ريحانة سربي اصاحبتي قادي الكوموند راه الكليان كيتسنى..
ريحانة:افف اصاحبتي هاني كنسربي راه جوج ادين لي عندي خدامة بيهم.
مشات ريحانة غلفات علبة الشوكولاطة وعطاتها للموزع باش اوصلها..
ريحانة خدامة في محل كبير لتجهير الشوكولاطة بانواعها .. الخدمة كتكون كثيرة وخاص كل واحد احترم مواعيدو..المحل لي كيبان بحال مركز تجاري كيجيو ليه غير الناس المهمين و اصحاب الذوق الراقي ..ريحانة كانت خدامة في الاستقبال وحيت ما كينش الزميل ديالهم علي اليوم كان خاصها تغلف بعض العلب باش متوقفش الخدمة لي كتكون كثيرة ..
داز النهار متعب و ريحانة مع وقفات نهار كامل عيات وغير سلات الخدمة وصلاتها صاحبتها كريمة ..
ريحانة:خاصني نمشي غذا بكري نجيب السكوتر ديالي من الكاراج بلا ما نبقا نعذبك معايا..
كريمة:لا عادي ما كاين لا عذاب لاوالو مرحبا فاي وقت نوصلك فيه..
ريحانة:اناري قرصيني عافاك .. كريمة كريمة كتقولي هاد الهدرة ياكما دوخاتك الشكلاط اليوم شفتك غير كتاكلي فيها واقيلا لعبات لك بدماغك..
كريمة:لا لا هههه ما نيتك ناقصة زعما نا جاتش معايا نكون ضريفة ؟؟
ريحانة:لا كون ما كنتش كنعرفك نقولو ضلمتك..غير قولي ليا اش حب الخاطر ثاني ههههههه راني عقت بيك.
كريمة:ههههه ياربي السلامة اي خليني نركز فالطريق ههههه هانتي ملي باغا تعرفي راني بغيت منك طلب صغيييييير بزاااف.
ريحانة:هااا لي قلنا ههههه اما هو الالة..
كريمة:كيف شفتي بدر غيجي غذا للمغرب و بغانا نخرجو بجوج نتافقو امتى غيجي للدار و انا قلت ليه اصبر حتال الاحد ولكن مابغاش..
ريحانة:اهاااااااه و دبا بغيتيني نخدم لك فبلاصتك ههههه..
كريمة:اه عههههههه
ريحانة:ولكن راكي عارفاني مالين الدار ما غيبغيونيش نخدم بالليل و غذا عيد الحب و لا ما نعرف افففف و الخدمة غتكون كثيييرة.. كريمة:عااااافاك اصاحبتي عمري ما ننسا خيرك تعاوني معايا و انا كنواعدك نعوضها لك. ريحانة:صافي صافي انا غنشوف كيف ندير.. يالاه خليت لك الراحة مواااح.. كريمة:يخليك ليلي بيزوووو دعي معايا.. هبطات ريحانة من السيارة وبقات غادية كتفكر فاليوم الشاق لي كيتسناها غذا و في الخدمة الكثيرة و كتنهد حتى وصلات دارهم دخلات لقات ماماها و ختها الصغيرة كيتسناوها للكاسكروت ..جلسات معاهم حطات لختها الشوكولاط لي كبعجبها غير كلات مشات للصالون بقات متبعة البرنامج ديالها حتى اذن المغرب و صلات و جلسات مع الاب ديالها كيتحدثو ملي تعشاو مشات لبيتها و تكات كتشوف فالسقف و كتفكر حتى داها نعاس.. ريحانة كيفما كتشوفو بنت من اسرة متوسطة عمرها 27سنة.