ابا ..*
ماكنتش كانمل من البازار عند با .. كان كايبيع فيه شي تحف زوينين .. و عندو 3 ديال المتعلمين .. وكان هو الرئيس .. كنت كايعجبني نمشي .. كان فقاع المدينة القديمة .. قريب لواحد الحي معروف بزاف فمراكش انه كان ديال اليهود .." الملاح "كان بمثابة تجمع سكني ككبير لليهود المغاربة ...كايعجبني هاد التنوع الثقافي لي فمدينتنا ... كانو ليهود المغاربة معروفين بالبيع و الشرا ... زعما التجارة .. خصوصا ديال لاأثواب ... ديما كنا فعالقة مباشرة معاهم .. واحا الديانات مختلفين و لكن نفس الهوية .. كلنا مغاربة ..
كيما تافقت مع با .. نهار لاخور خرجت من الدار و مشيت عندو للبازار .. دخلت لقيت عبد الصمد المتعلم ..* لالة نجمة .. اهلا ..*
*عبد الصمد لاباس .. فين با ..*
*سي العربي راه الداخل .. دخلي راه كان كايتسناك .. بغا يقضي شي غراض وكان كايتسناك تاتجي .. *
دخلت عندو...*با .. ؟؟ ياكما تعطلت ..*
شافني جاية ..*لا نجمة هنا و انا كانكول مال المحل منور... *
بست ليه يديه ..*بطولة العمر ابا الله يخليك لينا ..*
دوز ليا على شعري ..*الله يرضي عليك و يعلي بيك .. سمعي ابنتي ... مزياان .. راه واحد السيد ..سميتو اسحاق .. ياايما غايجي هو ولا يسيفط ولدو .. غايجيب واحد الامانة ديال الفلوس .. شديها و خبيها فهاد المجر و سدي عليها .. واخا؟؟*
*هير كون هاني ا با ..*
*انا ابنتي ماغانتعطلش .. خير شي سلعة غانمشي نعاينها و نجيبها .. ردي بالك الله يرضي عليك .. *
تبسمت ليه .. *واخا ا با . *
كلست فبلاصتو .. كانتساراح فداك الكرسي الرائع ديالو ... بقيت كالسة شحال حتا .. دخل واحد السيد
انا ماكنتش رادا البال شكون داخل و لا شكون واقف .. دخل واحد الشاب ..يكون فمقتبل العمر .. وقف قدامي .. كنت حادرة راسي ماشفتوش .. وقف حدا الكرسي و كال .. *شالوم ..*
سمعت الصوت الرجالي و جمعت الوقفة .. باش هزيت راسي .. باش تلاقاو عيني بعينو .. حدرت عيني و رديت عليه ..*السلام عليك .. *
بقا واقف قبل مايمد يديه ... *شميتي يعقوب .. يعقوب بن اشحاق .. *
بقيت مترددة واش نسلم عليه ولا لا .. مديت ليه يدي بالزربة من باب الاحترام و حدرت راسي .. *أنا نجمة .. وأنا بنت سي العربي .. راه وصاني بلي غايجي سي اسحاق ولا ولدو .. *
سكت .. هو يكول *هادي هي الامانة لي شيفط با .. شمحو ليه الا تعطل .. *
ماهزيتش فيه عينيا .. حيت ماب0غيتش نعطي لراسي فرصة نستارق من وجهو النضرات .. حيت بلا كدوب .. كان شاب جميل ..
*لا ماكاين مشكل ..*
مديت يدي باش نشد الفلوس .. وهو بكل احترام عطاهوم ليا . اطلب الادن ومشا ... خرج و دقات قلبي كانت مرتفعة .. علاش و كيفاش مافهمتش .. يمكن كانت هادي هي المرة الاولى لي تعاملت فيها مع الجنس الاخر .. واخا الجامعة كانت مختلطة و لكن ماكانوش عندي صحاب من الدراري .. كنت دايرة حدود ..
خبيت الامانة فالمجر كي كاليا با .. وبقيت نتسناه .. دازت مدة هو يدخل با ..*امدرا ا لالة نجمة؟؟ وصلات الامانة؟؟*
*اييه ابا راه فبلاسطها كيما كلتي ليا ..*
شدها با و حسبها ...*ماعندي ما يتسال سي اسحاق .. الصرف ديالو معقول ..*
بقيت ساكة قبل مانكول ليه ..*با ... سي اسحاق يهودي؟؟*
*اببه .. و لكن هادا ماكايمنعش مانتعاملش معاه .. راه انسان بحالي بحالو و راجل فكلمتو ... *
بقيت ساكتة ... *لا نجمة .. مك غاتكون كاتسنانا .. يالاه نمشيو؟؟*
*اييه لي بان ليك ..*
عيط با..*عبد الصمد سد المحل مزيان الله يرضي عليك .. و السوارت دوزهم ليا للدار ...يالاه ابنتي ... *
الطريق كولها وانا كانتفكر داك الشاب و الطريقة اللبقة باش باش عاملني ... اويلي اش هادشي صابني .. لا ..حرام نفكر فشي حاجة ماعنديش فيها الحق .. اعود بالله من الشيطان الرجيم ..
