منين نبدا و اش نكول .. ماعرفتش ..قصتي قصة بحالها بحال القصة ديال فريدة و داك المغصوب ماعقلتش على سميتو ..مخربقة و فيها الصداع.... الموهيم .. أنا واحد البنية ضريفة كي الخريفة .. من الدار للجامعة و من الجامعة للدار .. من داك النوع ديال الفتيات المولوعات بالسينيما الهندية ... نعم يا سادة. .. عالم بوليوود العجيب الغريب .. فين لي فواتور كايقلبو والبطل ماكايوقع ليه والو .. فين البوليسي ماكايحل لغز الجريمة حتا كايطردوه من الخدمة .. و فين مالهوترا كايجري واخا مضروب ب 50 رصاصة باش يعتق حبيبتو بريانكا ...
الموهيم .. نرجعو للمفيد .. من ديما كانو كايضحكوعليا على شعري الطويل لي ديما ضافراه و دايرة ليه الفرقة تقليدا للقديرة اشواريا ريه من فيلم /كورو/ كانو مكنيين عليا *الهندية التالفة* ..عرفو .. عرفو بلي انا بلاصتي ماشي ف الموغرايب .. انا بلاصتي مع شاروخان و سلمان خان و اميرخان و الشلة .. انا واحد الفتاتش لي كاتبغي اللغة العربية .. اصلا هادشي لاش دايراها كتخصص فالجامعة .. كنت كانمتل داك النمودج ديال الفتاة التقليدية .. فنضر الاخرين ... اما بالنسبة ليا .. كنت عايشة عالمي الخاص .. قتما رشقاة ليا كانشطح .. هير هو ماكايخرجوش ليا الناس من الجناب يشطحو معايا ...خولة ختي كانت العكس ديالي .. هي ختي الكبيرة ..وكانت مولوعة بالعلوم و داكشي و داكشي...
واحد النهار .. وبينما كنت منشغلة ...كانتفرج فواحد الفيلم ديال القديرة برينتي زيندا ... كاناكول الفشار ...قطعت أمي حبل أفكاري ..
*واش ماغاديش أ هدى طفي داك المشقوف و تنوضي .. ونتي النهار وماطال ونتي مكابلاهم .. من صبح الله هوما يشطحو..*
حسيت بالاهانة ..*لا .. مالكي كاضلميهم .. يالاه نص ساعة باش بداو يشطحو .. *
تعصبت الام الحنونة ديالي .. *شوفي .نوضي تسخري ليا و رجعي راه تلقايهم مازال ماسالاو التلواز..*
بديت نزاوك..*ارجوك يا اماه .. خليني نكمل هير هاد الفيلم ونوض نريب الدار و نعاود نبنيها كاع نتي ايلا بغيتي .. ولا عرفتي شن وصيفتي خولة*
هنا ... حملت امي اداة التهديد لي ديما دايراها فالجيب زيف الجلايل ... *شفتي ابتي هاد المقص .. والله ماتنوضي حتا نضرب ليك ديك الضفيرة من النص .. و نعلقها فالصالون ..*
نقزت من فضاعة هاد الجريمة..*لا يا امي .. ارجوك...هاني نايضة نجيب ليك تام حماد مول الحانوت تاهوا .. الضفيرة لا .. الضفيرة لا .. *
حسات بالنصر ... و دارت ابتسامة شريرة ..*و هكاك الله يرضي على بنتي .. *
خرجت مع الباب ..الضيم طايح عليا .. تخيلت راسي كاجول الحزينة .. غادية وكانتخيل فراسي أغنية و شطحة ديال الحزن ... حادرة راسي .. كانتمتم .. كانجر رجليا .. كانتسنا الشتا تصب باش تكمل الحلقة ونبدا نشطح وتجي الدريبة و حماد مول الحانوت يشطحو تاهوما ...
واحد اللحضة .. ومن دون سابق اندار ... ماحسيت براسي تالقيتني مسرحة فالشانطي وناش مجموعين عليا ... حليت عينيا.. الناس تايبرقو فيا ..
*هاهيا حلات عينيها .. هاهيا حلات عينيها .. *
بديت نسد و نحل فعيني ..*؟؟ kya howa؟؟اين و مادا حدث؟؟*
وقف عليا واحد الانسان ماقدرتش نميز صورتو حيت كان تايبان بالمقلوب..نزل عندي و شد ركابيه..كان باين الحرام باقي صغير*اش كاين ؟؟..وتاتسولي مازال..*
نض و راسي دايخ مازال كانسمع الاغنية
اقي صغير*اش كاين ؟؟..وتاتسولي مازال..*
نض و راسي دايخ مازال كانسمع الاغنية فراسي..*مانسولش؟ ياكما التسوال حرام؟*
خنزر ..*وا عباد الله كاين لي تايمشي فوسط الشانطي و بشوية عليه .. و مرة مرة يكلس يتعوج .. واش اختي غادية فالشانطي ولا فلابيست ديال الشطيح فالديسكو ..*
جمعت الوقفة ..الله الله الضفيرة تشنتفات ..*الديسكو .. ؟؟ و كاين ا بنادم لي ماكايكلاصونيش؟ ماتعرفو لي ساهي .. لي كايهضر مع راسو .. لي دماغو تايتشاور معاه.. أ دوي؟؟*
شاف فيا ..*شهدو أ الناس .. راه ماشي هير كلاكصونيت .. راه بقيت تانغوت تابحيت ..*
سست حوايجي ... و جمعت شعري ..*لقيتيني زربانة .. اوما كون درت موتة حمار هنا .. سير الله يعاونا و يعاونك ... شفع ليك الفيلم ..*
بقا كايشوف فيا ..هاز حاجب وحاط لاخور ... عطيتو بضهري .. و انا نسمع ..*باقي بحال هاد الماركات عايشين؟*
درت واحد الضورة.. بالزربة ../تخيلوها بالعرض البطيئ/ مع واحد النضرة حادة ... *شناهوا..*
شاف فيا باحتقار و هز موطورو و زاد ..تفو .. ماكرهتش كون شطحت فديك اللحضة تعبيرا عن الغضب .. زد و انا فيا الغدايد ... مشيت للدار .. بجغت ديك الخميرة من قوة الفقايس ...
