عيطات حليمة لبوجمعة راجلها باش يجي على حساب الناس اللي جاو..ومن بعد خرجات عند الناس..
حليمة: أ..سمحولي..تعطلت عليكم..
السعدية: خودي راحتك ألالة حليمة..
حليمة: لهلا يخطيك أحبيبتي.. مرحبا بيكم..نهار غليض هذا هههه
السعدية: الله يبارك فيك.. كيف تتعرفي أختي حليمة حنا اليوم جينا باش نخطبو بنتك عايشة..كلشي شكرهالينا وقصدنا الدار نيشان..
حليمة:إيييه ألالة الدار داركم..
السعدية: اوا كيف تتعرفي .. الزواج نصيب واللي مكتابة توصل..هذا ولدي سعيد العريس ان شاء الله..
حليمة: مرحبا بولدي مرحبا..اوا وفاش خدام؟!
سعيد: فالطاحونة أخالتي..
حليمة: مزيان أولدي الله يكمل بخير.. أنا غنمشي نعيط للبنت باش تشوفوها..
فهاد اللحظة دخل بوجمعة..
بوجمعة: السلاااام عليكم..زارتنا البركة..
رحال(الأب ديال سعيد): عليكم السلام أسيدي..
بوجمعة: وا حليمة تي شفت الناس ماقدامهم حتى كاس داتاي؟؟؟
حليمة من الكوزينة تتهضر..
حليمة: ها عايشة تتوجد فيه غير جلس مع الناس هاحنا جايين..
حليمة : عايشة!! عنداك تنساي اللي تافقنا عليه.!! الناس راه باينة فيهم معقولين..
عايشة : صافي أ مي.. غنسلم عليهم ونحط تاي.. والحلوة... ونتي غتجيبي شي لاخر.. ومغنهزش راسي غنبقى غير حادرة راسي..
حليمة: صافي هكاك نبغيك.. يله يله سيري قدامي دي الصينية..
هزات عايشة الصينية ومشات لعند الناس.. مشافت فجيهة حد.. حطات الصينية وبدات تسلم بلاما تحاول تحقق فيهم.. لاتصدق مصفياها لشي واحد بدوك العينين..
سعيد بدا تيتوشوش مع خوه صالح..
صالح: (بصوت جد منخفض)واخويا را البنت حولة..
سعيد: ماشي مشكل تكون غير بنت الناس..
صالح: دابا غيبان ليها منك 2 ههههههه.
سعيد: شتتت باراكا..
السعدية : مرحبا ببنتي..
عايشة: الله يبارك فيك أخالتي ..
جابت حليمة اللي بقا وجلسات حداهم..
حليمة: اوا هانتوما كيف تتشوفو بنتي متتهزش الراس .. الى تفاهمتو الله يسهل بالخير..
واحد الشوية عايشة خرجات عينيها لتحت..وبحال الى مصدومة..
قشعاتها مها..ونغزاتها وقالت ليها بالتوشويش..
حليمة: ناري أبنيتي لاااا متخدميش السلاح..ناري قفروها..
عايشة: (بالهمس)وا مي شوفي رجليه قداش طوااااااال باينة تيلبس 45 ناري مي.. لا غير شي نهار عصبتو وركلني يوصلني لزحيليقة..
حليمة: قل أعود برب الفلق من شر من خلق..مشى فيها مسيكين...شتتت صافي غيقولو غير تنتوشوشو عليهم شتت..
بوجمعة: اوا ها الطفلة قدامكم واللي بغيتوها نديروها..
رحال: صافي أسيدي من هنا 15 يوم غنرجعو نديرو الخطبة ..ياك نتوما موافين..؟!
بوجمعة : إن شاء الله..
السعدية: اوا تدوزو بخير نخليوكم دابا
حليمة: مالكم مزروبين .. جلسو تتعشاو!!
السعدية: مرة خرى خيتي .. باقي يام الله طويلة..