دخلت للدار بدلت حوايجي و كلست فبيتي ... دخلات عندي مي و لقاتني دايرة يدي على وجهي .. وكانفكر ..*فاش ساهية لالة نجمة؟؟*
شفت جيهتها و حيد يدي من وجهي ..*والو ا مي ..*
بقيت ساكة و هي كلسات فوق راسي ..*هاد الشعر قهرتيه بقلة المشيط .. يا لطيف ابنتي .. غدا ان شاء الله .. غاندير ليك لييه الحنا و اداد .. يتقاد هير شوية..*
بقيت ساككتة و انا نكول ليها ...*مي .. واش كنتي كاتعاملي مع شي يهودية؟؟*
ضحكات و كالت ..*وعلاه لا ؟؟ واحد لا أليجا الله يرحمها ايلا مات .. و ختها لا أنيكا .. كانو خياطات من داكشي ... شحال ماخيطو ليا فاش كنت بنت .. و فاش كنت حاملة بيك ..* بقات كاضور فراسها وكاتنهد .. *ااييه اليام .. *
كالسة جامعة ركابيا .. *و كي دايرين ..*
زاد كاضحك ..*بنادم بحالنا بحالهم .. هير هوما .. ابنتي .. كايكول ليك صعيب تيق فاليهود ..*
ضرت عندها .. *وعلاش امي؟؟*
*ابوا كايكولو بلي هوما شعب الله المختار.. وكاع الناس الخرين مخلوقين باش يخدموهم . وهوما راه قوم اليهود قتلة الانبياء .. و كاينين شي وحدين ماكايكرش فيهوم الخير .. ولكن ا بنتي الناس طوب و حجر .. الله يهدينا للطريق الصحيح ..*
*امين امي .. *
حاولت نخوي دماغي من التفكير ونعس ..صبح الصباح .. نهار جديد واحداث جديدة ..
صبح و فتح ... نهار جديد فحياتي .. كي العادة من بعد الجامعة دزت عند البازار عند با ... دخلت هو يشوفني ..
*جاااابك الله ا لالة نجمة .. اجي الله يفتح عليك ..*
مشيت سلمت عليه ..*خير ان شاء الله ا با ... *
*اجي الله يرضي عليك واحد التوصيل ديال الفلوس خصو يمشي لعند سي اسحاق .. و ماكاين ما حسن منك ديه .. حيت بغيتك تقراي ليا داك التوصيل لي غايعطيك حتا هو .. و ايلا بانت ليك شي حاجة ماشي هي هاديك بلا ماتجيبيه ليا .. واخة ابنتي ..؟؟*
بقيت كانشوف فيه ..*و لكن ابا فين جا المحل ديال هاد السيد؟؟*
*هانتي ابنتي .. سيري من هاد الطريق الحانوت للدار ... دوزي للملاح .. وسولي على اسحاق اليهودي لي خوه حاخام .. و يوصلوك ليه..*
*هيا داك السيد خوه رجل دين؟؟*
*اييه ا بنتي .. تا ترجعي ونهضرو يالاه سيري الله يسهل عليك ..و اهم حاجة من يديك ليدو .. .*
شديت الوراق من عند با و مشيت ..بقيت غادية حسب المثل لي عندو فمو مايتلف .. تا وصلت للحانوت .. دخلت .. بقيت واقفة ..*السلام عليك ..*
طل عليا من بعيد .. كالس فالمكتب ديالو ..*شالوم ...*
ناض .. جاي لجيهتي .. و تايحقق فيا ..*نتي هي البنت لي لقيت لبارح عند شي العربي؟*
شفت فيه و حدرت عيني و زيرت على الوراق لي فيدي .. *اييه ..كاين سي اسحاق؟؟*
حدر راسو عندي ..*فكريني بسميتك ..*
تزنكت ..*نجمة .. سميتي نجمة..*
*انيشة (انيسة)نجمة هير خلي ليا الوراق يجي با و نعطيهم ليه ..*
هزيت راسي بالزربة ..*لا لا عافاك .. من يدي ليد سي اسحاق ..*
زاد كايضحك ..*هي حتا نتي من شحاب داك المثل ديال لا تيقا فاليهود..*
فهمني غلط .. تزيرت شفت فيه و كلت ..*ماشي هاكاك .. ولكن هير الامانة خصها تعطا لمولاها *
كلس فالكرسي .. دار رجل على رجل .. *تفضلي كلشي(كلسي).. راه با ماكاين .. تشاراحي بيدما جا .. *
كلست فقنت الكرسي حادرة راسي كانتسنا سيدهم ايسحاق يجي ..
*اش كاديري ا انيشة نجمة..*
كانتفادى اي شوفة تقدر طيح عيني فعينو ... *انا كانقرا فسنة اولى فالجامعة الاداب.. *
شاف فيا .. *مجيان .. حتى انا كنت كانقرا فالجامعة شنة ثانية .. وهادي الشنة الثالثة ديالي ولكن خرجت نعاون با فالمحال ..*
حدرت راسي ..*مزيان الله يكمل .. *
بقينا ساكتين .. واحد الشوية هو يكول .. *اش تشربي ا الانشة نجمة..*
جمعت الوقفة ..*مرة خرى ان شاء الله نرجع .. على مابان ليا سي اسحاق مازال معطل .. *
ناض حتا هو ..*خليك .. ها مابعيدش بجاف .. *
*لا الله يخليك .. مرة خرا..*
*شافي ا لا نجمة بقاي على خاطرك ..* خرجت من المحال .. كولي كانترعد .. ماعرفتش علاش .. قلبي كان كايضرب بالزربة .. ثاني مرة كانشوفو و كانحس بنفس الاحساس ..علاش اسيدي ربي .. حاولت مانفسرش هادشي لي كانحس بيه شي تفسير خايب .. لا يا سيدي ربي ..