حلات ليا ماما الباب ..*فين تعطلتي تاني؟؟ واش نتي كولشي عندك معطل .. مالكي هاكا..*
هزيت فهيا عينيا ... *و راه ضربني واحد الله يعطيه الضرابي .. *
بديت نتغبن ..جراتني .. *سيري بدلي و اري ديك الخميرة .. و باقي تغبني بحال ديك التغبينة نحيد ليك راسك .. ماتبقايش ديري ليا داكشي ديال الافلام .. *
دخلت وجريت لبيتي .. تلاحيت و عنقت المخدة و وبديت نبكي على الحظ الاسود لي عندي ... مكونة بلاصتي حتا كانسمع واحد التزغريتة
*يويويويويويويويويوويويييي
نقزت .. ماكون هير ماما هادي .. حيت كاتزغرت بحال الصونيت ديال المدرسة ... نزلت بالحفا ... شادا جلايلي .. تانتخيل راسي لابسة الصاري و فالصراحة انا لابسة هير العباية ديال ماما .. لحقت عليهم فالصالون
كانت خولة لي هي ختي الكبيرة واقفة مع ماما .. و ماما شادة ليها فيديها ... وكاتكول *الحمد الله بقيت عايشة تال هاد النهار .. *
جريت ..*مادا ..من ..متى و كيف؟؟*
ضارت عندي ماما و الابتسامة على وجهها ...*خولة ختك .. أمين غايجي يخطب فيها ..*
حسيت بواحد الفرحة .. و اخيرا عرس فالدار ..من بعد زمن طويل من العنوسة و الكئابة ..*اجي لهنا نبوسك ..*
بدينا كانتعانقو ..*و على سلامتو .. تال دابا عاد زعم .. * بدات ماما كاتنغز فيا .. ضحكات خولة وكالت ..*عقبة ليك ا هدى..*
هي تكول ماما ..*احياني أ بنتي .. شكون غايديها فشي وحدة عايشة ليا فعالم و أرض بعيدة علينا ب الالاف ديال الكيلوميترات ..*
ضرت عند ماما ..*واش نتي معانا و لا مع غانة .. مانا على تحطيم المعنويات .. مالي أ ماما .. اش فيا خايب ..*
*نهضر ولانكول..*
بدات خولة كاتبرد ف ماما ..و انا نكول ..*الا هضرتي هيا الا كلتي..* كلست فوق الكرسي ..*و الله ا مادام تاتكولي اش فيا خايب ..*
حطات المغرفة و تنهدات وغمضات عينيها .. هزات يديها و وركات على صبعها الصغير ..
*اولا ...داك الشعر طويل تال فينما بغا .. وديك الضفيرة و الفرقة لي كاترجعك لزمن بيض وكحل .. كاين ابنتي لي كايدير الفرقة فزمن ولا فيه السيشوار ...والبابيليز... هادي وحدة..*
يالاه بغيت ندير الهجوم المضاد هي تعطيني ضربة من جديد ..*ثانيا .. كاين شي حد كايلبس سراول ديال الثوب مزيرين من لتحت و يدير شي حاجة طويلة عليهم ... كاتولي كي لوقيدا .. يا ايما تستري كولك .. يا ايما لبسي شي حاجة مقادة..*
*ياك ا الحاجة..*
*ايه .. و داك الشان لي كاديري فعنقك و كاترديه اللور ..ماخفتي حد يضربها لوالديك بقجة .. ؟؟ *
بيساتني الام ديالي ... عكراتني .. و حطمات ليا المشاعر .. جمعت الوقفة ..وبداو الدميعات كاينزلو .. *دابا يجيب الله لي يبغيني كيما انا.. *
هي تشوف فيا ..*اوهوي ا بنتي .. الرجال عندنا حرشين .. ماكايبغيو شاي هادشي لي فييك .. *
بديت كانتفقص .. هدرت الوالدين قاصحة و ماكاتنساش.. مشيت لبيتي .. وسديت عليا ...وبديت كانغلا ..*ملي؟؟اش ناقصني ... مال الهنود ماشي ستيل ..*. باقي كانغلا هي دخل خولة ..
*هدى .. واش كاين شي حد كايتقلق من هدرة ماماه..*
بقيت ماكانجاوبش .. هي تكول ..*واش بغيتي تكوني مقلقة نهار فرحة ديال ختك ..*
بقيت كانشوف فيها .. و انا نعنقها ..هي تبتاسم ..*نتوما الهنود سبحان الله قلبكم هشيش و طيب ..* زد كانضحك و بدينا كانخلقو السعادة
من هنا سيمانة ... لا من هنا 3 يام .. غدا الخطبة ..ماما وجدات ما الد وطاب .. عاونوها الجيران و الحباب ..وكولشي كان تمام .. من الصاب كون كان بابا الله يرحمو يشاركنا هاد الفرحة ...