و حيوية و كان شكلها مقبول اكثر حاجة كتميزها هي عيونها الكحلين و رموشها الكثيفين بشرتها بيضاء و شعرها اكاجو و ستايلها مقبول و عملي.. كتشتغل في محل كبير براتب جيد يعني قارية على الخدمة ديالها و كتبغيها.. وكتعاون بيها راسها .. الحاجة لي مكتعرفوش على ريحانة انها مطلقة في سن 20 سنة تزوجات ابن عمها لي ماتفاهماتش معاه و انفاصلو قبل العرس و مابقاتش تزوجات عطات وقتها للعمل... --------------------- في الصباح الباكر فاقت ريخانة وجدات راسها دغيا و خبرات الام ديالها انها غتعطل اليوم بحكم انه مناسبة وكتكثار الخدمة مشات بكري خدات السكوتر ديالها من الكاراج و مشات للخدمة لقاتهم يالاه جاو حتى هوما دخلات بالجرا و لبسات اللباس ديال الخدمة و بدات الخدمة.وتفاجات بالعدد الكثير ديال الزبائن اليوم و الطلبات الكثار لي خرجو.و بقات ريحانة مركزة مع الخدمة و هي تسمع شي وحدة
كتعيط ليها: مدموزيل واش غنبقا نتسنا هنا ديها فيا شوبة.. ريحانة:نعم الالة راه الطلب ديالك شوية و اجيبوه ليك.. السيدة:وعلاش انتي ماتجيبيهش لاش مخدمينك هنا؟؟. شافت فيها ريحانة :هادي ماشي خدمتي امدام انا مكلفة غير بتسجيل الطلبات .. السيدة:اش هاد الوقاحة باش كتهضري معايا واقيلا ماعارفاش راسك معامن كتهضري. يالاه بغات ريحانة تجاوبها بينما جاوب الشاف ديالها : مدام الانصاري مرحبا مرحبا كون كنا عارفين واش جايا كون فرشنا ليك الورد. السيدة:مابان ليا والو منين كتجيبو بحال هاد الخدامة ما عندهم ذرة احترام.. الشاف: غير سمحي ليها ماعرفاتكش..ريحانة يالاه اش كتسناي شوفي المدام اش بغات! السيدة: راني قلت ليها توصل ليا الطلب ديالي لكن ماكتفهمش و هاد النوع ما عندي ما ندير بخدمتو فالمحل ديالي.. ريحانة:سمحي ليا ا مدام راتي غلطت ها عو الطلب ديالك.. السيدة:يالاه تبعيني.. شافت ريحانة في الشاف لي اشار ليها تبعها بلا ما تعارض..اما السيدة مشات سبقاتها وهي تبعها ريحانة وهازة الطلبات.. وصلو حدا واحد السيارة فخمة و هي تمشي السيدة جلسات اللور بعدما حل ليها السائق الباب..وجا حل الكوفر لريحانة حطات فيه الطلبات و تمات غادية ملي عيط ليعا السائق تكلم للسيدة بقات ريحانة كتجر رجليها و معصبة .حلات السيدة الزاج و هي تقوليها:باين ليا مازال خاصك االاداب واش ماتعلمتيش تستاذني لالياتك قبل ما تمشي! يالاه طلعي مازال ما سالينة.. شافت فيها ريحانة و تعصبات ما قدراتش ترجع ليها الهضرة و حيت هاد الخدمة مزيانة بزاف ما يمكنش تفرط فيها مافيها باس تحمل شوية ..طلعات حدا السائق وهي كتفكر انها خاصها ترجع تخدم بلاصت كريمة..وبقات السيدة كتكلم فالتلفون وكانت معصبة كتهضر مع شي حد على شي اموال خصو يرجعهم ضروري.. وصلو لواحد الحي رااقي..