حليمة: (بشوية)محااالش..
السعدية: قلتي شي حاجة أختي حليمة؟
حليمة: أ..لا والو ان شاء الله..
مشاو الناس.. وواحد الشوية جات واحد المرا تتجري وتتدق..
حليمة: يا شكووون؟!!
المرا: حلي حلي أنا التايكة..
حليمة دارت عند عايشة وقالت ليها صافي يا الصgعة دقتك وصلت..
حليمة: (حلات الباب)السلام أختي التايكة!! خبار الخير..
التايكة: مكاين منخبي عليك.. دار السي رحال اللي جاو هضرو فعايشة كانو غاديين راجعين لخيمتهم و جا واحد الموطور بالجهد ضرب ولدهم سعيد وراه تيقولو تهرس ولا منعرف..
حليمة: ياربي تحضر السلامة..غير عوينة وتابعة بنيتي ياربي السلامة..اوا؟!
التايكة: اوا راني خليتهم غيديوه للسبيطار..
حليمة: تسناي نلوح جلابتي ونقولها لبوجمعة ونمشيو نشوفوهم..
مشات حليمة والتايكة وبوجمعة للسبيطار لقاو واليديه تيبكيو والكل مقهور..
بوجمعة: السلااام عليكم..الحمد لله على سلامتكم..والله يشافي سعيد..
رحال: عوينة وخرجات فولدي .. هاد الناس غير شافوه لابش الكومپلي وضربوه لي بعوينتهم..
حليمة: مسيكين وليدي سعيد..
السعدية:(تتبكي)شفتي أختي حليمة ماجرا لينا..
حليمة: ياربي يكون متقسحش..بزاف..
فهاد اللحظة خرج الطبيب..
الطبيب: نتوما هوما عائلة سعيد؟!
رحال: إييه أسيدي حنا..
الطبيب: أش غنقوليكم.. الدقة كانت قاسحة بزاااف..سعيد تهرس من رجليه بجوج ...ودرنا ليه الجبس..
السعدية طاحت فلارض..وتتمرغ وتقول .
السعدية: الله ياربي على وليدي الله ياربي..
حليمة: صافي أختي السعدية صبري شوية..
السعدية: عطيني اتسااااع .. ولدي .. ديك البنت عندكم منحوووسة .. عطيونا اتساااع..
بوجمعة : يله أحليمة حنا جينا نشوفوهم بداو يعيرو فينا..
حليمة: بزاااف علك بنتي.. سيري الله يسمح ليك..يله أبوجمعة..
بقاو غاديين فالطريق وهي تقولو ..
حليمة: شفتي على بنت عطانا الله .. الراجل اللي جا يخطب يتعطب..
بوجمعة: مكتابة..
حليمة: أش من مكتابة راه الطفلة عندنا عينيها حارين .. تيطيحو الزرزور من فوق الصور.. وحلات فينا ..
بوجمعة: هههه الزرزور تيطيح من شي عوينات نيت اما هي عينيها مزاgلين..
حليمة: حولين ودقتهم متنزلش لارض..
بوجمعة: هههههههه ضحكتيني الله يجازيك..عههههههه
حليمة: اوا يله نشوفو المزغوبة شتادير لاتريب علينا الدار ..
غير دخلو لقات حليمة بنتها سادة عليها البيت ديالها..دخلت عليها..لقاتها تتكحل..
حليمة: قاليك لالة زينة وزادها نور الحمام أتي نوووضي بقا ليك غير التكحال..
عايشة: كيجيتك أمي؟! ميزيني درية ياك..؟سيدي سعيد غيتبرع مع راسو ياك
حليمة: سيدك سعيد صفيتيها لجد بوه.. راه فالسبيطار مهرسين ليه الرجلين بجوج سيري اش بغيت ليك.. بغيتليك شي طيارة تطيرك وتهنيني منك..