صباح الخطبة ...عيطاط عليا ماما ..*هدى .. سيري شوفي ختك فين وصلات فالكوافورة .. و الى جيتي سيري بدلي ..*
مشيت لحقت على ختي ..ورجعت للدار .. طلعت بالزربة و جبدت حوايجي .. هادا غايجي مع هادي .. لا .. وندير هادي تاهي ... بعد وقت طويل من المفاوضات خرجت بنتيجة هائلة .. نزلت عند ماما ...
كانت دايزة للكوزينة ..وشافتني فالدروج ..هي تشهق...*هييييييييييييييييي
خلعانتي ..*ا ويلي يهديك الله يا الست الوالدة ... اش درت؟*
*واش ا القردة كاين شي حد كايلبس هاد الكسوة الحمرة تال الركبة و يلبس معاها كولون ف الزيتي .. و يدير شان مدوزو من كتفو و عاكدو فجنابو .. ضوري ضوري .... اويلي اعباد الله ..معلقة ليا مشموم ديال الورد فشعرها .. اويلي واش ندب هاك ولاهاك .. غبري .. غبري لبسي قفطانك ولا نفلقك بهاد التيمومة .. وديك الضفيرة ليوووووم نكرد بابها *
بديت نخصص...*و لا ولا ..مالو هادشي انا عاجباني هادشي لي لابسة..*
بالفعل هزات التيمومة ...*واش نتي كالسة ليا فنيو ديلهي ... واش كالسة ليا مع اميتاب باتشن ..غبري ا الهيشة ...*
طلعت لبيتي ... بديت نتغبن بدلت حوايجي .. لبست داك القفطان لي جاني كي الخنشة ..ما عنديش المقومات المناسبة لهاد النوع من اللباس .. كان نبان كي شي قنية .. نزلت شافت فيا ...بنص عين ..*اجي ...*
بديت نبعد..*اوهوي .. حيدي المقص ..*
*اجي ولا نجي ..*
بديت نزاوك لعاااااار لا ..*
جراتني من شعري .. حلات ليا الضفيرة و طلقاتو ... *دابا كاتباني كي شي حاجة .. يالاه سيري تبتي تانعيطو عليك..*
كونت فواحد القنت ... تاوجد كولشي و الناس قربو يجيو .. طلعت للبيت مع ختي ...سمعنا الدقان ...
*هدى قلبي كايضرب ..*
*زدتي فيه .. تاديري بحال يالاه غاتشوفيه .. راه 3 سنين نتوما بجوج..*
خشيت راسي فالشرجم كانبركك *شوفي ... راهوا امين ..وهاديك مو .. اجي ... شكون هاداك؟؟*
خشات راسها فالشرجم ..*ايييه ...هاداك .
*هاداك هشام...صاحب امين من روح لروح .. *
بديت نبركك .. اصلا مابانش ليا مزيان ..بقيت تانشوف هير صلعيتو ... الصراحة كان عندو الشعر هير انا محملتوش من اول نضرة رأسية ... بقينا حتا عيطو علينا .. الصراحة انا هير حاشراه صحة .. دخلات هي هازة الصينية ..*هاهيا العروسة ..*
بداو الهتافات ..*تبارك الله تبارك الله ..*
وانا تابعاها ....كانطل ونبركك نشوف اش جابو... هادا امين ... هاديك ماماه ... هاداك دااك بوقال ...
بلاتي بلاتي .. هاد الكمرة مسجلة عندي فالداكرة .. ولكن الصورة مسجلة عندي بالمقلوب...
بديت كانحقق فيه .. كانقرب منو ..وكانصغر فعينيا و كانخرج عنقي ... شي شوية بديت كانميل فراسي .. باش تنطابق ديك الصورة المقلوبة لي عندي فعقلي مع الصورة ديالو .. كولشي بدا كايحاول يفهم اش كانصنع .. ماما كاتجر ليا فجلايلي .. *هو .. و الله تاهوا .. هاداك ميخي لي عطاني ديك النهار ديك الدقة بالموطور..* بديت نتمتم ... و هو مخرج عينيه .. مخلوع ..
*جيتي برجليك تال الدار ... شوقيتيها .. قفرتيها .. *
بدات مامات امين كاتصلح الموقف ..*احم احم .. هادي ماتكون هير لالة هدى ....*
شفت فيها بالزربة و عاود كانحقق فداك الوليد ..*هيا انا اخالتي ..*
جراتني ماما بالفن .. كلست ..هي تكول ليا ..*كاع لي نقزاتو المعزة فقرون الجبل تخلصو فدار الدباغ ... كولشي غايخرج من ديك الضفيرة ..*
حسيت بالضو .. ماشي من ساعقة الخبر .. و لكن من القرصة ديال الست الوالدة .. تبت و تكمشت ولكن بقيت تانحقق فيه .. حيت متاكدة بلي هو لي ضربني .. بداو يهضرو .. شي شوية هو يوشوش فود ن امين .. هو يشوف فيا امين ..*هدى واخا توري لهشام فين كاين الحمام..؟؟* الزمر واش ماعندوش حمام فدارهوم
ااااااه... فرصة باش نتاقم ..بتاسمت و كلت ليه ..* طبعا .. *
خرج داك ميخي .. سبقني ولبس صباطو.. تبعتو .. هو يكول .. ياك الحمام ..هو الدوش عندكم .. ياك فيه الطواليت ..*
ضرت عندو .. و درت نضرة بليدة ..خنزرت فيه ..*لا عندنا الطواليت فالصالون .. ولا عرفتي شنو .. ماعندنا كاع .. تانديروها فالكوزينة .. اش هاد السؤال البليد؟؟*
تزنك ..و انا تبدا كنتعلا على قرون صباعي و نطل عليه ..*نتا هو داك المتخلف لي ضربني ديك النهارات ..*
بعد وجهو ..*نتي لي غادية كاتعوجي ..*
*هاااااا .. عتارفتي .. شتي .. حافاك الله حتى وليتي كاتجي عند هاد الاشكال للدار .. يالاه سربينا .. و عندداك توسخ لينا طواليتنا .. *
السيد تزنك .. و أنا فرحت منين حرجتو بديت نشطح بجنب و نحرك راسي .. حسيت بنفس النصر لي حس بيه أكبر فاش غلب فالمعركة .. ففيلم جودها أكبر ..
