في دوار الوافي كانت تتسكن فيه واحد البنت سميتها السعدية وكانو كاع مالين الدوار مسميين عليها السعدية الهبيلة..حيت كانت هبيلة لواحد الدرجة كبيرة ..ديك الظرافة ديالها اللي وصلات لدرجة السذاجة خلات كلشي يسمي عليها الهبيلة..
كانت " السعدية " تتسكن مع مها " مليكة" كانت طيابة في عراسات الدوار..وباها "بوشعيب" كان فلاح ..مقابل أرضو بيدو..
وكان عندها خوها صغير عندو 5 سنين..
السعدية كان عندها 17 عام قرات حد السادس وخرجات ..تقابل خوها و تعاون مها في الدار و في العراسات اللي تتمشي ليهم..
السعدية ماعطاهاش الله حقها في الزين داكشي لاش كانو مالين الدوار تيضحكو عليها و يشدو فيها..
وواحد النهار كانت خارجة من الدار تجيب شي سخرة لباها..شعرها مشعكك و وجهها حالتو ولابسة سندالة مقطعة..وحوايجها موسخيين..وهازة واحد العصا وغادة للحانوت..وفاش كانت راجعة للدار..داز حداها " ادريس" بالموطور..103..ادريس اللي كان هو فارس أحلام السعدية..كان تيسكن حداهم ماخدام ماردام تيعاون باها في الحرث..وتيبريكولي مع مالين الدوار..
ادريس: وااااااا السعدية واتتي كيدايرة؟؟
السعدية: (واخا حالتها حالة..بدات تتقاد ف شعرها وهو والو شاد الريزو..) السي ادريس بخييييرو؟
ادريس: لاااااا والو باس..أيوا سلمي على پاك الله يعاون..
السعدية: تدوز بخييير آسييي دريس..
مشات السعدية للدار وتتنقز بالفرحة ماقاداها فرحة حيت دريس قاليها السلام..مللي دخلت لقات مها تتوجد باش تمشي لشي عرس في الدوار..
مليكة: واااه ها ديك المسخوطة..دوزي وجدي لباك وخوك الغدا وعجني الخبز راني غايبة ليوم توال خيمة الدكالية دايرة العرس لولدها..وفاش تسالي لحقي عليا..
السعدية: وااامي راني عياااانة باغا غير نركد عافاك..
مليكة: واش غديري اللي قلت ليك ولا نرد ليك ظهرك رطب من كرشك..بشي هراوة..
السعدية: أويلي آمي !! واش انا ماقلتش ليك !!! راه ظهري رطااااب لي وولا رطب من كرشي والله العظييييم..
مليكة: ( هزات صندالة وتبعاتها وهي هاربة) واش غتدخلي للكوزينة ولا لا..؟
السعدية: صافي..صافي آمي هانا داخلة..غنكمل ونوصل عليك
مشات مها مليكة للعرس وهي بقات تاكملت الشغل عاد تبعتها..الحاجة الوحيدة اللي زادتها عليها هي واحد الجلابة محرتكة ...وفاش وصلت لقدام خيمة الدكالية مخلوهاش تدخل حيت حالتها حالة يصحابوها طلابة وبدات تغوت:
السعدية: وااااااامي واااا مااالييييكة..واتي آجي عدي را مخلاونيش ندخل تقول في الجدام!!..واتوما خليوني ندخل راني بنت الطيابة..
مشاو صحاب الحسنات وصلوها لمليكة..عاد جات تجري باش تدخلها..
مليكة: المسامحة..المسامحة..هادي را غي بنتي الهبيلة خليوها تدخل..
مليكة شدات السعدية من شعرها وقالتليها:
مليكة: ياربي على بنت عندي واتتي مالك دايرة هاد الحالة فراسك؟؟؟ مقديتيش تاتخوي عليك سطل دلما وتمشطي شعكاكتك عاد تجي..أويلي أويلي وحدددددي...
السعدية: مااااالي آمي !! راه اللي زين زيييين آمممي واخا ميعوم غيييير من تنين لتنين...
مليكة: وااااعباد اللله زيدي قدامي زييييدي حكلهم ميسميوك السعدية الهبيلة
مليكة دخلت هي والسعدية للكوزينة ومليكة بقات منوية ورادة مع بنتها البال لاتديرليها شي شوهة فهاد العرس..
بقات السعدية غير تدور فعينيها..وكل شوية تقوليها..:
السعدية: واممي !! خليني نهبط للعرس را تيعجبني الشعبي..بغيت نشطح..
مليكة: والله ومسكتي تنجمعها معاك بشي دقات تتولي تشطحي حدايا من حرها..
السعدية: شتي أممي!! نتي راكي مسمووومة ومتتبغيش لي الخير..
مليكة: أنا اللي مسمومة ولا نتي اللي ماباغاش تجمعي راسك وتكوني مرا ..را لالياتك عندهم 2 ولاد را حنا فلعروبية البنات تيتجوجو على 12 عااام ليصحابليك راكي باقا صغيرة..
السعدية: وا ممي!! راتانا باغا نتجوج وندير داري مالي معلياش الله؟
مليكة: بهبالك هذا ؟؟ محاااال أبنيتي
السعدية: وايله آممي خليني ندخل نشطح شوية. متعرفي نلقاه تما..
مليكة: شكوناهو آبنيتي؟
السعدية: العريس آممي،،
مليكة: أريلي ديك الشعكوكة نقادها ليك عاد سيري ..
ديپانات ليها داك الشعر شوية ومشات السعدية تتنقز بالفرحة..غير دخلت للعرس وبدا كلشي الدوار يضحك..هاهي السعدية الهبيلة..والسعدية ممسوقااااش تحزمت وبدات تشطح وكون غير تتعرف تشطح وغير تتنقز وتخربق والناس تيضحكو..الصراحة نشطاتهم بهبالها..