عايشة: امين أمي..ومكرهتهاش تديني لتركيا هههههه
حلبمة: إيييه باش تخليها عليهم .. تي لا مشيتي لتركيا غيشدوك على داك التقواس ديالك .. كنت شاكة فك الساعة دابا تأكدت باللي راك قواااااسة النميرو 1
يله رgدي .. ترgدي ماتنوضي نشا الله..
عايشة: هاهي نعست يله..
خرجت حليمة وسدات الباب..
المهم دازت شي 4 شهور مابقى حد دوا ف عايشة.. وفالصراحة ولا كلشي خايف منها .. تعرفات باللي را عينيها خايبة وباللي منحوسة ..
عايشة تاهي رضات بداكشي اللي عطا الله ..
واحد النهار قالت لحليمة..
عايشة: مي!!
حليمة: أشنو تاني؟!
عايشة: بغيت نقوليك شي حاجة ..
حليمة: هضري..
عايشة: تعقلي على مليكة اللي كانت تتجي عندي ونمشيو للحمام بجوج ومرافgين..
حليمة: آه نعقل..بلامارة نهار جابت جلابة جديدة وزوينة قلتي ليها زوينة الجلابة ديالك .. وغير مشات فحالك شدها ليها سلك وتقطعت كلها...عقلت ..مالها؟!
عايشة: والو..مشيت نهار الخميس نحط توب الجلابة اللي جابتلي عمتي من العمرة باش يتخيط ولقيتها خدامة عند ديك الخياطة..
حليمة: اوا؟!
عايشة: سولتها تتي امتى تعلمتي قالتلي فالنادي اللي فالشارع.. تيعلمو الخياطة وكلشي..
حليمة: اوا ومن بعد؟!
عايشة: راكي عارفة أمي معندي زهر لا فزواج لا فوالو..بغيتك طلبي با يخليني نمشي للنادي نتعلم للخياطة..
حليمة: وابنيتي..راني مكرهتش ليك فيه ولكن را خايفة عليهم منك.. راك اللي شفتي فيه بعين الرحمة غتطرا ليه شي حاجة اللهم خلي عليك بنات الناس.باكمايشة: صافي أ مي متخافيش عليهم غنبقى نقول تبارك الله ولا ماشاء الله باش متشدش فيهم العين ..
حليمة: وا المهم غنشوفليك مع باك لا بغا هي هاديك ولا مبغاش جلسي فحالك..
عايشة: واخا أمي يخليك لي..
فاش جا بوجمعة عاوداتلو حليمة شبغات عايشة ..
بوجمعة: وفين جا هاد النادي؟!
حليمة: قاتلك فالشاريع..
بوجمعة: واخا ألالة يكون خير.. خلي الطفلة تعلم شي صنعة تنفعها..
حليمة: هي صافي نقوليها غا سيري تقيدي فالنادي..
بوجمعة: إييه غا خليها..
حليمة: واخا غنقولها ليها..
المهم فرحات حليمة عايشة بالخبار وقالت ليها عايشة غدا نمشي أمي نتشجل..
والغد ليه مشات عايشة فرحانة وتسجلات وبدات تتمشي ليه..
وكل مرة تتجي تقول لمها ها اش علموني أمي وتبقى تشرح ليها..
وواحد النهار تبعها واحد خاينة ..مللور .. وبقى داوي داوي وهي متتفرزش شتيقول..وشوية قرب ليها وقال..
الراجل: واو واو شحال تتزربي غير بشوية باش نقدر نهضر معاك ..ولا اللي باغي يهضر معاك خاصو يكون عويطة..
ماجا فين يكمل هضرتو حتى تلوات ليها رجليها وطاحت..
عايشة: أي أمي...ناااااااري على عينين عندك..؟!
ماجات فين تكمل هضرتها حتى دخلات ليه واحد الناموسة لعينيه ههههه بقات تتحرقو وتيحاول معاها..باش يخرجها حتى خرجها..