رجعت لبلاصتي .. مهي الا دقائق حتى جا الجاني .. وكلس تايشوف فيا شوفات الغدر .. متأكدة بلي كايتخايل بلي كايطحني برموك .. ماشي هير الموطور ..
سلا كولشي على خير .. و انا كنت فرحانة حيت فديت ثأري ... بالفرحة كاع .. سهرت على واحد الفيلم فيه 4 ديال السوايع .. ديال امير خان ... وصل نهار الحنا ..
و هنا تعرضت لاكبر اهانة فحياتي
نهار الحنا .. كنت حاشراه كي ديما .. مصدعاهوم على الحنة ..حيت كنت كانحماق عليها .. وكانحاول نفارد بخالتي مينة النقاشة باش ندير ما بغيت..حيت ايلا عاقت بيا ماما ماتخلينيش ...
جريت خالتي مينة و وشوشت ليها ...*خالتي .. بغيتك ديري ليا النقيش الهندي..*
شافت فيا ..*كيداير ابنتي؟؟*
عطيتها يديا ..*هانتي .. كايكون مشارجي .. وكايفوت ليدين شويا .. يقدير يقرب للمرفقين .. والصباع ماكايتنقشوش .. ولكن كايتصبغو بحنا ..*
و كال واحد الصوت من مورايا ..*ولا عرفتي شنو ا ختي مينا .. حني ليها تال الكتاف .. و صبغي الحناك بالحنا ..*
ضرت لقيت ماما دايرة يديها على جنابها و مطلعة حاجب و منزلة لاخور ..*فين عمر البنت كاتنقش يديها بجوج ... و كاتصبغ يديها بالحنا .. منين جايبينك؟*
بديت نخصص..*واش تا الحنا فيها الحكام .. وا خليني ندير لي بغايت ... مادويش معايا .. *
هي تكول..*ديري لي بغيتي و غانكرض دوك الصباع و نديرهم ليك فالصوبا تشربيهم ..*
تكمشت و نقشت هير صبع واحد و مابغاتتش تصرت ليا ... خليتهم تا غفلو و هربت بزلافة الحنا .. و طليت النص فصباعي ... كانتخيل راسي بحال مناسبات الحنا الهنديين .. لي كايكونو العيالات شادين الطبول و كايعزفو موسيقا زوينة ... و الناس كاتشطح بسعادة و هناء .. الصراحة ماكاينش فرق بيناتنا .. ايلا عندهوم هوما الطبل حنا عندنا البندير و الطعريجة و الدربوكة ... و الناس كاتشطح .. الموهييم .. شطيحنا فيه شوية ديال العجب .. عافاكوم .. بدون تفاصيل ..
نهار العرس.... كاع الناس فجيه وانا فجيه .. الريتم فبلاصة و انا فبلاصة اخرى .. لبست و مشيت للقاعة قبل ماتشوفني ماما ...
كي دخلات تخبيت .. كانطل من بعيد .. عرفتها كاتقلب عليا ..
ساع ديك عيشة بنت لا مينة ... فضحاتني تفو ..كالت ليها .. راهيا .. مشيت حادرة راسي ... هي تكول
*اييه ... الحلقة فالنيف .. فوتناها .. واخا كاتباني كي الثور .. كلنا ماكاين باس ... شعر دايرة ليه لابانان ... كلنا ماكاين باس .. لابسة كاع دبالج السوق .. درنا بحالا ماشفناك .. دايرة حلقات ثقال بيقطعو ليك ودنيك .. سوقك هاداك .. ولكن ديك التكحيلة ماندوزهاش ليك .. مكحلة عينيك من فوق و تحت و دايرة الدهبي .. غاتحيديه قبل ماندير لبنتي الزرق فعينيها .. *
مشيت كانتغبن ..نقصتو شوية .. شي شوية دخل الزغاريت .. و من طابيعة الحال كانه هشام حدا امين ... شافني و تصدم .. مافهمتش واش جا معايا داكشي ولا تصدم حيت كانبان خايبة ..
الموهيم .. تكمش بلاصتو .. و العرس كولو و انا كانشطح على هواي ... كاندير داكشي لي فراسي .. و كنرمق نضرات الاستهزاء ديال الناس كولهوم بدون استثناء .. و لكن من الشيم البليودية .. ندير داكشي لي بغيت و ماسوق حد ..
فاش قربات خولة تخرج .. كلفاتني ماما بواحد التقليد .. هو انه نكب الما فالارض منين ختي تمشي فحالها .. كالو حكا و الواد .. باش يفيض الخير و الخمير ... انا خارج من القاعة هازة السطل .. بان ليا امين واقف هو وهشام حدا الطوموبيل كايتسناو خولة تخرجها النكافة ... دايرين يديهم فجيوبهم .. قربت ليهوم و انا نسمع امين ..