مللي وصل العشا حطو ليها هي ومها مع العيالات اللي تيعاونو تعشاو وسالاو خدمتهم ومشاو فحالهم ..مللي وصلو للدار..بدلو عليهم وطاحو دوووودة بالعيااا.تال الصباااح..
مللي وصل الصباح..فاقت مليكة تتوجد الفطور لبوشعيب راجلها..والسعدية خاااامرة بالعيا دلبارح..ومللي حطات الفطور قاليها بوشعيب:
بوشعيب: شتك درتي غا البغرير والخبز..فين البطبوط و الخبز الحار؟؟؟
مليكة: ايوا قضي أبوشعيب راني عيانة ليوووم..
بوشعيب: واخا ألالة ندوزوها ليك ليووم..
مليكة: المهم شوف أبوشعيب..اللي نطولوه نقصروه..انا را صافي هزيت الراية البيضا مع بنتك..
بوشعيب: مال ديك المزغوبة تاني اش دارت عاوتاني؟؟؟
مليكة: بحال ديما فنما تمشي معايا لشي قنت تشوهني..وليت غارقة فحوايجي..
مكرهتش شي حد ياخدها ويعطيني فبلاصتها ماكينة الصابون ..
بوشعيب: هههه واللهيلا أمليكة..ايوا هادشي اللي عطى الله أالمهبولة..را بنتك هاديك واش نلوحوها..
مليكة: وانت زعما راك بوها مالك أخويا متدبر ليها فشي واحد يهنينا منها وتلسق فيه ومنو لهبالها ..
بوشعيب: واتتي شكون غيبغي ياخد مرا هبيلة بحالها؟؟
مليكة: وداك دريس مالو ياك تيخدم معاك مرة مرة فلحرت ..بقا تشكرليه الدرية قدامو باش يبغي ياخدها..
بوشعيب: نوضي من قدامي دابا..واش نتي بعقلك ولا لا؟ واش باغاني نعطي بنتي للي يسوا واللي مايسواااااش..؟؟؟
مليكة: واااالمهم شغلك هداك هاهي قدامك لا ماداها حد نديروها قديد ونهناو..
بوشعيب: سيري..سيري فيقي الدرية وقضي شغلك واللي بغاها مولانا تكون..
مليكة: هاااهي نايضة..
مشات مليكة تتفيق فالدراري ..
والسعدية بحال كل نهار تتفيق شادة الريزو بداك الشعر لا متلات ففيلم دلخليع تطفرو ..ناضت و غسلت حالتها..وعاونات مها بحال ديما فالشقا
وهي تقوليها مها واقيلة يا ديك الدرية غانمشيو انا وياك توال خالتك فاطنة فالمدينة..شي سويمينة ونجيو..أش بانليك؟؟
السعدية: آه أممي باغا نمشي أنا ديني..
مليكة: صافي غنتشاورو مع بوك ونمشيو..
وداكشي اللي كان قادو أمورهم ومشاو عند فاطنة..فاطنة اخت مليكة مزوجة وعايشة في كازا عندها 2 بنات باقين بلا زواج وحدة سميتها سلمى ووحدة رباب سلمى متتحملش السعدية..
مللي وصلو
غير شافتهم سلمى بنتها الكبيرة عندها 18 عااام وهي تكحل بالعما..
سلمى: خالتي!!!جيتو؟؟
السعدية: لا باقي هههه راحنا جايين فالطريق باقي ماوصلنا هههه..
سلمى: ( ضحكت ليهم ضحكة صفرا) سبحان الله باقا أختي السعدية هبيلة..
مليكة: ايوا لاواه أبنت ختي واش غتخلينا واقفين حد الباب ؟؟
سلمى: (قلبت عينيها وعوجات فمها) ااه دخلو ..
دخلو وجات فاطنة تتعانق هي و ختها..
فاطنة: مرحباااااااا بيكم أخويتي شحال توحشتك شحال توحشتك زيدي زيدي مرحبااا..كيدايرة أبنيتي السعدية لاباس؟؟
السعدية: لاباس أخالتي تاحنا توحشناك وتوحشنا طواجنك..نيت انا دابا في الجووووع أخالتي بغيت ناكول..
فاطنا: إييه أبنيتي جلسو مرحبا..
وجدات ليهم فاطنة ماياكلوو وديك الهيشة ديال السعدية تتاكل بواحد الهيييف بحال الى عمرها شافت النعمة وبنات خالتها تيشوفو ويتعجبو..وواحد اللقطة بداو يتغامزو وهوما يتفركعو بالضحك عليها..
ومها مليكة بدات تقرص فيها باش تجمع راسها وتاكل كي الناس ..
السعدية: آاااااي آممي مالك قرصتينيييي اش درتااااو؟؟؟
مليكة: أنااا قرصتك ...اللله يمسخك كتر مانتي ممسوخة يا هاد البنت..
المهم كملو الماكلة وارتاحو شوية من العيا دالسفر..وفاش ناضو من النعاس..
دخلت عندهم رباب للبيت فين كانو متكيين..
رباب: خالتي فقتو؟ ارتاحيتو شوية؟؟
مليكة: إييه أبنيتي شوية الحمد لله..
السعدية ناضت مقلوبة وبغات تخرج من البيت..وهي تجرها مها..
مليكة: واش نتي باغا تفركعي لي مرارتي؟ واش باغا تخرجي هوكة قدام الناس تطيريها منهم خلعة بشعكاكتك..مشطي داك الراس عاد خرجي ولا نقطعو ليك ونخللي مك قرعة..
السعدية: واخا أممي..
المهم مللي خرجات السعدية من البيت لقات خالتها تتعمر أتاي وسولاتها:
السعدية: خالتي فينهم بناتك؟
فاطنة: راهوما فبيتهم أبنيتي..غير دخلي عدهم متحشميش..
دخلت السعدية وهي تلقى سلمى مكونيكطيا ولكن السعدية مغتفهمش اشنو داك العجب..