الراجل: نتي طفرتيه..هادوك العينين عندك فالرويبع..
عايشة: ههههههههه الصراحة تلاقينا لانا لانت.. قواسين من الدرجة الاولة..
الرجل: واييييه هههههه تعرفي لوكان شي حد عادي تجيه الدقة صحيحة تصابينا انا وياك بحال بحال..جات خفيفة
عايشة: هاي هيي شفتك زعمتي عليا..!! يله ضحكنا معاك شوية مدسرش بسلامة..
الرجل: تسناي ياهاد البنت..
عايشة: شنو !!
الراجل: سميتي دريس..ونتي؟!
عايشة: عايشة..يله بسلامة...
مشات عايشة وخلاتو .. بقا تابعها بلا متحس..تاوصلات للنادي.. وفاش كانت راجعة تبعها تا شافها فين ساكنة..
المهم بقات عايشة تتمشي للنادي وتجي تعلمات بزاف الحوايج.. وبدات تطبق فالدار شرات ماكينة وبدات تتعلم فالدار..
وواحد النهار جات من النادي..
عايشة: مالك أمي حليمة شفتك فرحانة..!
حليمة: ومالي تمنفرح؟!
عايشة: حيت فنما نهضر معاك ولا نقرب جيهتك تعقدي عليا غوباشتك..؟! ياكما بوجمعة فرحك بشي سرتلة ديال الذهب هههههههههه
حليمة: gاع هادا زهر ؟!!!
عايشة: اوا ومالكي؟!فرحينا معاك
حليمة: فالصراحة .. جاوك الخطاب ياديك العوجة ههههه..
عايشة: عاوتاني ههههههه تانتي !! بحال اللي سبقوه..يا اما غيهرب بعظامو صحاح يا اما غيمشي بعاهة مستديمة هههه...
حليمة: وديك الساعة انا اللي غندير ليك شي تعويقة مادايراش ..
عايشة: علاش أ مي ههههه..
حليمة: الى مشا تتفرتك هاد الجواج وديك الساعة غتشوفي .. مني اللي عمرك شفتيه..
عايشة: واش غندير أمي راه لاشفت فيه غنعطيه للراس هههه هادشي اللي عطاني الله..
حليمة: متشوفي فيه ميشوفيك.. نتي غير حضري سلمي عليهم وخرجي دغيا باش ميكونش عندك الوقت اللي تصيفطي فيه القرطاسة. ..
عايشة: هههههه واخا أمي تتحسسيني باللي راني إرهابية..ههههه
حليمة: نتي راكي كتر من الارهاب.. هالعار صيفطي شي تقويسة لدوك ليهود اللي باركين يقتلو فخوتنا..المسلمين..
عايشة: تنتجوج ونمشي لباباهم هههههه..
حليمة: المهم غدا بلا متمشي للنادي را غيجيو غدا ان شاء الله..
عايشة: واخا مي..
الغد ليه كما العادة وجدو وقادو وجا العريس وجاب معاه مو.. حيت باه ميت وهو اللي عندها ...
العريس: ها الواليدة كيف ما قلت ليك داك النهار هانا جبتها..الحاجة نعيمة..
حليمة: مرحبا بيكم أوليدي..
نعيمة: ترحب بيك الجنة أختي..
حليمة: حليمة.. مرحبا..
نعيمة: ترحب بيك الجنة أختي حليمة .. وسمحو لينا على هاد الدخلة..
حليمة: الدار داركم..الله أودي نتوما اللي سمحو لينا..هاهو باها جاي فالطريق..
العريس: الله يجيبو على خير..فين العروسة؟!
حليمة: هههه واخا غير يجي باها ونعيط ليها..
العريس: إييه أخالتي حليمة ماقلتي عيب..
جا بوجمعة ورحب بالناس..
بوجمعة: مرحبااا حرحبا وأله مرحبا..
نعيمة: الله يبارك فيك الحاج..