*عقوبة ليك ا صاحبي حتا نتا .. دير دارك و وليداتك ..*
ضحك و كال ..*وايلي ا صاحبي .. لقينا بعدا المدام باش نديرو الدار ..*
ضرب ليه امين على كتافو ..*هاهيا هدى خت خولة ... الزين والتباتة .. و يلا خديتيها راه انوليو عائلة كثر من صحاب ..*
زاد كيضحك بصوت عالي..*من نيتك أ عشيري .. ماباقي ليا هير ديك البنت ... اش أودي .. شوكيدايرة ....بدوية في باريس ..واش كاين شي حد باقي تايصبغ صباعو وقاع رجليه بالحنة؟؟*
حسيت بالسم .. ماعقت حتا دقيت ليه فضهرو .. دار عندي ..تصدم كثر مني .. و هزيت الصطل ... رجعت خطوة اللور .. و انا نكبو عليه .. هو ينقز ..*واش نتي حمقققققققققققققققققققققققق
امين تصدم ... زدت خلفة مع الطريق و فيا السم ... و البكية واحساس بالحكرة ..*مالي انا .. مال الناس ماكايامنوش بالاختلاف .. كال ليك شوف كي دايرة .. شاف راسو بعدا كي داير ..بنادم .*
تفاديت نبكي باش مانخصرش أجواء الفرحة لي فالقاعة و بررت دوك الدمعات لي نزلو ...بدموع الفرحة من اجل خولة ... من فراقها و من غيابها .. هو .. ماباقيش شفتو .. و حتا امين كان كايشوف فيا بنضرات .. كايحاول يتدارك الخطأ لي دار صاحبو ..كايبتاسم ليا .. و كايرمقني بنضرات فيها نوع من الاحراج و الخوف
من بعد العرس مباشرة .. ماكان عندي تا خبار عليه .. غبر الله يعطيه غبارة .. الصدى ديال كلامو كايتردد فالداخل ديالي .. كول مرة كانشوف الحنة و راسي كانتفكر اش كايضنو فيا الناس .. كانحاول نصبر راسي..لان تاواحد ماعندو الحق يتحكم ليا فداكشي لي كاندير ..
بعد أسبوع .. ضورات ليا خولة .. وخبراتني بلي أنها عارضاني للغدا عندها .. فالاول ترددت نمشي .. مابغيتش نطيح فشي موقف خايب مع امين .. ولكن قنعاتني ماما نمشي .. بالفعل مشيت .. فالاول لقيتها بوحدها فالدار ..
بقينا مجمعين كانتعاودو..و استنتجت أنها مافخبارها والو على لي وقع ديك النهار.. سمعنا الدقان .. مشات حلات .. هي تعيط عليا .* هدى .. هدى .. اجي . *
مشيت لقيت أمين.. واقف حداه هشام .. وأنا نجر ختي ..*ماكلتيش ليا هادا جاي ..*
هي تشوف فيا ..*كاديري بحالا ماعجبكش الحال ا شويطينة ..*
بديت كانخنزر .. كون سقتي ا بنتي اش كال فيا كون جريتي عليه بالشطابة .. سلم عليا امين .. وهو يمد ليا هشام يديه .. مبتاسم ابتسامة فيها تردد .. جمعت يدي عندي .. و كلت ليه ..*فيها الحنة ...* هزيت يدي .. وكلت ليه ..*شفتي صباعي مجلخين بالحنة .. *
تصدم .. بقا ماد يديه و انا كانشوف فيه ... تحرك .. جمع يديه .. و انا نكول ليه ..*عنداك تدوز من هاد البلاصة راه دزت منها .. وقاع رجليا فيهم الحنة ... * الصدمة كانت ثلاثية ..امين و خولة و هشام .. فديت دقتي ..
ضرت عند خولة ..*مشينا .. يالاه نوجدو الطبلة ..*
مافهمات والو و جراتني للكوزينة ..*واش نتي حمقة؟؟ اش دار ليك الولد .. واش سحاب ليك بحال الافلام الهندية اديري ليه هاكا عاد يقدر يبغيك..*
نطرت يدي ..*و شكون كال ليك انا بغيتو يبغيني .. اصلا هادشي لاش كاتخططو .. و سيري سولي راجلك اش كال هاداك على ختك و ديك الساع شوفي على من غادافعي ..ولا عرفتي شنو .. خليني نمشي لدارنا حسن .. *
هزيت شالي و درتو و خرجت كانجري من الكوزينة .. بدات كاتغوت* هدى .. بلا فعايل الدراري الصغار .. اجي لهنا ..*
ماسمعتش منها ... مشيت كانجري .. حسيت بشي حاجة قبطاتني من الشال ... حبسني .. شلت حركتي .. .. وقفت .. تحبسو ليا انفاسي ...
درت نفس عميق .. مشهد بليودي .. نزلو ليا جوج دمعات .. درت واحد الضورة شعري تلوا فيها بحال الاشهارات ديال الشمبوان ... ضايرة و سادة عينيا ... و كلت بصوت خافت ..*خليني عافاك..*
ضرت لقيت الشال .. واحل فواحد البوانيي مهرس ... لقد كانت حرقة قوية ... حيد الشال عاد سمعت خولة جاية تابعاني .. لبست صندالتي و حليت الباب ..
*أمين .. اجي عافاك ..*
خرجت و خليت الباب محلول باش مايتعطلوش ايلا بغاو يتبعوني .. تبعاتني مسكينة ختي خولة و أمين و خرج داك الحتروف حشم يبقا بوحدو فالدار ..