مشيت كانجري للبازار عند با .. دخلت عندو ..*لا نجمة .. شفتك مازال هازة الوراق .. *
*مالقيتش سي اسحاق ا با .. *
*مزيان ابنتي هاكا نبغيك .. نقدر نعول عليك .. كوني راجل ابنتي .. راك غاتكبري مازال و تولي فزمان فيه الراجل بحالو بحال المرا .. انا كانوجدك لهاد الزمان .. كوني مرا حرة ابنتي ..*
بقيت كانسمع لهدرتو .. و كانطلب الله فالداخل ديالي يغفرليا على كل دنب .. ولا كل نظرة حرام نكون درتها ... مشيت للدار صليت و طلبت المغفرة .. احساس غريب كان كايراودني ..
النهار الموالي .. قبل ماندوز عند با .. قررت نمشي لواحد العرصة حدانا .. كايتجمعو فيها الشباب كايقراو فيها .. لي عندو شي كتاب ولا شي افكار كايناقششهوم ... كانو شباب منورين كايشاركو افكارهم .. كايديرو حلاقات يتبادلو فيها الاراء و الحوارات ...
كايعجبني تماك .. نمشي ليه نجبد كتاب ... ونبقا نقرا و الطبيعة نقية كانسررررح مع الكتاب و ماكانحسش بالوقت ..
كيما قررت .. ديت زربية صغيرة علاش نكلس و الكتاب .. كلست و حليت الكتاب بشغف و حب كبير .. و انغامست فعالم القراية و نسيت العالم لي فيه انا.. واحد اللحضة ....
كانقرا بشغف و حب كبير داك الديوان لي بين يدي ... واحد اللحظة سمعت ..*الانشة نجمة؟؟*
لقيتو واقف قدامي ... كتاب فيديه ... و كايتبسم .. بلعت لساني .. الله يا سيدي ربي .. علاش .. واش حيت كانفكر فيه بزاف كانتلاقاه بزاف؟؟
تبسم وكال ..*حتا نتي من عشاق الكتب .. جيت قبل منك .. شفتك من بعيد وكلت ايلا ممكن نكلشو مجموعين ناقشو الكتوب لي عندنا ..*
بقيت ساكتة حادرة عينيا ... عاجزة نكول اي كلمة ولا ندير ردة فعل .. سكت هو يكول ..*الانشة نجمة؟؟*
كلت و عينيا فالارض .. *كانقرا مقتطفات من الديوان الشهير ديال احمد الشوقي ../شوقيات../*
تبسم وكال..*عندك دوق رفيع .. انا كانقرا ديوان نجار القباني ../قالت لي الشمراء(السمراء)/*
هزيت فيه راسي .. حيت كنت من المولوعين بنزار القباني الشخص كثر من الشاعر .. ترسمات ضحكة على وجهي وبلا مانحس تلقت الهدرة ..*
قالتْ ليَّ السمراءُ :
إنَّكَ مرهق
في غرفةِ الإنعاش
تبحثُ عن قصيدة
ما بالُها السمراءُ تبكي
فوقَ مِقْعَدِها وحيدةْ
مابالها قد أسدلت جفنيها
مُرْهَقةً
شاف فيا و بتاسم ابتسامة عريييضة كمل و كال ...*
تُواري وجههَا خلفَ الجريدةْ
والصَّمتُ ينجفُ(ينزف) من رؤى أحلامِها
جمراً وآلاماً عنيدةْ
وتشتلقي (تستلقي)على أهدابِها الأحزانْ *
عجبني الحال و تعجبت بيه انه كايعرف هادشي .. كايعجبني الحال بزاف منين كانلقى شي حد كايتقاسم معايا نفس الحاجة لي كاتعجبني .. كلت ليه ..*هاد الديوان ديال القباني ماكانملش منو ..*
ضحك وكال..*حنا الطلبة ديال الاداب .. نجار القباني هو المثل الاعلى ديالنا .. *
بديت بتاسم كي الحمقة .. هو كايشوف فيا .. سكت وكال *ايلا ممكن تعطيني الديوان لي كاتقراي فيه من بعد ماتسالي القراية ديالو ..*
هنا .. صافي زعمت و تطلق لسان .. وبديت نعاود ليه بحماس على الكتوب و الديوان لي عندي .. لي كانقرا ولي كانحلم نشري و نقرا و لي كاين ولي خصني نسافر للمكتبة فالرباط باش نلقاه .. وهو مركز كايسمع و كايشوف فيا .. كانهضر .. على الكتوب كانهضر .. حتى واحد اللحضة .. هزيت راسي لقيتو كايشوف مباشرة فعيني .. وكايبتاسم .. بحالا ماكانش كايسمع ليا .. سكت و بقيت كانتسناه يهضر .. *اححم... سمح ليا صضعتك..*
فاق من الكلبة .. *لا لا بالعكش .. بغيت نكول ليك راه عندي مقتطف نثري ديال احمد شوقي /عدراء الهند/ ايلا بغيتيها ..*
كان هادا احسن اقتراح سمعتو فحياتي .. لانه كنت كانحلم نقرا النثر ديال احمد شوقي .. *شكرا بزااف*
*ايلا بغيتي نجيبو ليك غدا .. *
بقيت كانشوف فيه ..*هادا لطف منك .. مشكور بزاف ..