السعدية: ( مشاات دخلات راسها فالpc ) شنو هادا اختي سلمى؟
سلمى:(سلمى بغات تطنز عليها حيت عارفاها هبيلة) هذا اختي واحد الصندووق عامر ببنادم نوريك؟
السعدية: أويلي حي!! كيفاش دخلو هنا؟
سلمى: ياختي غير السخط كلما تيسخط عليهم شي حد تيدخلو هنا متيبقاوش يخرجو..
السعدية: نااااري قفرتهاااا قفرتهااا ديما مليكة تتسخط عليااااا قفرتهاااا..
سلمى: (تكرشخااات بالضحك على السعدية) ههههه ايوا شتي خاص دابا خالتي متبقاش تسخط عليك..
المهم بقات سلمى شادة ف السعدية ومن بعد قالو غيخرجو شوية وباش السعدية متسمعش من مها كلمة المسخوطة ناضت لبست واحد الكسوة تتلبسها من عيد لعيد ودهنت داك الراس بالزيت باش يلبد و مشطاتو مزيااان وجمعاتو ..ومللي كانو خارجيين..
مليكة: إيوا دابا وليتي بنادم ..
السعدية: هانا آممي راني وليت مرضية معاك ياك اممي غي متسخطيش عليا..
المهم خرجو لواحد الجوطية كبيييرة وبقاو يدورو وتماك مليكة والسعدية بقاو غير حالين فامهم..أشمنك يا پيجامات أش منك يا ماعن الحوايج ...كلشي دوخهم..
السعدية: هاناااري آممي تتي شوفي لخير..
مليكة: وايييه تبارك الله عطا الله الشراوط..خاص غالفلوس..
سلمى: هههه لاعجباتكم شي حاجة أخالتي خودوها ماما تخلص..
فاطنة: إييه أخيتي غير خودو اللي بغيتو..
مليكة: لاواه أخيتي بلا منزيدو نتقلو عليكم الله يرحم الواليدين هاحنا تنشوفو بعويناتنا..
السعدية داخت وسط هاد الجوطية ومكرهتش تديها كلها معاها..ههه. ..
بقات غادة وحالة فمها وهي توقف عند واحد مول الماعن وتتقول لمها ناري ممي شوفي الماعن كيديرين!!
ماجات فين تكمل هضرتها حتى تهرسو ليها شي كيسات كانو قدامها ومن الكيسان الغاليين..مول المحل بدا يغوت..
مول المحل: آلالة آلالة اش درتي؟؟
السعدية: (تتغبن) واللللله ما درت شي حاجة أممي راهوما تهرسو بوحدهم
مليكة: أويلي ميمتي واش نتي معندكش العينين..المهم أسيدي سمحلينا..خلينا ليك الراحة..زيدي قدامي..
مول المحل: وااالالة تتي واش دخول الحمام بحال خروجو؟؟واش عرفتي هاد الكيسان شحال دايرين؟؟
مليكة:(جبدات 20 درهم) هاك أسيدي وسمحلينا..
مول المحل: واش نتي تضحكي عليا؟؟راه الكيسان اللي هرست تيديرو 200 درهم..
مليكة: هي شحال بالريال؟؟
مول المحل: هي 4000 ريااال..فهمتي دابا..
مليكة: أويلي على 4000 ريال ..؟ هي اللي تنكساب فراس مالي باش نركب للعروبية..
مول المحل: واسربينا خلصيني ماسوقيش داكشي..
المهم تجمعو عليهم الناس والغوات والصداع حتى نطق واحد الشاب:
الشاب: صافي صافي أسيدي انا غنخلص على هاد الناس..
سلمى شافت فالشاب نظرة إعجاب..وهي تتدخل..
سلمى: لهلا يخطيك اخويا شكرا بزااف..
الشاب ماداهاش فيها ودوا مع السعدية
الشاب: هاد المرة ردي البال أ ختي باش متتحطيش فبحال هاد المواقف..
السعدية: وراكم ماباغينش تفهمو را الكيسان شافوني وتهرسو معرت مالهم!!
سلمى: نتي اللي يشوفك ينتاحر ماشي غير يتهرس هههه..
الشاب: (شاف ف سلمى نظرة ناقصة) ختي ماكاين لاش تضحكي على خلق الله تاهي بنادم غير حيت نية ؟؟
سلمى: أ..أأ..لا غي تنضحك أخويا..
الشاب: المهم هاكي أختي السعدية ها نمرتي لاوقعت ليك شي حاجة هاكة قوليها لي نجي نفكك هههه..
السعدية: كيفاااش؟ دابا لاهرست الكيسان نغوت علك فهاد النيميرو؟؟
الشاب: بحال داكشي..المهم..معاك حميد..نخليكم دابا نمرتي عندكم لا احتاجيتوني الله يعاونكم..
مشا حميد و سلمى غطرطق حيت معطاهاش وقت وداها غير في السعدية الهبيلة..
ومللي مشاو للدار ولات باغا غير تلقى كيفاش تدير باش تاخد النمرة اللي عندها..والسعدية عطاتها لمها تخبيها فالبزطام..
فمللي موصلتش للنمرة قررات باش تخرج السعدية تدير شي موصيبة باش تعيط ليه..هههه
قالت سلمى للسعدية غنخرجك معايا ليوم ...
السعدية: واش بصااح؟؟ فين غنمشيو؟
سلمى: غنديك تدوري وصافي..
السعدية: واخا نتشاور مع ممي ونخرجو..
سلمى: هي دابا سيري شاوريها..
مشات السعدية تشاورت مع مها ومليكة خلاتها بشرط ماتوصل لتاحاجة في الزنقة..وقالت ليها السعدية واخا آممي..
المهم سلمى لبست السعدية واحد الكسوة قديمة ومحرتكة عندها باش تبان بحال شي مسطية ..وسلمى لبسات أحسن ماعندها باش يبان الفرق كبير بينها والسعدية قدام حميد..