*هدى وقفي بلا بسالة ..راه ماكاين فين تمشي ..*وقفت و بقيت عاطياهم بالضهر .. جات خولة ضوراتني ..*مالكي .. ؟؟*
جرها امين و كال ليها ..*خولة .. يالاه انا نشرح ليك ...*
داز و كان هشام واقف بعيد .. مشا عندو وشير ليه براسو باش يجي عندي .. واقفة .. وانا نسمع ..*هدى .. انا؟*
ضرت .. هازة حاجب و حاطة لاخور..*شكاين ..*
*انا ديك النهار..ماقصدش ديك الهدرة .. *
*اها .. واشناهيا .. /شوكيدايرة/ .. مالي بنت ليك كائن فضائي ات من كوكب زمردة .. زايدون دوك لي كاضحكو عليهم لااه حضارة على قدها .. و ثقافة غنية ..ودوك الاعمال شاهرين بيهم بلادهم .. طفروها المغاربة لي كايديرو افلام بلا نهايات .. *
بقيت كانهضر هو كايشوف ليا فشعري .. نضرات غريبة ... اش هاد البرودة .. انا كانكشكش عليه هو كا يتأمل ليا فشعري ... كايشوف بحالا عمرو شاف شعر كحل و طويل ..
شيرت ليه بيدي ..*كانهضر معاك..*
شاف ليا فعيني و كاتل ..*هدى..*
*شكاين .*
*شي حاجة
*شي حاجة فشعرك ..*
بديت نقز .. فين .. كيفاش ..
*وا بلاتي خليني نحيدها ليك .. *
حلفت و لا نزكا .*حيد يديك .. ماتقيسنيش..نتفتيني .. ويك ويك ..*
*صافي هاهيا .. واحد الحاجة لاسقة .. ماعرفتش اشناهيا ..*
بديت نكر ..*صافي حيد .. *
شاف فيا ..*ماقصدش .. سمحي ليا .. اصلا نتي حرة تديري لي بغيتي..*
و انا نقز *و على سلامتك منين عرفتيها و فهمتيها ..*
*واصلا هادشي جاي معاك ..وجاي مع شخصيتك..*
تعلقت باش نوصل ليه شوية ... و نيشت فيه..*ماتحاولش .. ماتحاولش تخلق معايا السعادة .. فهمتي؟*
تخلع ...*صافي سمحي ليا .. انا مابغيتش ختك و حتا نتي تاخدو موقف مني .. داكشي لاش من الاحسن نرجعو نتغداو .. باش نفكو هاد المشكل ..*
شفت فيه ..*هادشي كانديرو على ود ختي اما نتا منك ليها .. *
بقينا غاديين بشوية ...انا مربعة يدي .. ومغوبشة .. وهو يديه فجيابو .. سكت هو يكول ... *ادن كاتعرفي تشطحي مزيان..*
ضرت عندو ..*ياك كلت ليك ماتحاولش تخلق معايا السعادة ..*
دار بحالا ماسمعنيش .. هو يزيد يكول..*و الناس المولوعين بهاد السينيما كايكونو رومانسيين بزاف .. *
ضرت عندو ..و وقفت..*دابا لاش بغيتي توصل؟*
شاف فيا ..*للدار عند امين وخولة حيت فيا الجوع ..*
خنزرت فيه ..و تمتمت .. *تاكل جنابك ان شاء الله .. *
وصلنا للدار...صونا و رجع اللور .. حيت عرف خولة غادي تبوقلو بشي مغرفة .. حلات مخنزرة .. شفت فيها و تبسمت ..*خوخة .. تحل الموشكيل ..*
طلعاتو وهبطاتو .. و دخلنا .. فالاول كان الجو مكهرب ... ولكن تطلقو الوجوه شوية ..
كالسة كاناكل هو يكول ليا هشام .. *عافاك ا هدى واخا تعطيني كاس د الما..*
وانا نهز يدي و وريتها ليه .. فكرتو بلي فيها الحنة لي كايعايب ..هو يكول*ماشي المشكل .. الحنة من الجنة ..*
جاني الضحك .. فهم الميساج .. قدمت ليه كاس د لما بحنان .. من بعد هادشي .. ولينا عاديين .. تالقينا راسنا فالاخر كانموتو بالضحك .. شادين فبعضياتنا .. كولنا .. ناشطين ..
عاونت خولة فالجميع .. وحتا امين و هشام عاونونا ... هوما خرجو للقهوة وبقيت مع خولة .. مشات هي باش تاخد دوش .. شعلت انا التلفازة .. ودرت زي أفلام ..محبوبة الجماهير و لقيت واحد الفيلم ...غرقت معاه تاوليت كانتخايل راسي انا لي لابسة كسوة كانجري فالهضاب و التلال ... وكانشطح بحرية مع الكلاب والمشاش بلاما يعضوني ... و كانتزعلل ف واحد الشجرة ..ماحسيت براسي واحد اللحضة حتا جهدت الصوت 100 درجة ..مابقيتش كانسمع خولة لي كاتغوت باش نقص .. واحد الاغنية .... وقفت ..
قاديت البوزيسيون ... جمعت شعري .. و سديت عينيا كانتخيل راسي لابسة صاري ... و بديت كانشطح كي كادير الممثلة تماما ..وكنردد شي كلمات حفضهوم من الاغنية كثر ماتعاودو ..واحد اللحضة سديت عينيا و ضرت بجهد .. ماخرجت هير فأمين و هشام واقفين حالين فمهم ... كانو عندهم السوارت .. دخلو وشافو لي شافو .. امين زاد كايضحك مشا وخلا هشام مصدوم و انا واقفة كانتنفس بصعوبة من كثرة السخفة ديال الحركات .. هو كايشوف فيا حال فمو ... نزل ليا شعري على وجهي .. بديت كانجمع شعري .. و كانشوف فيه .. باقي حال فمو
*مالك؟* سؤال شحال بليد .. بحالا ماعرفتش مالو .. اش غايكون مالو .. صدمو بلي انا كانعرف هاد الحركات .