بوجمعة: الجاج؟! ماشي مشكل ان شاء الله شكون كره يزور داك المقام..
حليمة: نمشي نعيط لبنت..
دخلات حليمة عند عايشة..
دخلت حليمة عند عايشة..لقاتها مقادة ومكحلة..
حليمة: ياربي غير متكحليهاش على شي حد بهاد التكحيلة..دوك العينين بلا كحل خطار ويلى دار ليهم الكحل القضية صعيبة اليوما نمشيو للحبس
عايشة: هههههه ناري أمي تتخلعيني ..
حليمة:باراكا من الهضرة الخاوية وخرجي عند الناس ومتنسايش الصينية راني موجداها..
عايشة: صافي أمي راني حافضة ماشي اول مرة هادي..
حليمة: ياربي تلطف فهاد المرة..
خرجات حليمة عند الناس..وشوية تبعاتها عايشة هازة الصينية وجاية جيهتهم..
حطات الصينية ومشات تسلم عليهم..
وهي تصدم وخرجات عينيها فالعريس فاش لقاتو هو نفسو دريس القواس.. ههه
حليمة غير شافت عينيها خرجو قالت صافي مسيكين مشاااا فيها..
المهم جلسات عايشة وتفاهمو على كلشي وفاش مشاو الناس .. حليمة بقات تتسنى فالخبار ..ديال شي كسيدة ولا موت ولا شي مصيبة غطرا للراجل..
غادة جاية فالدار..
عايشة: بلا متمحني راسك أمي راماغيوقع ليه والو ..
حليمة: باش عرفتيها يالمسخوطة ونتي عينيك خرجو فالراجل..
عايشة: ههههه حيت هداك راه كتر مني .. تاهو قواس.. ودقتي متقضي فيه والو..
حليمة: باش عرفتيها ياديك العوجة..؟!
عايشة: أ..هانتي باقي ماجاتنا خبار.. ههه
حليمة: هاحنا غنشوفو..اوا طاح الحك وصاب غطاه..الله يطليكم بعضياتكم..
عايشة: آمين أ مي ههههه
المهم داز كلشي بخير وعلى خير.. وماوقع ليه والو..عايشة ماقداتها فرحة .. ماشي حيت لقات الراجل.. حيت لقات اللي غيستحمل دقة عويناتها الزينين..
تخطبات لدريس وولا تيديها ويجيبها للنادي ..وكيف كيقولو يد وحدة متصفقش. وهنا عين وحدة متتعطيش شي دقة نيت فمابالك لاتجمعو بجوج هو وياها.. الى داز شي حد ودواو فيه غير يمشي يحفر قبرو بيديه..ههههه..
واحد النهار..كان غادي موصلها..
دريس: بغيت نسولك أعايشة..
عايشة: سول أ شيري ..
دريس: شنو هاد شيري تاني؟!
عايشة: منعرف سمعتهم تيقولوها فتلفازة
دريس: معلينا.. واش دوك العينين تزاديتي بيهم هوك حولين؟!.
عايشة: لهلاا يحييييك انت اللي حول.. عيني غير تزاgلو لي شوية بكثرة التقواس..اوا مللي بدينا فتخسار الهضرة بغيت نسولك..
دريس: سولي أ مون نامور..
عايشة: ياويلي شنو هاد مونامور تاني؟!
دريس: تانا سمعتها غا فالدوزيام..
عايشة: واخا.. داك الفم اللي مسندر سنانو كلهم تيطلو تزاديتي بيه ولا مع الوقت تسندر.؟!
دريس: معيور معيور مكاينش اللعب.. اوا تزاديت بيه واقيلة .. كنت صغير منعقلش
عايشة: واو واو واو شوف شوف ..
دريس: أشنو نشوووف؟!!
عايشة: الراجل اللي سارح تما .. يكون كبيررر وشاد فراسو تيبان صحيح العفريت.. باقي يدك ويدردك..