المهم خرجو وداتها لواحد السوبر مارشي كبيير و الناس تيشوفو فيها وسلمى تتغمزهم : غير واحد المتشردة بغيت ندير فيها الخيير. ..مللي دخلت السعدية داخت..تتقول أو اش هادشي كللو ..
سلمى انتاهزت الفرصة وقالتليها:
سلمى: عرفتي أالسعدية هاد الخير كللو دايرينو للناس اللي مافحالهمش باش ياكلو ويشبعو و يلبسو ..
السعدية: أوااااه هي أنا نقدر ناخد كلشي هادشي بلا ميهضر معايا حد!!
سلمى: آآآه غير خودي اللي بغيتي ..
السعدية مشات بدات تهز فالحوايج و الصبابط كل حاجة عزلت منها وقالت ارا ندي لممي شوية الماعن شي دكدكاتو شي هزاتو المهم روناتها تاني وحيدت حوايجها لاحتهم ولبست الجداد وغادة خارجة..بلا حشمة بلا حيا..
وهوما يشدوها فالباب..
العامل: واااااختي أو مالك منين جاية؟؟
السعدية: واتتا اللي منين جاااي هاويلي؟.مالي شدرت لك..جيت بحالي بحال الناس ندي تقديتي..ياك تتفرقو هادشي..
خدا من عندها السلعة كاملة وقاليها الحوايج اللي لابسة تاهوما خاصهم يدوزو قطعو منهم التكيتة و دوزوهم وهوما يقولو ليها بالماعن اللي هرستي عندك 1500 درهم..
السعدية: تتاشساير تقول را سلمى قالتلي هادشي فابووور توما مالكم تترجعو فهضرتكم..
العامل: بلا متفرعي لي راسي خلصي ولا نعيط للبوليس..
السعدية: هاويييييلي على البوليس تتا مالي قاتلة روووح..؟؟
المهم فهاد اللحظة بانت سلمى من بعد ماكانت سلتت ..
سلمى: السعدية را واقيلة ضحكو علينا يصحابني باقين تيفرقو السلعة..
السعدية: واصحيبتي اش غنديرو..
سلمى: غنعيطو لحميد..فين نمرتو..
السعدية: هاهي عندي راجبت بزطام ممي...
سلمى:(محملتش حميد يجي ويشوفها لابسة مزيان ..حيت لبست من السوبر مارشي لبسة زوينة)،..المهم أري النمرة
السعدية: هاهي..
سلمى اتاصلت بحميد من نمرتها..
سلمى: ألو حميد؟
حميد: ألو ..شكون معايا؟
سلمى: انا سلمى بنت خالة السعدية..
حميد: شكون سلمى وشكون السعدية!!
سلمى: حنا اللي لقيتي خالتي وبنتها مرونينها في الجوطية وخلصتي عليهم 200 درهم..
حميد:آآآآه..ههههه اوا مدام عيطتي هي واحلين تاني..؟؟
سلمى: هاد المرة وحلة كبيرة..المهم الى عندك الوقت اجي واخا؟
حميد: قوليلي فين نتوما؟
سلمى: السوبر مارشي اللي حدا المحطة
حميد: 5 دقايق انا عندكم..
المهم جا حميد ولقاهم واقفين تيتسناو
حميد: السعدية!! عاوتاني درتيها ههه
السعدية: والله آسي الاستاذ مادرت شي حاجة ..رابغيت غا ناخد مانلبس وماناكل وشي ميعنات وممللي كنت خارجة قالو لي خلصي واش هادو عندهم شي عقل؟
حميد : ههههههههه لا نتي مولات العقل..
سلمى: هههههه متديش عليها أخاي حميد راها ناقصة فعقلها شوية ...
حميد: لا السعدية هي مولات العقل غير هي نية كتر من القياس وصافي..
سلمى:(سلمى جمعت الضحكة وتفقست) اوا را نيتها وصلاتنا ل 1500 درهم..
حميد: سمحولي واحد الدقيقة غنمشي نخلصها ونجي..
مشى حميد خلص ورجع ..
السعدية بدات تتقول فخاطرها: واي واي واي واي هاد لوستاد فين يبان داك دريس هههه.
حميد كان واضح عليه إعجابو بالسعدية واخا معندها عقل..وهاد المرة حاول يعرفهم براسهم..
مللي خرجو من السوبر مارشي اقترح عليهم يشربو قهيوة معاه وسلمى فرحات حيت هادي فرصتها باش تخليه يديها فيها..
مشاو لواحد القهوة ومللي جلسو قاليهم اش تشربو؟
السعدية: واش بغيتي نشربو من غير تااي؟؟
سلمى: jus d'Orange
حميد: السعدية غنطلب ليك تانتي عصير الليمون واخا؟
السعدية: واخا خويي الله يعطيك الخير.
حميد: انا غناخد قهيوة..
المهم طلبو داكشي ومللي بدات السعدية تشرب العصير..قرقفاتو دقة وحدة وهي تتشربو تدير الموسيقى ..هههه وحميد غير تيضحك حيت لقاها بنت فريدة من نوعها واخا باقا صغيرة ..
حميد: السعدية فين ساكنة؟
سلمى: علاش تتسولها فين ساكنة؟ را الدرية غا هبيلة مغتعرف تاباش تغدات..
السعدية: مالي أخيتي منعرف باش تغديت ياك موك فاطنة دارت لينا الكسكسو ها؟ تصحبيني مسطياو؟؟؟
حميد: ههههه
السعدية: خويا لوستاد..انا ساكنة فدوار الوافي وجينا انا وممي مليكة نطلو على خالتي ونمشيو..
حميد: مرحبا..تنسمع بيه..
سلمى بقات غير تدور فعينيها وزادت تعصبات وهي تنطق:
سلمى: معرفتيناش براسك أحميد.؟؟
حميد: أنا أختي مهنديس عندي 26 عام ساكن مع واليدي ولكن عندي داري بوحدي وخدام مع بابا فالشركة ديالو ..