*واو..*
هزيت حاجب و حطيت لاخور .. شاف فيا و كال *كاتعرفي هادشي كولو .. واو .. زوين هادشي بزاف .. *
قاديت حالتي وبقيت كانشوف فيه ..*ما بقاش تخلف و رجعية؟*
جاوبني ..*عمر الفن كان تخلف و رجعية .. ونت يراك موهوبة ..*
خنزرت فيه ..*راه كلت ليك ماتحاولش تخلق معايا السعادة ..*
ضحك وكال
*ماكرهتش نولي نشطح هاكا ..باش نشطحو بجوج ..*
حققت فيه ..*كاتحرش بيا فقاع دار ختي .. أدوي؟؟*
رجع خطوة للور .. و تخلع ..*لا لا والله ماقصد هاكا ... انا .. انا .. هير كلت ..*
بديت نشوف فيه ..تيحمار و يخضار .. *صافي صافي .. ماكلنا ليك والو ..*
كال ليا ..*عافاك ايلا خرج امين كولي ليه انا كانتسناه برا .. * حدر راسو و مشا مطأطأ الرأس .. مزنك مسيكين
يالاه .. شحال من مرة حركتو .. فديت دقتي بامتياز .. كلست كملت الفيلم .. بيدما خرج امين ..ماحسيت بحتا شي احراج .. اصلا ماكنت كاندير تاحاجا عيب .. هير كانلوز ...صاااافييي ...
*امين .. كايتسناك صاحبك على برا .. *
زاد كايضحك ..*دوختيه مسكين .. تا خرج ياخد ليه شوية ديال الهواء ..* زد كانضحك ..
مشا ... حل الباب.. و خلاه محلول ..ومن باب الفضول تبعتو بلا مايعيق .. باش نسمع ما يدور وراء الأبواب ..
*دخل ا صاحبي ... مالك براني .. *
*امين .. مانقدرش .. ماغانحيدش عيني عليها.. و غتبرزط البنت..*
سمعت امين زاد كايضحك..*و مالك ا صاحبي تدوختي لهاد الدرجة..*
*و ماشفتيش عللى رشاقة ا صاحبي .. و خفة .. و شعرها كي كيتماوج .. و الابتسامة لي كانت فوجهها .. بالسيف ماندوخ..*
و حيت انا هيشة و عبيطة..طبعا .. بلاصة مانمشي حسي مسي .. ضربت واحد الفاز قدامي هو يطيح..مافهمتش لاش قبستو تقبيسة الكابتن ماجد .. و ضارو بجوج ..
*وهيا ناري .. واهيا سيدنا الماليك .. شغاندير .. مالي بهلولة .. *
*خولة .. هادي نتي ..*
سمعت هشام كايكول ..*سمعاتني ا صاحبي.* سمعت خطوات امين جاي جيهة الباب .. حلو ولقاني محدورة كانجمع داكشي لي هرست .. ودرت راسي بحالا تفاجئت منين شفتو..*اه .. امين .. هادا نتا..*
زاد كايضحك ..ضار عند صاحبو .. وغمزو ..*ايلا حضر الما .. كايترفع التيمم ..بيناتكم ا بيضاوا .. *
مشا وخلاني .. لا .. اجي فين غادي .. هزيت الفاز المهرس و تميت غادية هو يعيط عليا ..*هدى .. *
ضرت عندو ..*نعام؟*
تقدم عندي بخطوات متباطئة ..وقف قدامي بقيت مخرجة عينيا كانتسناه اش بغا يكول
بقا شحال كايشوف فيا ...و كلت ليه ..* ياكما شي حاجة فشعري تاني ..*
ابتسم ابتسامة ساحرة ..*لا ... ولكن
*لا ولكن ..نتي ..نتي ..*
خرجت عينيا ..*مالي انا ..*
*واش تفرجتي ف الفيلم ../كوش كوش هوتا هي/..*
خنزرت فيه ..نواني .. سحابلي غايكول شي حاجة مفيدة ..خنزرت فيه ..*اييه علاش ..؟؟*
بقاكايضحك كي البهلول ..*هير سولتك ..*
هزيت كتافي وضرت بغيت نمشي فحالي .. هو يكول .*لا .. الصراحة كنت ..كنت..* بدا يتمتم ..و يتزنك .. بحالا بغيت نقجو .. بديت كانشوف فيه ... *نتي فعلا بنت زوينة ..*
قربت ليه لوجهو وكمشت عينيا ..*ومالك من الصباح ونتا كاتعصر باش تكول هاد جوج كلمات..*
بقا كايشوف فيا ..وانا نكول..*اجي ..ولا نتا من دوك لي كايخافو من البوح بالمشاعر للعنصر النسوي؟*
تلف ..*شكون؟؟ انا؟؟ ...لا .. المشاعر .. لا ..*
زدت كانضحك ..*على كل حال . شكرا على الاعتراف ..*
مشيت وخليتو.لحت داكشي فالزبل و ستاعديت باش نرجع فحالي للدار .. دزت للصالون وانا نلقا خولة و امين كايشوفو فيا وكايضحكو...درت بحالا ماطرا والو ..*امين خويا ..واخا توصلني للدار ..*
شدات ليه خولة دراعو..*شناهوا .. ماعند راجلي فين يمشي .. سيري قلبي على شكون يوصلك ..والله تا زينة .. سيري راه هشام عندو الطوموبيل يوصلك .. *
بديت نخنزر عرفتهوم بلي هادا هو الهدف ديالهم .. مافيا لي نتصادع .. مشيت عند هشام ..*عافاك وخا توصلني ..*
السيد وقف و بدا يقلب على السوارت ..*على راسي و عيني .. *
صدماتني الحنية و الادب لي ولا فيه .. سلمت عليهم و مشيت .. الطريق كولو هو ساكت .. تا وصلنا الضورة .