كال ..*ماكاين تا مشكل ...*
نض من بلاصتي ..*خصني نمشي .. دابا غايكون با كايتسناني .. *
ناض حتا هو و كال .. *شكرا حيت شاركتي معايا هادشي ا الانشة نجمة .. غدا نجيب ليك النص النثري .. هنا نيت و نفس البلاصة .. *
تبسمت ليه ..*شكرا بزاف ..* ومشيت .. الطريق كولها و انا كانحلم بديك/عدراء من الهند/ نقراها ...عجباتني بزاف اللطافة ديالو و خصوصا اننا كانتشاركو نفس الهواية و نفس الدوق .. بقيت كانفكر بزاف ف غدا حيت انقرا و نهز بين يدي ديك المعجزة البشرية ..
حيت كنت ناشطة .. مشيت بالزربة و اونت با فداكشي لي خاصو .. ومشيت... انا وياه للدار .. الصباح
مشيت كانجري للعرصة وديت الكتوب لي عندي نوريهم ليه باش نتبادلو انا وياه ... لقيتو واقف .. حدا البلاصة فين كلسنا البارح .. حسيت احساس غريب .. اول مرة عطيت فرصة لراسي نتامل فيه .. كان شاب غزال بزاف ..بديت كانحس بالدنب لانني حليت الباب لراسي باش نولي نحس بهادشي.. ا سيدي ربي واش هادشي لي كاندير حرام .. تابغيت نرجع فحالي .. وحسيت برجلي داييني عندو .. *الانشة نجمة..شلوم..*
بقيت كانشوف فيه و عاجزة نخرج الهدرة بين واش نجاوبو ولا ناخد الكتاب و نهرب .. *س..سلام عليك..*
مد ليا الكتاب ..*هادا هو الكتاب لي كلت ليك عليه * شديت الكتاب و مديت ليه الكتوب لي فيدي ...
*هادو .. هادو جبتهم ليك باش تقراهم .. غايعجبوك .. *
بقيت واقفة و مزيرة هو يكول ليا ..*الانشة نجمة .. تفضلي ناقشو شويا ..*
كلست و انا حشمانة .. هو يبدا يهضر على الرواية لي جاب ليا .. يشرح ليا الاساليب و القواعد اللغة لي فيها .. ما حسيت براسي تالقيت راسي منغامسة فداكشي لي كايكول .. متبعاه كلمة كلمة .. نستافد منو راه هو سنة ثالثة ديال الاداب ... كلامو و معلوماتو كانو مهيمين بزاف .. بقا كايهضر ..
*الانشة نجمة .. ياكما ضريتك ف راشك..*
*لا لا .. بالعكس سي يعقوب... هادشي لي كاتكول مهم بزاف ..*
*شكرا بزاف .. نقدر نجيب ليك بجاف ديال الروايات .. ماعنديش مشكل .. كايعجبني شي حد لي مهتم بداكشي لي كانهتم بيه ..*
كلسنا .... .. كولا فجيهة .. حليت الرواية لي جاب ليا .. و سرحت معاها ... هو حل الكتوب لي جبت ليه ... تلقائيا .. ترسمات اتسامة على شفايفنا من روعة داكشي لي كنا كانقراو ... دازت سوايع ... مرة مرة نهز راسي .. وتلاقا عيني فعينو ... نبتاسمو فوجه بعضنا و نكملو لقرايا ...
دازت اسبوعين حنا على هاد الحالة .... كانتلاقاو فنفس البلاصة .. كانتبادلو الكتوب ... و كانكلسو نقراو ... عمرني حسيت بقلة الامان معاه .. كان كايحتارمني و كايحتارم افكاري و قناعتي و حتى فاش كاناقشو عمرو ما قلل مني ولا احتقر افكاري .. كان ديما كايقدرني .. و حتا انا كانحتارم افكارو ... وكانستافد منو بزاف
واحد النهار ..
كي كولا نهار .. و كي ولفنا هادي مدة.. كانتلاقاو نقراو... جا ويديه عامرين وراق..
تبسم فوجهي ... *الانشة نجمة ... *
تبسمت فوجهو. ... *السلام عليك .. اش جبتي ليا ليوم ..*
بداو الوراق يطيحو ..*هانتي ا الانشة نجمة داكشي لي كايعجبك .. القصائد الشعرية .. نقراوهوم بجوجنا .. *
كلست .. وبديت نقلب فالوراق .. *واااو ... هادشي هائل ..*
زاد يضحك ..*خديتو من عند المكتبة ديال جدة .. خلاها خالي قبل مايموت ... *
بقيت كانقلب .. شديت واحد القصيدة و حتا ..هو .. واحد شوية و انا نطيح فالقصيدة .. ديال نزار القباني ..*خبز و حشيش و قمر ... *
كلت ليه ..*ااااه.. سي يعقوب .. شوف اش لقيت ..هاد القصيدة .. دارت ضجة منين خرجات..هادي عام .*
شاف فيا وكال ..*كانت الشبب انه ككان غايطرد من الهيئة الديبلوماشية .. لانه قاش نقطة حشاشة ... لي هي الدين .