سلمى تحللو ليها العينين وسمها بان عليها حيت قرات البلان باللي السعدية بهبالها عاجبة حميد..وولات باغا غير كفاش تدير باش تخللي السعدية تمشي فحالها هي ومها فأقرب وقت..خصوصا أن نمرة حميد سجلتها عندها..
المهم بقاو شادين الحديث وفي الاخير وصلهم بطونوبيلتو ومشى..
سلمى دارت عند السعدية وقالت ليها:
سلمى: شفتي بحال هاد حميد را موجودين فالمدينة تبغيو بفلوسهم يشريو البنات اللي نية بحالك عنداك تتغري ولا تمشي معاه فهبالو را واحد بحالو مستحيل يشوف فوحدة بحالك نتي غيبغي غير يتفلا عليك وصافي..
السعدية: مالي بنت ليك هبيلة ولا مسطية..أنا لابغة نتجوجو واخا لابغاش غنهز واحد الكمشة ديال الكاياس ونفلق ليه داك الراس..
سلمى: هههه هبيلة ..واش حميد غيبغي يتجوج بيك نتي..
السعدية: إييه إييه ضحكي عليا ضحكي..انا را عارفة..ماشاف في تا دريس مول الموطور اللي فدوارنا باقي غي السي لوستاد..
سلمى: إوا شتي هانتي فهمتي..رافاش تتبغي تخدمي داك الدماغ تتخدميه ..يله ندخلو ..بعدا ونكملو من بعد..
المهم مللي دخلو عاودات سلمى لخالتها اش وقع وناضت مليكة بغات تسلخ السعدية..وشدوها..
مليكة: واااك واااك أعباد الله ..اش درت ياربي تتعطيني هاد الموصيبة..واش نتي عندك شي عقل ولا والو؟ واش كاين شي حد تيعطي السلعة بلا فلوس؟؟
السعدية: واااممي را صحاب المدينة شادين معايا الضد فكلشي راه كانو تيفرقو السلعة غا جيت انا حبسوها..
مليكة: ياربي تصبرني على هاد البنت..
المهم دازت سيمانة وهي ترجع مليكة مع بنتها السعدية للعروبية ..
سلمى بقات ديما تتحاول تتاصل بحميد ولكن مكانش تيجاوبها بحال الى عاق بيها..حتى بدات تتفقد الأمل..وواحد النهار جاوبها..
حميد: ألووو..
سلمى: ألو خويا حميد كيدرتي مبروك عواشرك..(حيت كان دخل شعبان)..
حميد: لهلا يخطيك أختي..سلمى ياك؟
سلمى: سلمى مزيان مللي عاقل على سميتي..
حميد: اه عاقل..واحد السعدية صافي مبقاتش تدير الكوارث؟؟ههههه
سلمى: شكون عرف هاديك را ديما هاكة الله يصاوب وصافي والله يصبر خالتي عليها ..
حميد: مكايناش حدااك؟
سلمى: لا رامشاو فحالهم للعروبية..
حميد: معندكش شي نمرة نعيط فيها؟؟
سلمى: لا ..(مبغاتش تعطيه نمرة راجل خالتها)اصلا هوما معندهمش مع البورطابل..
حميد: واخا اختي شكرا سمحيلي غنقطع جاتني واحد الخدمة..مع السلامة
دازت واحد 15 يوم هكاك باش مشاو السعدية ومليكة للعروبية..
كانت السعدية خارجة تتسخر للحانوت..وكيف ديما الشعر طالع للسما والحالة حالة..
وهي توقف قدامها طونوبيلة حميد..
السعدية: اواااااه واه واه السي لوستاد هادا؟ لابااااسووو؟
حميد: هادي نتي؟ هههه معرفتكش
السعدية: إيييه إييه انا السعدية ..
حميد: السعدية!! نتي الداخل ديالك زوين..قلال الناس بحالك صافيين ونيتهم وحدة واخا الناس تيشوفو هدا هبال ولكن انا تنشوفو نقا..
السعدية: واخا مفهمتكش ولكن انا رامهبيلاش راهوما اللي مسطيين..
حميد: المهم انا جيت على ودك هنا وواحد الحاجة مخصكش تهملي راسك تالهاد الدرجة ..ولكن هادشي غنعالجوه من بعد..فين باك ؟؟
السعدية: رااااه في الخيمة خليتو توال البهايم..
حميد: واخا تديني عندو؟
السعدية: واخاا يله نمشيو ..
ركبو فطونوبيلت حميد ومشاو فواحد الپيست..تاوصلو للدار حميد بقا تيشوف فالواقع اللي ساكنة فيه السعدية..
المهم عيطات السعدية على باها
السعدية: وا ببا وااا بباااا تعالى تعالى ..
بوشعيب: أش كاين ياديك الزغوبة؟( شاف ف حميد ) السلاام أسيدي كاين منقضيو؟؟
حميد: أنا حميد جاي من المدينة بغيت نهضر معاك..
بوشعيب: إييه زيد زيد مرحبا..قبل علينا راه الحالة ضعيفة..
حميد: نتوما اللي قبلو عليا وسمحولي على هاد الدخلة..
مليكة: السي حميد!!!مرحبا مرحبااا..
بوشعيب: سيري نتي وبنتك وجدو للراجل كاس تاااي..
مشات مليكة والسعدية للكوزينة..
مليكة: الله يا ميمتي ياك قلت ليك يا الصكعة هبالك غيخرج علينا..
السعدية: أش درتلك أممي..
مليكة: واتتي را الراجل جا يدي فلوسو اللي خلص علك..يا لهبيلة..
السعدية: هاويلي أممي ناري قفرتها ببا ليوم يكرضني ..منين غيجيبليه فلوسو؟
مليكة: غير سكتي وصافي ديري تاي انا غنعجن مسمن دغيا..
المهم مللي كملو وداو اتاي للراجل لقاوه تيقول لبوشعيب..
حميد: أنا دابا عاودت ليك كلشي عليا وهادشي قلتو ليك باش تقبل تزوجني بنتك وكنواعدك أعمي غنتهلا فيها بحالاش..