دريس: والمسخوطة شبغيتي عند الراجل..هذاك را الحاج العماري..هو القديم فهاد الدوار ..
عايشة: إيه.. المهم راني وصلت سير الله يعاونك..
دريس: بسلامة عليك ..
مشات عايشة للنادي وفاش كملت مشات للدار وهي تلقى مها يله غتلبس جلابتها..
عايشة: مي..السلام بعدا .
حليمة: السلام أبنيتي السلام..
عايشة: فين غادة؟!
حليمة: غادة توال خيمة الحاج العماري .. نعزيهم راه الحاج العماري جاتو سكتة قلبية ومات .. نمشي ندير الواجيب..
عايشة: مسكين...يله بانلي الصباح فاش كنت غادة للنادي وقلت لدريس هاد الراجل كبير وباقي شاد..
دارت جيهتها حليمة وهي تشنق عليها..
حليمة: وانا مالي مطاحتش لي فبالي باللي نتي يا القتالة مولاتها..
عايشة: اويلي أمي نعلي الشيطان.. الراجل أجالو تقادة..أويلي غتشركي بالله
حليمة: ياك قتلك قيلي علك الناس يا بنتي راه غتقتلي الدوار كامل بعينيك..
عايشة: وانا مدرت والو أمي..
حليمة: تنجي ونتفاهمو..هانا مشيت نعزي وديري لغدا بقاي تاني تظوري عليا كي لعزري فالدار..
عايشة: واخا أمي..
مشات حليمة عززات وجات..
دازت شي سيمانة وجات الحاجة نعيمة عند حليمة..
حليمة: مرحبا بالحاجة نعيمة..زيدي دخلي..
نعيمة: الله يبارك فيك..سمحي لي على هاد الدخلة..
حليمة: مرحبا ..الدار دارك..
دخلات الحاجة نعيمة..
حليمة: كيدايرة أالحاجة مع الوقت..
نعيمة: الحمد لله بنادم يسلك..
حليمة: كلشي هوكاك..
نعيمة: المهم بلا منزيد نطول عليك.. صيفطني دريس باش توجدو وراقكم ونوجدو وراقنا باش يتكاتب مع عايشة
حليمة: يويووويويوويووو مبروك عليهم أختي نعيمة..
نعيمة: اوا نخليك دابا جيت باش نقوليك هاد جوج كلمات ونمشي..
حليمة: تتي بركي تاتشربي تاي وتغداي معانا...
نعيمة: منصيبش أالحبيبة.. مرة خرى نشاء الله..
حليمة: اوا على خاطرك.. يجيك الخير والرباح..
نعيمة: تدوزي بخير الله يعاون..
حليمة قالت داكشي اللي قاتليها نعيمة ل عايشة ..
عايشة: ياه أمي..هههه هي صافي قريبة تتفكي مني هههه
حليمة: واييييه..والمهم باراكا من الهضرة الخاوية .. وترزني شوية وعلى الله مايتعكسوش ليك الوراق.. اللي قدرت نصيبها ليك انا ولا باك غنصيبها واللي خاصك تحضري فيها غتحضري فيها باش متقتليش لي العدول ولا المقدم ولا شي حد ونصدقو معطلين..راني عارفاك..
عايشة: راكي غا ظالماني أمي..هههه
حليمة: ياربي تحضر السلامة من هاد البنت ..
عايشة: امييييين..بقيتي على خاطرك؟
حليمة: يله باراكا من الهضرة..
صيبات حليمة الوراق ل عايشة وبقات شي حاجة خاصها تسني فيها داتها معاها وبالوصايا والحضية باش قدرات متخليها تشوف فحد..
تجمعو الوراق وجا وقت العقد..
دريس و عايشة مقداتهم فرحة..حيت اخيرا شملهم غيتجمع هههه ..
مشاو عند العدول وبقا العدول تيسول فيهم بعض الأسئلة ..
حليمة غير تتطلب ربي يكمل هادشي بخير..باش تتفك..