بقات ريحانة كتشوف جمال هاد الفيلا ملي خرجات من السيارة و خرجات السيدة وبقات غادية فالحديقة وكتشير لريحانة باش تهز الطلبات وتبعها اما السائق مشا يوصل شي حاجة طلباتها منو السيدة .. بقات ريحانة كتعاير فخاطرها ماحملاتش هاد الوضع ودهلو للفيلا و مشات السيدة جلسات فالصالون وبقات ريحانة واقفة و هي تقوليها السيدة سيري حطي داكشي فالكوزينة..مشات ريحانة كتقلب على الكوزينة وكدور حتى لقاتها بقات ساهية تتمنظر فالديكور و الاجهزة لي فيها ..حتى تفكرات انها تعطلات يالاه خرجات من الكوزينة وهي تسمع شي صداع وقفات بلاصتها وتخبات كتراقب وكتبان ليها السيدة واقفة مع شي شاب وباينة فيهم كيتخاصمو وريحانة ما عرفات واش تخرج عندهم وتبقا حتى يسالي الصداع..بقات كتراقب والصراخ كيزيد وكانو كيتكلمو على شي فلوس وكان الشاب كيتاهم السيدة بلي هي لي تسببات للاب ديالو بالشلل حيت نصبات عليه بقات السيدة كتغوط واحد اللحظة كدفع فالشاب باش اخرج وهو كيقوليها بلي غيرجع حقهم منها..ريحانة كانت مرتبكة ورجعات اللور باش ميشوفوهاش.شوية سمعات صوت باب الفيلا كيتسد و كيتحل مرة اخرى رجعات ريحانة كتطل كتبان ليها السيدة ناعسة وشي ظل حداها وريحانة كتشوف فيهم وبان ليها الشاب ثاني كيقرب من السيدة وملي قاسها بقا كيشوف ايديه لي عامرين بالدم.. غير بانت الصورة لريحانة وهي ترجع للوراء و خايفة و كتقول فنفسها ناري ماتت وهي راجعا للوراء تهرب وضربات واحد الفاز وطاح وعرفات ان القاتل غيكون سمعها خرجات من الباب الخلفي ديال الكوزينة وهي كتجري للحديقة تقاب على الباب و كدور بين الاشجار و كتبكي وكتلفت مرة مرة كتحس بلي شي حد تابعها وبقات تتجري وتخبات وراء واحد الشجرة خايفة ودايرة ايديها علىفمها لا يسمعها وكتطل كيبان ليها داك الشاب كيقلب ومعصب..
وهي مخبية كتراقب حتا ما بقا بان ليه اثر خرجات من ورا الشجرة و بقات كتسلت و كتحاول تلقا الطريق وهي مزال كتبكي بان ليها المسبح من بعيد و عرفات انها قربات للباب وهي مزال كتفكر داكشي لي وقع حتى شدها شي حد من ايديها وهي تغوط دارت وهي تشوف داك الشاب شاد فيها بقوة..وهي مصدومة والهضرة مابغاتش تخرج ليها وكتحاول تفلت ايديها من ايديه ولكن بدون فائدة..
الشاب:راني ما قتلتهاش علاش هربانة؟
ريحانة:طلق مني المجرم بغيتي تقتلني حتى انا.... ناري عتقوني اعباد الله المجرم ..
الشاب: شششش سكتي انا ما قتلتهاش انا لقيتها ميتة..
ريحانة:انا شفتك .. وهي كتشوف فجنابها ودفعاتو بالجهد وهزات واحد اللوح كان في الارض وضرباتو لراسو وبقات كتجري وهي كتش ف فيه دايخ و كيعيط ليها تجي ..ولكن هي ما تلفتاتش كان كيبان ليها غير تهرب تخرج من هنا.. وكتفكر فلي وقع دفعات البوابة وهي كتجري خدات طاكسي بالجرا للدار وهي كتبكي وصلات للدار وشافتها ماماها فديك الحالة وتبعتها للبيت..
الام:مالكي ابنتي ياك لاباس ؟ ماتقوليش ليا جراو عليك من الخدمة؟؟
ريحانة:اه امي غير سيري عافاك خليني بوحدي..
وسدات الباب وجلسات كتبكي وكتفكر شنو دير واش تمشي عند الشرطة تخبرهم بلي وقع ولكن واش غيصدقوها !!ناري هادي اللخرة ليا يااااربي شنو درت فحياتي :0
بقات ريحانة ديك الليلة بلا نعاس و الناس محتافلين وهي فعالم اخر كتفكر شنو دير ..كان الغذ الاحد ماوصلاتها حتى خبار وهي كدور فالبيت ..حتى جات عندها كريمة ودخلات عليها.
كريمة:ناري فين كنتي اصاحبتي الليل كولو كنصوني لك ما فراسكش شنو وقع!؟.
ريحانة:ششش شنووووو وقع؟؟.
كريمة:ماشي مولات المحل لقاوها البارح مقتولة!!.
ريحانة:ممم اناري الله يحفظ شكون قتلها؟؟
كريمة:البوليس مازال كيقلبو على لي قتلها..انا غنمشي دبا
خرجات كريمة بعدما خبرات ريحانة بلي غذا غيديرو الجنازة للسيدة و خاص العاملين في المحل ايجيو..
ريحانة:واخا احبيبة ضروري نجي..