بوشعيب:(من الفرحة داخ معرف مايدير السعدية حشمت وهربت)تتي طلقي شي تزغريتة أمليكة..فين نلقا بحالك أسي لمهنديز..
حميد: لهلا يخطيك أعمي..
وفعلا خطبها من عند باها بوحدو ومللي قالها لدارهم مابغاوش ليه وبقاو يغوتو عليه ويقولو ليه واخا يكونو البنات تقطعو من الدنيا تاخد وحدة بحال هادي لا زين لا ثقافة لا نسب يشرف لا والو..
حميد: انا اللي غنتزوج ماشي نتوما وانا باغيها بنت العروبية ماخدامة ماوالو والزين زين الفعل وهاد البنت عجبتني حيت نية وحدة..
المهم بقا معاهم تاقنعهم وقالو ليه عوم فبحرك معاها انت تعرف..
ومشاو يخطبوها ليه ..السعدية هاد المرة كانت تتبان مرا ديال بصح بالقفطان ..
ومصيبة الشعر و دايرة الكحل و شوية المكياج..بانت مابيهاش..
واخا مامات حميد مكنتش حاملاها ..
المهم داز داك النهار معرضو على حد تالعرس قالو عاد نعرضو الناس..
ومللي دارو العقد بداو يوجدو للعرس ..
وتماك عرضو على الناس وعلى فاطنا وبناتها ..وكانت صدمة سلمى كبيرة مللي عرفات العريس هو حميد..
فاش سمعت السعدية تزوجات وباقيليها غا العرس يصحابليها شي واحد من الدوار..تاصدمتها مها باللي هو حميد..
مازادت تاكلمة ودخلت لبيتها وبقات تبكي..مفهمتش علاش السعدية بالذات اللي لازين لا عقل ياخدها واحد بحال حميد..كانت غيرة سلمى كبيييرة بزاااف ولكن مابيدها مادير صافي الناس تزوجو الحاجة الوحيدة اللي قالت انها مغتحضرش للعرس باش متزيدش تفقس
وصل وقت العرس...والسعدية ماقاداها فرحة ممتيقاش انها دات حميد وكاع البنات والعيالات اللي كانو تيضحكو على هبالها تفقسوووو حيت هبالها هو اللي جدب ليها حميد..
المهم داز العرس مزيان مازبلتهاش فعرسها مها بقات حاضياها لاتكحلها الساعة كلشي داز مزيااان..وومشات مع راجلها بالبكا..واخا هكاك مسخاتش بالدوار وبمها..وتامليكة واخا تفكات ماسخاتش بيها وبكاااات على فراقها ..
المهم دخلت السعدية لدار راجلها وهي تحل فمها..
السعدية: واش هادي هي الدارو؟؟
حميد: أه أحبيبة هادي هي دارنا..انا وياك..عجباتك..؟؟الى معجباتكش شي حاجة نبدلوها..
السعدية: هاويلي على متعجبنيش!! هادي راها قصر ماشي دار..
حميد: هههه واخا الالة مرحبا بك فالقصر ديالك..
المهم دوزو الليلة الاولى بحال كاع العرسان..والصباح جاو دار السعدية ودار حميد جابو الفطور..
داز النهار بخير فرحو الناس ونشطووو..
وبقات السعدية سيمانة دايخة فديك الدار معرفت باش تبدا..
السعدية: لا لا لا هادشي ماشي بحال خيمتنا..هادشي قاسح عليا..هاويلي(شافت الفران ديال الضو وشي أجهزة كهربائية)هادشي شنوهو؟!!! مفهمت والو فداكشي حلت الثلاجة تاهي معرفت اش داكشي اللي فيها المهم بقات دايخة تاجا حميد من الخدمة لقاها جالسة تتبكي ..ومادارت لا غدا لا والو..وسولها:
حميد: السعدية!!! مالك؟؟؟
السعدية: شوف أحميييد!! انا را عارفة راسي عروبية ومكلخة..
حميد: متقوليش على راسك هاكة..
السعدية: راني دخت والله معرفت باش نبدا انا مولفتش هدشي فدااارنا..
حميد: هي مدرتي غدا..زعما راني مقدي كلشي..
السعدية: حنا كنا نصبو عل العواد وهنا معرفت مندير..
حميد: واخا ألالة ليوم غنجيبو الغدا من برا صافي..ولكن غدا غنصيفط ليك واحد البنت بنت خالتي غادي تعلمك كلشي شهر واحد تولي طيارة..
السعدية: واخا أحميد..
المهم داكشي اللي كان..جات مروة بنت خالة حميد تجلس معاها شي يامات وتوريها كلشي..الساعة السعدية ردات ليها عقلها لووور بهبالها..ههه
أول نهار جات فيه مروة كانت مصدومة من السعدية من العرس وزادت تصدمات فاش شافتها كيفاش تتعامل بهمجية مع أي حاجة ومفهمتش اشنو جدب ولد خالتها لبحال هادي..ولكن كانت باغية تعاونها..مشا حميد لخدمتو وخلاها معاها
بدات تتهضر هي وياها:
مروة: السعدية ختي! خاصك تعرفي باللي دابا حياتك تبدلات 180° نتي دابا مرا مزوجة ..وماشي من أي واحد ..من السي حميد المهنديس..شوفي فجنابك وغتعرفي اشنو داير بيك..
بدات السعدية تتلفت وهي تقوليها:
السعدية: دايرين بي غا لمساند أختي ماااروة..
مروة:پففففف واخا..غنديك على قد عقلك..المهم أول درس لي معاك هو نوريك هاد الاجهزة اللي فالدار لا تتصلاح وكيفاش تتخدم..
السعدية: شوووفي..انا را واخا هوكاك راسي خفييييف تقولي لحاجة مرة وحدة معايا..غير سيري على الله..
المهم بقات مروة تتعلم فيها وتتفهمها بلوغتها ..النهار كامل وهي معاها..والحمد لله فهمت شوية وكانت باينة باللي مع الوقت غتفهم مزيان ..