وبقات خاصاهم السنية على العقد..
متخافوش.. ماوقع والو..هههه سناو وكلشي تفك.. حليمة تفكات من بنتها اللي مكانتش كارهة تصدرها للخارج كسلاح فتاك.. ضد الأعداء ههههه ونعيمة تفكات من الصابون و المسؤولية ديال ولدها باش تلسقو فشي بنت تهزو ويهزها.. اوا الحمد لله ..
خرجو من عند العدول ..ومشاو دارو الغدا عند دار العريس .. وتافقو يديرو شي حفلة بيناتهم ويجيب العروس من هنا لشهر..
بقا تيديها ويجيبها للنادي..
وواحد النهار..
دريس: وا عويشتي؟!
عايشة: نعام ؟!
دريس: تتبغينيو؟!
عايشة: هههههه علاه لا؟!
دريس: تانا نبغيك أ الصgعة ..
عايشة: ههههههه مكاين الصgع قدك..
دريس: ياك ههههه تقولبت..هههه
عايشة: وانا طفرتو هههه
دريس: والمهم أمرتي ..هاد النادي تبغي تحبسي منو فاش تجي للدار؟!
عايشة: لا لا أدريس غير خليني فالنادي راني تعلمت منو بزاف..وباغا نزيد نتعلم..
دريس: مغنبززش علك أ عويشتي.. اللي غترتاحي فيها ديريها..
عايشة: يخليك لي أالقويويس ديالي.. ههههههههه...
اوا..داز الشهر بحال البرق ودارو حفلة صغيرة عرضو فيها العائلة القرابين والجيران..وحليمة تتوصي وتعاود لا بغيتي ليلتك أبنيتي تدوز عرس ومتقلبش لجنازة متشوفي فحد متحضي حد هانا قلتها لك .. ووصي داك المزغوب دراجلك ..را تاهو دقتو صعيبة..
عايشة: كوني هانية أمي.. ههههه
المهم داز كلشي بخير وعلى خير.. وراحت عويشة عند راجلها مقداتهم فرحة.. كيف تيقولو طاح الحك وصاب غطاه.. بقات عويشة تتمشي تعلم فالنادي حتى بدات تتوحم..
داك النهار دريس كون لقا ينقز من الفرحة ينقز..كلشي فرح بداك الحمل.
دوزات عويشة 9 شهور ديالها وجا وقت الولادة..
شدها الوجع وقاتلو نعيمة نجيب القابلة فاطنة؟!
قاليها دريس والووووو مراتي غتولد فالسبيطار..
وداوها للسبيطار .. مقدروش يولدوها القابلات حيت كان عندها مشكل.. وضطرو يعيطو للطبيب باش يفتح ليها..
وفعلا فتح ليها الطبيب .. وكانت المفاجأة هههههههه
غير خرج الدري دايخ من الكرش حل عينيه..شاف فالطبيب . الطبيب طاح فالبلاصة..جاتو الدوخة وطاحليه الطونسيو .. معرفوش الفرمليات مناش.. ولكن عايشة عرفات اش كاين..
الدري خارج حار من الكرش.. التقويسة عندو مطيحش لارض.. عرفات عويشة شنو تيتسناها معاه ههههه
وقالت..
عايشة: ميمتي.. هذا كتر مني وكتر من باه.. ههههه دابا عاد حسيت بمي فاش تتقولي غير تتخرجي دوك العينين تتشدني الخلعة..
المهم..ناض الطبيب من بعد معطاوك الما والسكر هههه وخرج فرح دريس والعائلة ..
الطبيب: مبروك عليكم.. وليد شفتو وانا نسخف ههههه
دريس:(فخاطرو)را هو اللي شافك وهو يبدا الخدمة هههههه...الله يبارك فيك أالطبيب..
وهاكة رضاو بداكشي البي جاهوم..
وولاو قوة وحدة هههههه
النهاية