مشات كريمة وخلات ريحانة داخلة في دوامة التفكير وجات عندها الام ديالها جابت ليها الفطور ولكن ما فطراتش حيت ماعندها شهية الخوف ماخلاها تفكر فتا حاجة ..هكاك دوزات النهار كولو كل مرة كتبغي تخرج تعلم البوليس و استغربات كيفاش مازال ماجاو ياخدو الافادة ديالها خصوصا وان السائق عارف بلي ريحانة بقات مع السيدة..
وصل الصباح لبسات ريحانة حوايجها و خرجات هزات قرعة ديال الماء ومشات للمحل تما تجمعو كاع الخدامة و كل واحد جاب سيارتو ركبو مجموعين ومشاو للفيلا فين غيكون العزاء تفتحات البوابة وقلب ريحانة كيدرب بالجهد وكتحس بالخوف وكتبقا تشرب من القرعة دخلو جميع للفيلا و كانت عااااامرة بالمدعوين حتى من الجردة عامرة واغلبيتهم اجانب وناس مرموقين..بقات ريحانة كتمشى وكتشوف مسرح الجريمة و قلبها كيترعد وقررات انها اليوم غتفضي هاد الاحساس وتمشي تخبر الشرطة انها غادرات الفيلا ملي خرج السائق وماشافت حتى واحد.اشار ليهم الشاف باش امشيو اسلمو على عائلة المرحومة واعزيوهم و بقات ريحانة مع كريمة وهي تشوف كريمة فايديها..
كريمة:فيناهو العقد لي كنت دايرة فاديك.؟
ريحانة:ااا وهي كتشوف فايديها.. واقيلا طاح ليا فالدار..
بقات تتفكر انه ما كيفارقش ايديها وخافت ليكون طاح ليها فشي بلاصة هنا ورجع ليها الخوف وكتفكر انها غتكون طيحاتو في الحديقة وهي تنوض..
كريمة:فين غادية انت؟؟
ريحانة:انا غير غنمشي للمرحاض..
مشات ريحانة واتاجهات المطبخ لي كان عامر استاذنات وخرجات من الباب الخلفي و بقات حاضية جنابها وكتقلب على الطريق منين دازت البارح ربما تلقا العقد ديالها وكتقلب فكاع الاماكن بين الاشجار..
ولكن بدون جدوى مالقات والو وخافت بزاف مشات كتقلب على الشجرة لي تخبات وراها امكن يكون طتح تما وغير طلعات راسها كيبان ليها قدامها نفس الوجه.
ريحانة:وهي مصدومة.. شش شكوووون انت؟؟
الشاب:انا نسيتيني! و حابس عليها الطريق..
ريحانة:انت هو المجرم لي قتل المدام ياك انا مازال عاقلة عليك.. (و هي تشجع كثر)انا غنشكي بك للبوليس حيت شفتك المجرم..حيد ليا من طريقي دبا..
الشاب؛ والى مابغينش نحيد منها.وهو حط ايده على الشجرة وماخلاهاش دوز..
ريحانة جمعات القوة ديالها واخا مدة ناكلات ودفعاتو وكتجري وهو يقوليها:جيتي كتقلبي على هذا ياك؟؟
غي سمعاتو وهي توقف ودارت بان ليها كيلوح بالعقد ديالها ماعرفات باش تبلات وحسات بلي حياتها غتدمر..وهي ترجع عندو.
ريحانة:رجعلي العقد ديالي دبا..
الشاب:لا لا لا ماحدك كتقولي عليا مجرم وانا بريء ماغتشوفيش العقد ديالك هو غيوصل عند البوليس وحيد كاين شاهد عليك غادي دفعي ثمن جريمة انت مادايراهاش...
شافت فيه ريحانة وبداو دموع كيهبطو ليها فحياتها ماعمرها حسات بهاد الخوف القاتل فجوفها وعينيها كيدمعو وهي كتشوفيه وكطلبو غير بعينيها ..
الشاب:دور وجهو وقاليها:بلا ما تشوفي فيا دوك النظرات وهو كيتفكر اختو حيت حتى هي كدير فيه هاد النظرات حس بالندم ..
ريحانة:انا ماخايفاش منك انت مجرم وخصك الاعدام..ودبا غنخبر البوليس..