ومللي كملو من هادشي قالتليها غدا ان شاء الله غنعلمك حوايج خراين..والسعدية فرحاات وقالتليها اه واخا ختي ..
المهم الغد ليه راجعات معاها داكشي اللي علمتها ولقاتها شدات شوية واخا هكاك وتعلمت كيفاش تخدم داكشي..
وبدات معاها فطريقة اللبس قالتليها اول حاجة غنخرجو نتقداو حوايج ليك يجيو معاك و من بعد غنوريك كيفاش تتهلاي فراسك وفي الاخير غنعلمك طريقة الهضرة و المشية ..
المهم مرة بقات مع السعدية مدة شهر ونص وهي تتعلم فيها كلشي حتى انتقلت من السعدية الهبيلة المشعككة لبنت كلها أنوثة ولباقة..ونقصات بزاف من الهبال..اللي كان مغطي ليها على أنوثتها ..
السعدية بدات تتستوعب المكانة اللي ولات فيها وحيت ولات تتبغي راجلها حميد حاولات تتبدل على ودو..
واخا هكاك ديك السذاجة ديالها متبدلاتش حيت هكاك خلقها الله ولكن على الاقل قادات حالتها وحاولات تكون المرا اللي تيحلم بيها
حميد فرح بزااااف حيت السعدية تبدلات هاكة..وقرر أنو يعرض عليها للعشا على برة..ومنها يشوف التغيير الكبير اللي تغيراتو ..
مشاو لمطعم راقي باش يتعشاو..السعدية ارتابكات بزااف حيت ممولفاش هاد الجو..واول ماجلست بان الارتباك ديالها حيت بالقفقافة اللي فيها
قلبات الكيسان والطباسل اللي كانو قدامها..وتماك خرجت ليها شخصية السعدية بنت العروبية ..وبدات تغوت..
السعدية: هناري ممي هناااري سمحلي آخوويي(تدوي مع النادل) وبدات تتجمع في الزاج وهوما تيقولو ليها مكاين باس الالة غير جلسي وهي تتحلف وتعاود لا والو انا اللي هرستهم نجمعهم..وحميد طلعلو الدم ومشعرش براسو حتى بدا يغووووت ..
حميييد: واااصافي مالك متتسمعيش؟؟؟خلي الناس يديرو خدمتهم ولا تيصحابليك راسك فالدوار؟
الناس اللي جالسين فالمطعم بداو يضحكو ويقولو داكشي اللي قلنا هاد الاشكال غتكون جاية غير من العروبية..
حميد مرضاش حط فلوس..وجرها وخرجو..
السعدية أول مرة فحياتها تحس بالإحراج وتحس باللي تجرحات ..
ركبت فالطونوبيل ومنطقت بتاكلمة ولكن دموعها متحبسوش ..وقالت:
السعدية: ملول كنت عارفة باللي حنا ماشي لبعضياتنا..وليني قلت متعرفي يا لهبيلة تكون الدنيا بغات تضحك لك..
وهاد ولد الناس يكون قابلك بهبالك..
وليني ماكاين باس..
حميد: مفهمتش علاش تديري لي هاكة؟
واش انا عدوك..انا ماباغي منك والو من غير تكوني عايشة مزيان وفمستوى زوين..عيشة العروبية نسايها كوني بحال هاد العيالات اللي تيعرفو لكلشي باش فايتينك؟؟
السعدية: حميد بغيت نعس ..
حميد: هاحنا غاديين للدار..
السعدية مابقات نطقت تاكلمة وسكتات وفاش وصلو للدار مبغات تاكل والو قالتلو تصبح على خير ودخلات تنعس..
وفي الصباح غير مشا هو للخدمة..جمعت حوايجها ومشات لدوارهم..مشات وعينيها كلهم دموع على فراق حبيبها..مشات وهي كلها حسرة على حالها اللي مابغا يتقاد ..مشات وقلبها كللو حزن حيت مقدراتش تكون بحال العيالات ..وهبالها مابغا يفرقها..
غير وصلت للدوار مها فرحات بيها تصحابها جاية غير تشوفها ..فاش جلسات بقات ساكتة:
مليكة: وا بنيتي تتي مالك!؟فينو حميد؟؟را معاك تندوي هاي!!
السعدية: جيت غا وحدي أممي..
مليكة: جاية تشوفينا وترجعي ولا جالسة شوي؟
السعدية: راجعة لدار ببا أمليكة..
مليكة: ياك لاباس أبنيتي..
السعدية انفجرات بالبكااا..
السعدية: أ..أنا عارفة راسي أممي ماعندي بوو الزهر..(تتبكي)
مليكة: واتتي عاودي لي شنو طاري ياديك المتعوسة..باينة زبلتيها ..عارفاك هبيلة ومتتعرفي ديري تاحاجة مقادة..
السعدية: غير زيدي عليا أممي..اه انا هبيلة وهادشي لاش رجعت لدار ببا..داك الراجل غير تعديت عليه أممي بهاد الجواج هو ماهو لي ولانا ليه..هو خاصو مرا عصرية وزينة وانا غاعروبية فنما مشيت نشوهو ..صافي انا باغا نطلق..
مللي دخل حميد للدار قلب على السعدية تاعيا ملقاهاش وهو يلقا واحد الورقة مكتوبة بواحد الخط بزز باش قدر يقراها حيت السعدية قارية حد السادس تتكتب شوية معكلة كتبتها:
كاتبة ليه:( انا مشيت للدوار ..انا بنت العروبية ومعمرني غنكون بنت المدينة مهما كان..احسن حاجة طلقني والله يسهل ليك مع اللي تستاهلك..)
غير قرا رسالتها وهي تشعل فيه العافية داخ ماعرف مايدير..فهاد اللحظات فين تيعرف الانسان واش قادر يستغنى على الطرف الثاني ولا لا..