..وثارو رجال الدين عليه .. *
حدرت راسي و سكتنا هو يكول ...*الانشة نجمة .. *
هزيت فيه راسي..*نعام؟؟*
كال ليا ..*انا يهودي و نتي مشلمة .. ومع دالك ماعمرك حششتيني انانا مختالفين ديما راك تعامليني على اني اشاش انشان ... كانشكرك على نبل الاخلاق ديالك .. *
ضحكت و كلت ..*عمر الدين ولا اللغة ولا اللون تالبشرة يمنع الانسان يعرف ناس جداد .. *
ضحك وكال .. *وخا هكاك ناس كاياخدو الحدر منا ... شوفي اش طرا فالمانيا .. و اش دارت النازية فاليهود... و اش باقي كادير ليهم من ابادة جماعية ..*
شفت فيه وكلت ليه ...*و لكن فكرني ايمتا عرفات فلسطين الراحة من بعد وعد بيلفور.. ؟؟*
عرف بلي اقامة دولة اليهود ففلسطين .. كانت حاجة كاتقيسني ك امرأة عربية و مسلمة بالدرجة الاولى.. و كال *الانشة نجمة .. من الاحشن نخليو النقاشات الشياشية بعيدة على الصداقة ديالنا ... *
كان هادا حل وسط مزيان .. لانه النقاش كان غايسالي صراع ..
باش نهدئ من الطشاش لي كان غاينوض .. حليت الصاك و جبد واحد جوج خبيزات عمرتهوم ..*سيي يعقوب .. تفضل ..*
شاف ليا يدي ..*شكرا بزاف الانشة نجمة... *
بدينا كاناكلو .. *الانشة نجمة .. غانعرفك على واحد الصديق ديالي ... هوا كان معايا فالجامعة .. غاتشدافدي منو بزاف .. *
ضحكت و كلت ..*أحسن حاجة هي نوسعو دائرة النقاش .. *
*انا غانجيبو معايا هاد الاشبوع باش نتناقشو ..*
*مرحبا بيه..*
بدينا ناكلو .. وفرحانين ...
كل مرة كانرجع للدار .. كانحبس راسي من التفكير ... وكانقنع راسي بلي انا مسلمة و هو يهودي من المستحيل تكون شي حاجة بيناتنا ديال المعقول .. و كانقنع بلي هير انا اي منوية .. وهو راه مافبالو والو .. هو راجل محتارم .. مثقف و اهم حاجة كانستافد منو بزاف ديال الحوايج ...
حنا بصح نفس الثقافة و الهوية ولكن عندنا مبادئ و معتقدات مختلفة .. وكنت متاكدة بلي انا على الطريق الصحيح و الدين لي الله راضي عليه ..
نهار على نهار و الاعجاب لي فقلبي ليه والاحترام كايزيد من العقلية والثقافة لي عندو .. ولكن نزيد نعدب راسي .. حيت اي حاجة بيناتنا مستحيلة ...
واحد النهار ... لي طرا ماكانش فالحسبان ..
نفس البلاصة و نفس الكلسة .. هزيت عينيا بان ليا جاي من بعيد .. ومعاه شي حد ..
وقف ... * شلوم..الانشة نجمة ... *
مديت ليه يدي ..*سي يعقوب ..وو عليك السلام ... *
*الانشة نجمة .. هادا الصديق ديالي داوود .. لي كلت ليك عليه .. *
شاف فيا الصديق ديالو ... *انشة .. تشرفت بمعرفتك .. راه ديما كايهضر عليك يعقوب .. شوقني نتعرف عليك .. *
بدا يعقوب يتزنك .. سلمت عليه وكلسنا .. هو يكول الصديق ديالو ليا ..* نجمة .. اسم ماعمرني سمعتو عندنا .. ولكن اسم جمييل..*
شاف فيه يعقوب ....*داوود ... الانشة نجمة راه مسلمة ...*
هنا طرا لي ماكانش فالحسبان .. ناض صاحبو جمع الوقفة .. وبعد ..*يعقوب دقيقة عافاك..*
الله يسمح ليا بقيت كانستارق السمع و كانراقب حراكاتو لي كانت كاتبين انه مصعصب .. كايحرك يديه بجهد ..سمعتو كايكول ..*يعقوب.. .. واش حماقتي؟؟ واش هادي هي البنت لي كلتي كاتبغي.. وبغيتي تجوج ... واش كاين شي يهودي كايدي مشلمة ... واش عرفتي اش كاتكول ولا لا ... المشلمين ليهم دين وحنا لينا دين .. واش عرفتي اشنو غاتشبب لعائلتك ايلا شاقو الخبار ... غايطرا ليك ماطرا لخالك .... بعد عليها .. بعد على المشلمات .... *
بقيت واقفة مسمرة ..كانسمع لداوود اش كايكول ... كال ليه يعقوب ...*داوود ..مامحتاشش لهاد الهدرة دابا .. انا هادي لي كانبغي ..هادي لي غاندي .. *
مشا داوود بعد منو ... و انا بقيت واقفة مصدومة ملي عاد داز قدام عيني... جا عندي يعقوب كايبتاسم و يهدئني ... عرفني سمعت كلشي ..هزيت وراقو جمعتهم *سي يعقوب .. خصني نمشي .. بسلامة ..*
شدني أول مرة من يدي و حيد يدو بالزربة ... *لا ..لا الانشة نجمة ..*
بقيت حادرة راسي ..وكال ..*الانشة نجمة .. انا نعترف ليك..*
بقيت حادرة راسي ..* انشة .. انا اكن لك مشاعرا صادقة وخالصة ..شمحي ليا على الوقاحة ديالي .. ولكن ما كرهتش نتجمعو فالجواج .. راه العلاقات الغير الشرعية محرمة فديني و دينك ..*
احساس غريب ممزوج بالفرحة و الالم و الحزن .. الفرحة حيت شي حد عتارف بالمشاعر دياولو ليا .. وبالحزن و الالم حيت هاد الاعترافات جات من شخص ماشي مناسب .. مستحيل تكون بيناتنا شي حاجة .. ماعمر المسلمة تجوج من غير المسلم ..