.هو يجبد البورطابل و بدا يلوي فلسانو ..*هدى .. كلت زعمة ايلا بغيتي تكتبي ليا نمرتك .. زعما شي نهار تبغي شي حد يوصلك . ولا لا قدر الله تبغي شي مساعدة..*
شفت فيه بقنت عيني ..*ارا لهنا و كان .. ارا كالك المساعدة .. هير هو ماتصدعنيش ب لي ابيل .. هير لي ميساج ..*
ترسمات ابتسامة خفيفة على وجهو ..*كوني هانية .. *
نزلت و واحد الفرحة فشكل لابساني .. دخلت للدار سلمت على ماما هضرنا و طلعت لبيتي ..تكيت ..ومافهمتش لاش بديت كانتخيل راسي انا و هشام كانشطحو على أنغام Aa Re Pritam Pyaare
ناري ..ويلي ..لا ... شوية وليت كانتخيل راسي انا لابسة صاري ودايرة دبالج الهند كولهوم والطانكة فالمنخر لي ملاسقة مع الودن ...و هولابس سروال ديال الثوب باط ديليفون ... و داير موستاج يشطب بيه الحومة و عاكد راسو .. بديك الرزة العجيبة ..كانجري هو كايتبعني ..كايشد الشال و كانهرب مازال ..وزعما كانكثر علييه .. بلبيان .. فوق التلال والهضاب ..وكاع الناس ديال ديك البلاصة كايشطحو بحالنا ... وحنا فرحانين ..جاني الضحك ..علاش هو بالضبط حاولت نغشم راسي و ندير بحالا ماواقع والو ..ولكن شي حاجة كانت فالداخل.
فقت فرحانة بايتة كانشطح..بايتة ناشطة .. حليت التيليفون .. شفت فالفون د يكرون .. التصويرة ديال شارو .. حسيت بلامال .. تنهدت .. ساعة بان ليا واحد الميساج .. كلت ماكاين مايدار و الله تانحل نقراه ..
*صباح شاروخان وكاجول .. صباح هيريتيك روشان و برينتي زينتا ... اميرخان و بريانكا شوبرا...*
جاني الضحك .. كلت والله تانجاوبو ...كتبت ليه ..*شحال استغرقتي باش تعرف سمياتهم؟؟*
جاوبني ..*ماكنتش عارفهم ..ولكن لي عارف بلي شي نهار غانزيد فداك الميساج..صباح هدى و هشام..*
قلبي بدا يضرب .. وحسيت بالفرحة..ماقدرتش نجاوب .. واحد عشرة الدقايق ..هو يعاود يسيفط ميساج ... *الفرق بينا وبينهم ان حنا ماغانكونوش تمثيل .. شفتي .. راه ماعنديش مشكل مع البوح بالمشاعر ..*
جاوبتو..*الثقة فالنفس حاجة صعيبة ..*
ماجيت فين نسيفطو حتا ضور .. *الو ..*
*سمحي ليا .. ماكنتش بغيت نضور ولكن هادشي ماكايتكالش ف الميساجات ...*
بقيت ساكتة هو يكول .. *مافيها باس ايلا تعطاتني الفرصة مع الفتاة البليودية الفاتنة ..*
*هشام .. زربتي عليا .. شكون كال ليك انا بغيت ..*
*معروف على الهنود ماكايردوش الحب .. فوجه المحبوب .. واتواضعي و خليني نبين مشاعيري ..*
الصراحة حق سيدي ربي تا كنت فرحانة ... ماعرفتش .. الموساميحةعلى مافات .. حتى انا تبارك الله ماقصرتش .. رديت ليه الصرف ...
بقيت ساكتة هو يكول *السكوت علامة الرضا..*
درت ديك الحشمة الزائفة ... *يكون خير .. يالاه نخليك دابا .. سديت التيليفون و عنقتو .. و نض كانرقص على انغام Agneepath
الشهيرة ... انا فرحانة .. واخيرا لقات الفتاة البليودية الفتى البليودي ... ايعيشو في سعادة و بنين و بنات وداكشي ...
هاد العلاقة لي بدات اليوم... تطورات .. وتطورات تا ولات قد مومباي .. .. تكللات بواحد الارتباط جميييل جدا .. دام و مازال كيدوم ...حاجة مبنية على الصح و المتانة .. الثقة فالوثيقة ا حبيبي....الصراحة كان و مازال من ديما كايستمتع بالرقصات المبدعة لي كانقدم ....
ا ودي .. الله يلاقينا مع ماحسن منا...
العبرة.. الله يرضي عليك ا اختي تعلمي الرقص الهندي .. لا لا ماشي هي هادي العبرة العبرة هي تبغي راسك كيما نتي ..ماتحاوليش ترضي شي حد ..كيما كالو..كولا قمح عندو كيالو ...و كولا فولة مسوسة كايجيب ليها الله غراب عور ... بني شخصيتك كيما بغيتي .. وماتحاوليش تأقلمي مع الناس ..و تقدمي صورة زائفة لي ماكاتمتلكش .. بقاي كيما نتي .. و ايلا مافهمش و ايلا مابغاكش كيما نتي ..
النهاية