حميد حس براسو دار خطأ كبير مللي جرحها بأصلها وبسذاجتها وحس كتر باللي بلاصتها متقدر تعمرها تاوحدة والاهم عرف انو تيبغيها بزاااف وميقدرش يتخلى عليها داكشي لاش مشا طاير لطونوبيلتو باش يتبعها للدوار. .وهو تيطلب الله باش متوقع ليها تاحاجة خايبة..
السعدية غير كملت هضرتها مع مها ودخلت للبيت فين كانت تتنعس..وبدات تقلب فحوايجها..القدام وهي تهز واحد اللبسة كانت تتلبسها كلها مقطعة و كاشفة..وهي تلبسها وجمعت شعرها ..
ونعسااات واحد الشوية جا حميد للدار...
غير دق خرجو ليه مليكة وبوشعيب..
مليكة: السي حميد على سلامتك أوليدي..
حميد: السلام أخالتي..السلام أعمي..
بوشعيب: السلام اوليدي ..زيد زيد دخل
دخلو وبقاو تيتناقشو..
بوشعيب: شوف اوليدي الطفلة ماعدها عقل..نت مول العقل..متديش عليها اوليدي..
مليكة: إييه اوليدي بنيتي غا هبيلة..باقا ماعارفاش بحق الزمان..مسحها فينا أوليدي..
حميد: فيناهي؟
مليكة: غتكون غير متكية لداخل..هانا غنوض نوضها..
دخلات مليكة للبيت عند السعدية وهي تبدا تندب..
مليكة: هاويلي وحدي واش باغا تفركعي لي المرارة..واش الراجل شرا ليك قوت الشراوط باش تلبسي هاد الهلاهل الباليين؟؟
السعدية: ممي هدو هوما حوايجي اللي كنت نلبس وهادو باش غنبقا..
مليكة:(هزات صندالة) نوضي تكعدي بدلي هاد الشراوط ولبسي حاجة مقادة را راجلك كاين برا..
السعدية:واخا اممي غير خرجي انا غنبدل ونخرج
مليكة:اوا طلقي دغيا را الراجل تيساين..
خرجت مليكة..والسعدية ملبست تاحاجة بقات بدوك الحوايج..وشافت فراسها فالمراية..وقالت:
السعدية: هادي هي السعدية..اللي بغاني هوكا مرحبا واللي بغاني بزواقي يقلب على اللي تتزوق ليه..
خرجت عندهم بديك الحالة..مليكة مللي شافتها مكرهتش لارض تشق وتسرطها ولكن حميد متسوقش بزااف..وهنا نطقت السعدية:
السعدية: حميد!! لاش تابعني؟
حميد: شتي لهبال هو اللي درتي دابا واش صافي حنا غير نتناقشو شي نهار تجمعي حوايجك وتزيدي..؟؟ راه كاع الناس تيتناقشوو ماشي غا حنا؟!!
السعدية: هادشي اللي درت ماشي هو لهبال ..لهبال هو اللي في..لهبال هو اني نضيع لك مستقبالك هوكاك معايا..
لهبال هو نشوفك محن باش تبدلني وانا عاد مازايدة فيه..انا ديما غنبقا" السعدية الهبيلة" واخا معرت شكون تجيبلي يعلمني..السي حميد..ملول نت ماشي لي وانا ماشي ليك..خلينا نتطلقو بلا مشاكل..وهانتا تتشوف..هادو حوايج تتلبسهم مرا بعقلها ؟؟ انا هدا هو توبي وانت شوفلك شي وحدة من توبك..انا تعلمت نهضر شوية ولكن معمرني غنتعلم ننسا كيفاش تتهضر السعدية العروبية..
حميد: واخا الالة وانا باغيك كيفما نتي بهبالك و حوايجك المقطعين ومغنتفاكش معاك تنديك معايا غير تهناي..
بقاو تيهضرو وكل واحد تيقول اللي ضارو وفي الاخير قاليها حميد..
حميد: السعدية قدام واليديك غنقوليك باللي انا عمرني ماشفت شي وحدة بحالك وعمرني غنشوف ..انا من اول مرة شفتك بغيتك..كاع الناس تيشوفوك بعين وانا شفتك بعين خرا ..شفت فيك مراتي وام ولادي ان شاء الله..شفت فيك الاخلاص والوفاء اللي بداو تينقارضو..شفت فيك الصفاء والنية و الصراحة اللي انعدمو فهاد الدنيا..
السعدية: هي دابا انا هبالي زوين ولا خايب..؟
حميد: هبالك هو اللي مزينك الهبيلة ديالي..
بداو تيضحكو وشادين فبعضهم ..
حميد: يله أالهبيلة ديالي نمشيو لدارنا بدلي عليك وخلينا نمشيو وكنواعدك معمرني نخسر ليك الخاطر..
السعدية: تانا والله اللي تبغيها هي اللي تكون ..انا غنبدل كلشي اللي خايب في والله ..
حميد: انا غنعاونك تبدلي داكشي الخايب فيك واللي خاصو يتبدل صافي..اما اي حاجة خرى عيشي كيفمانتي باغيا واخا؟
السعدية: واخا..
المهم مشاو لدارهم وفعلا السعدية مع الوقت تعلمات بزاف الحوايج مهمين وحاولات تتعلم الخياطة باش تتلاها وتعرفات على بزاف البنات في النادي ومللي تقنات الخدمة حل ليها حميد محل خاص بيها للخياطة..حسات براسها بدات تثتبت ذاتها..ورزقهم الله من بعد 3 سنين زواج بجوج وليدات توأم سماوهم : بدر و سهيل..وعاشو فسعادة واخا لالاهم السعدية مافارقها الهبال..ههههه
ولكن حميد كان مثال للشخص اللي تيبغي من قلبو لأجل الحب ماشي لأجل شكلها او هضرتها..كان تيبغيها لصفاءها وقلبها الكبير ورغم الفرقةالكبير بينهم فالمستوى زواجهم نجح الحمد لله..
النهاية