بقيت ساكنة .. و مزيرة على صاكي و الددمعة فعيني ... *الانشة نجمة .. انا مستاعد نضحي بكا شيئ على سبيل هاد الرابط ايلا ماكنتيش كاتمانعي ..*
بقيت ساكتة .. من بعد تردد كبير .. كلت ..*ما..ما يمكنش .. انا مسلمة ونتا يهودي .. مايمكنش للمسلمة تجوج من غير المسلم ..*
شاف فيا بعينين مالاهم الحسرة و الحزن .. وكال ..*اشناهوا الحل ... ؟؟*
شفت فيه ..* تولي مسلم .. *
سكت و كال ..*ولا تولي نتي يهودية ... *
هنا شفت فيه شوفة حادة .. *ما مستاعداش نبدل عقيدة متاكدة بيها .. ودابا سمح ليا خصني نمشي .. *
وقف قدامي .. *لا لا .. ماشي كانشكك فالعقيدة ديالك ... انا هير كانحاول نوصل لنقطة الوسط بينناتنا ... *
*نكملو لهدرة غدا..* كنت محتاجة نبكي بلا مايشوفني .. مشيت كانجري للدار و خليتو كايعيط مورايا ..*أنييشة ... أنييشة ..*
دخلت للدار حابسة دموعي .. جريت لبيتي .. وبعد راحة نفسية نزلت عند مي لقيتها كاتخيط شي كيسات الحمام .. *نجمة اجي ابنتي حديايا ...
تخشيت حداها .. وبعد سكوت طويييييييل كلت ليهاا
*مي ..*
*نعام ا بنتي ..*
*علاش اليهودية تجوج المسلم .. والمسلمة ماتجوجش اليهودي .. *
كانت مركزة فالخياطة .. *وا بنتي الولاد كايتبعو باهم فالاصل .. و شكون هاد المسلمة لي ترضا ولادها يكونو يهود وهي مسلمة .. اما ايلا كانت الام يهودية .. الولاد راه كايتحسبو زيادة فالاسلام ..*
بقيت ساكتة هي تزيد تكول ..*هاي هاي ابنتي .. كي شفتي هوما ساهلين ..؟؟*
*كيفاش امي؟؟*
*ايوا هوما ابنتي ماشي بحال المسيح .. ماكابغيو حد يدخل الدين ديالهم .. لي كالت لا اليجا .. كاتزاد يهودي .. ماتوليش يهودي .. وشفتي حتا لي بغا يبدل الديانة ديالو منهم ماكايخليوش ..*
*و باش عرفتي هادشي ا مي؟؟*
ضحكات و كالت ..*فاش كنت باقي بنت .. كان واحد اليهودي ساكن حدانا و سلم .. ايوا يا بنتي .. خلاوه تا ولا يمشي الجامع ..و تحاماو عليه هادوك لي خدامين ف المعبد و سلخوه سلخة فاعلة تاركة .. * زادت كاضحك و كملات..*مع هوما خوافين .. لمغد ليه لبس الشاشية و رجع للمعبد ..عرفتي اش تايكولو الناس؟؟*
*اش كايكولو..*
*كايكولو ماتيق فاليهودي ايلا سلم حتى دوز 40 سنة على اسلامو .. وا بنيتي كايكونو متشبتين ب تايهوديت ا بنتي.. *-
بقيت كالسة و كانسمع ليها اش كاتكول .. وقلبي يزيد يتعصر حيت لا حل موجود قدامنا ..
كلت ليها ..*دابا المسلمة ايلا بغات تجوج يهودي خصها تبدل الديانة ديالها ..*
شدات مي فودنيها .. *سكوكو ..ابنتي .. الردة كفر كبيييير .. كايعاقب عليه الله..*
بقيت شحال متكية حداها و كانفكر .. حسيت براسي تزيرت .. طلعت لبيتي .. سديت عليا وبديت نبكي .. واحد الشوية كلست ربعت رجلي و كلت ..*و ايلا وليت يهودية ؟؟ اش يوقع كاع ... *
ضربت لراسي مع الحيط .. اويلي اش كاتكولي ا نجمة .. نض توضيت و صليت جوج ركعات .... و بكيييت بكاء مريرر ...دعيت لربي .. يا ربي حيد من قلبي و نزع منو ما لايرضيك .. ياربي سمح ليا شككت فالعقيدة ديالي .. ولكن اش ندير .. شد بلاصتو فقلبي ... تربع على العرش .. وليت كانفكر فيه .. و كانشوف فيه الراجل المناسب ليا ..
دوزت الليلة كانبكي .. والصباح مشيت للعرصة باش نكمل الحديث معاه . وهنا كانت المفاجئة ..
الكتاب بين يدي .. و انا ساهية ما قريت فيه تا كلمة ولا حرف ... فاشلة و مهدودة بقوة التفكير و التخمام .. حتى وقف عليا ..*أنيشة نجمة...*
نقزت من بلاصتي ...*شمحي ليا خلعتك..*
درت ابتسامة حزينة ... كلس قدامي و كال ليا ..*عندي ليك خبر مهم .. *
شفت فيه ..*خير ..*
كا ليا ..*باركي ليا قررت نشلم .. ندخل للاشلام ..*
كنت عارفاه دار هادشي هير باش يولي عندو امل انانا نقدرو نتجمعو فالحلال .. شفت فيه .. وبقيت ساكتة و كال ..*ماعجبكش الخبر ..*
الدمعة فعيني ..*يعقوب .. خصك تكون مقتانع بالدين ماشي تخدمو فمصالح ..*
كاليا ..*انا بلا مانكدب كاندير هادشي على قبلك ولكن بعد ما نشلم غانقرا على الدين و نقتانع بيه..*
صدمني ..*يعقوب؟؟ وعائلتك ..*
بتاسم ابتسامة امل و عزيمة ..* أنيشة .. على ودك انا نوقف فوجه الصعاب .. و انا من ديما كنت كانقرا على الدين و كنت كاندير مقارنات و شحال من حاجة فالقران ماكايناش فالثورات ... انا غانقنع راشي .. *
*عارف بلي تاحد فعائلتي ماغايقبل .. حنا كانكونو متشبتين بالدين .. ديالنا ..ولكن ماكايعنيش انانا مانكونوش غالطين ..*
بقيت كانشوف فيه .. ماحسيت تا نزلو الدموع من عيني .. *أنيشة .. ماتبكيش .. أنا بغيتك تكوني معايا ديما .. خصني ندافع و نتقاتل باش نوصل لهادشي .الحب كايزرعو الله فالقلوب الصافية و الخالصة .. هو نعمة ماشي نقمة .. انا من ديما كنت معجب بيك .. ونتي هي الصورة لي تعكس المرا لي بغيت...*
احساس الالم .. ماكانت تاحاجة كاتفرح فهادشي.. لمت راسي .. حيت كون ماعطيط للفرصة لهاد المشاعر كاعما تتناما و تكبر و هاد نبتة الحب تعطي وراق و تثمر .. بقيت ساكتة ..
*ختاري ليا شمية .. أنا غانكولها للعائلة غدا .. غادي نتحدا الصعاب .. انا قررت نولي مشلم .. راه مشيت عند فقيه الجامع و شرح ليا كاع المراحل لي خصني ندير .. انا غانبدا نقرا على الدين .. ونتمنا من الله يوفقني .. ونتي غاتعاونيني ياك؟؟*
الدمعة نازلة على خدي و ابتسامة دابلة وحزينة ..على وجهي .. *عبد المالك .. اسم زوين غايجي معاك .. *
ضحك وكال ..*شميتي عبد المالك .. *
شفت فيه .. *متاكد ا يعقوب؟؟*
تبسم ابتسامة عريضة ..*كثر ماكاتصوري ... ان شاء الله من بعد الشهادة .. غادي نعتاكف نقرا على لدين باش نولي مشلم حقيقي من بعد عندي الحق الكامل نخطبك .. ولا لا ؟؟*
ماقدرتش نحبس بديت نبكي بمرارةة........*أنيشة .. لا لا ماتبكيش..*
*سمح .. سمح ليا ..*
بدا يضحك ..*هادو دموع الفرحة .. عرفتك..*
من بعد هاد الحوار القصير ...تفارقنا .. و كانت احسن حاجة قبل ما يتعرض لداكشي لي كايتسناه .. واخا ماعرفت عليه هير القليل ....
الليل كولو و عقلي مامعاياش .. كانفكر فيه هير هوا ... اش غايطرا .. غدا غايجي يعقوب ولا غايجي عبد المالك؟؟
فقت الصباح .. و مشيت مباشرة للعرصة .. نفس البلاصة لي كانتلاقاو فيها هادي شهر.. بقيتنتسنا .... نتسنا ...نتسنا .تال واحد اللحظة
بقيت نتسناه .....نتسناه ..... ولكن ماجاش ... ماعرفتش علاش ماجاش .. هنا بدات كاتجيني الخلعة .. اش وقع بين البارح و اليوم ... ياكما وقع ليه شي مكروه ..
من بعد ساعة لي فات .. مازال ماجا .. قررت نرجع لبازار عند با على طريق ال"ملاح" علاه نتلاقا معاه ... بقيت غادية ... دخلت للملاح .. كانشوف واحد الزحام كثيييير...
بديت نتخشا بين الناس باش ندوز ..*الله يحضر السلامة .. لاش هاد الزحام ؟؟*
بقيت غادية كاندتفع .. ونهز راسي ع الله يبان ليا شي حاجة ولا شي حد .. بقيت غادية كاندفع فالناس .. حتى وصلت لواحد الطريق مايمكنش ندوز .. صافي ماكاين تا حل من غير نوقف ... وقفت وانا نسول واحد اللرا واقفة ..*اش كاين الالة اش واقع هنا ..*
شافت فيا ... *و الله ابنتي ما عرفتش لاش الملاح مكلوب و الطايح كثر من النايض ..لقيت الناس واقفين وانا نوقف..*
مازال كانهضر مع السيدة هي تنقز و حدا خرا ..*علاه معرفتوش؟؟ ويلي مافراسكومش؟؟.ويليييييي البارح كانت الفراجة هنا..*
شفت فيها *لا ا لالة .. اش واقع ..*
*ويلي راه من البارح و القريقعة نايضة ..*
*و علاش ..*
*ماشي ولد التاجر ايسحاق ..كال ليهم بغيت نسلم ..؟*
وقف ليا زغب شعري ..*ايسحاق .. ولدو .. هو يعقوب .. هو عبد المالك...اش وقع و اش طرا لييه
كملات ديك المرا *ايوا .. ماشي دار بحال خالو..*
هي تكول ديك المرا..*اش دار خالو ..*
*ويلي كان كيحماق على مسلمة ....كاليهم نوووووون كحل العيون بغاها ... بغاها للزواج ...كاليهم غانسلم .. ايوا راك عارفة بلي خو ايسحاق حاخام ...ومتشدد ..دوك ليهود الخااااايبييين... لي كايكولو بلي هوما الشعب الله الممختار .. كال ليه ايلا خرجتي على الملة مانتا منا ما حنا منك*
*ايوا؟؟*
مشاو ليا الما فالركابي .... و بديت نصفار و نخضار .. .و البكية ولا ت واضحة فمعالم وجهي .. كملات و كالت ..*ولكن يعقوب .. هاد ولد ايسحاق .. حاجة خرا ..*
الحمد لله جملة ردات فيا الروح..الحمد الله ماغايلقاش نفس المصير ديال خالو .. تنفست و تنهدت بعد ما تقتعات فيا النفس .. كملات المرا وكالت ..*لقاوه فالجامع فالصبح ... كتفوه و داوه للمعبد .. تجمعو كاع ليهود لي فالمعبد و رجموه فنفس البلاصة فاش رجمو خالو .. كال ليك كالو و ماكالو ... طبقو عليه حد الردة .. لي خرج على الملة عندهم .. بحالنا .. خصو يموت حيت خائن..خوصوصا هوما .. كايكولو بلي قلال ماخصش شي حد يخررج من الدين باش مايزيدوش يقلالو.. ..*
*ولكن .. كالو ليه ..رجع لدينك و نسامحو ليك ... هز صبعو لسما و شهد و غوت لله لي خلقو .. ايوا رجموه تا مات و قطعو ليه الصبع باش شهد ..*
خرت قواي .. و طحت فالارض كانبكي .... الله يا ربي ... الله يا سيدي ربي... بداو العيالات كايغوتو .. و انا كانبكي بواحد المرارة .. *لا ابنتي .. مات شهيد .. و مات على دين الاسلام ... فرحي لييه...*
اللحظة فاش طحت تعاودات السينتة ديال الاحداث لي بيناتنا ف 2 دقايق .. جمعت صاكي و بديت نجري تاوصلت للدار .. بديت ندق بكاع الجهد ديالي تا سخفت و طحت قدام الباب ... حلات ليا مي و ندات تغوت..*مالك ............. نجمة ... بنتي .. مااالك؟؟؟*
مابقيتش كانحس بالنفس تاطلع ليا .. قلبي مزير و نفسي مخنوقة ... بغيتو .. مات شهيد .. بغيت نلحق عليه
شهيد الاسلام عبد المالك الله يرحمو سكن قلبي منين فارقنا كثر ما سكنو منين كان معايا .. وليت مهووسة بيه .. نشوفو فكل قصيدة نحلها ... فكل كتاب نحلو ..نشوفو فقصائد نزار القباني .. و احمد شوقي .. نقرا القصيدة بجهد باش تاهوا يسمع معايا و يقرا معايا ... ويستمتع كيما كنا كانديرو شحال هادا
من بعد سقت الخبار بلي عائلتو تخلات على الجثة ديالو .. حتى تكلفو شي محسينين كفنوه و دفنوه .. و تصلات عليه صلاة الجنازة فيها قوم ربي العالمين ومشا معاه فكنازتو نص المدينة
دازت سينييييييين و أعوام .. و وليت لا نجمة بنت العربي .. المرا الشارفة لي عمرها ماتجوجات ولا عرفات شي حد ... تا حد ما عرف بلي سميت عبد المالك مغروسة بسكين فقلبي... لي باقي مابراش .. لي باقي كاسيل دمو من جرح عبد المالك
النهاية