الشاب:واخا سيري وغادي اجيو ليك حتال الدار..
شافت فيه ريحانة وهي ماكتيمع والو وعينيها كيدمعو والضباية حابسة عليها الرؤية وحسات بالسخونية في راسها وهي طيح.. ملي فاقت لقات راسها فشي بيت و دايرين ليها السيروم و ماكاين حتى واحد.شدات راسها حيت ماكلات والو نهار كامل داكشي علاش سخفات..بقات تتشوف الغرفة وهي تنوض حيدات السيروم و قررات تخرج من الغرفة و من حسن حظها مابان ليها حد
خرجات كتسلت ومن الديكور عرفات راسها فنفس الفيلا وشافت ان الساعة وصلات العشية واكيد الناس مشاو للمقبرة وهي تتحاول تصبر شادا كرشها وخرجات من الفيلا بلا عقل شدات طاكسي وصلها لدلرهم ماكانتش ماماها كانت غير ختها ومشات لبيتها ونعسات مافاقت حتا الليل كلات شوية باش ماتسخفش ثاني ونعسات حتال الصباح جاها اتصال بلي الخدمة غتستامر وخصها تجي ضروري تعوض اليوم لي ماخدماتش. فاقت لبسات دغية وفطرات باش اكون عندها جهد للخدمة وكتقلب على صاكها ومالقاتوش تعصبات حيت فيه الهوية ديالها وعرفات راسها نساتو فالحديقة فين سخفات..سمعات ماماها كتعيط هبطات سلمات عليها وكملات الطريق للخدمة..استاغربات كيفاش ان الخدمة استمرات واخا السيدة يالاه ماتت.شافت الناس خدامين ودخلات حتا هي فجو الخدمة لي ماكتساليش خصوصا انها خاصها تعوض داك النهار لي تغيبات النهار كولو وهي واقفة وكتسربي ومرة مرة كتسلت حتى كتاكل وصلات الستة وبداو الخدانة ميمشيو بقات هي تكمل شي حسابات جا عندها الشاف قاليها ماتسدي المحل حتى تكمليهم .بقات هي وكريمة وشي خدامة وصلات 9 ديال اليل وخرجو هوما هي مزال ماكملات سدات عليها المحل وبقات خدامة فاش سلات الخدمة دخلات للغرفة تبدل وتخرج وهي تسمع شي صوت حبسات اللبس وبقات واقفة كتصنت وخايفة لا يكون شي شفار داخل عليها وخرجاتوكتسلت طل شتو دامشي سمعاتو اصوات ديال جوج رجال بقات تترعد وكتطلب ربي مايشوفوهاش وكتقلب على الهاتف باش تاصل بالشرطة.. والمحل كبير تخبات فواحد الركينة وكتسمع بانو ليها كيقلبو على شي حاجة تخلعات وقررات تكمل البحث على الهاتف وهي قاست شي حاجة وطاحت ليها وخافت بدات تترجع لور وشدها شي حد من ايديها وغوتات ماكيبانش ليها الوجه ديال لي شادها مزيان حيت الضوء قليل.. ريحانة:عافاك اخوبا ماتاذينيش.
خودو لي بغيتو وغير ماتقتلونيش عافاكم..
وهي كطلب فيه جا الشخص لاخر لي معاه.
السيد2:شكووون هادي وشنو كدير هنا شافت كولشي ياك..
السيد1 لي شاد ريحانة:صافي سكتنا..وهو مزال كيشوفيها..
ريحانة شافت فيه مزيان وجا فيه الضوء وعرفاتو..
ريحانة:ن ننتا ثاني راني عرفتك انت لي قتلتي المدام وجاي باغي تقتلني..
السيد2:يالاه دير الازم وهنينا منها بان ليا عرفاتك والى بقات عايشة غتفضحنا..
السيد1 مزال شاد ريحانة:قلت لك خليني نتكلف ماعرفاتناش ..
ريحانة:عافاكم غير خليوني نمشي فحالي والله مانشكي بيكم..
طلقها و حاولات تهرب شدها السيد لخر ودار ليها الزيف على نيفها وهي تسخف..
السيد1:اش درتي المسخوط باغي تقتلها حنا ناعندنا غرض بيها خليها تخرج من هنا..
السيد2:اش كتخربق حنا جينا ناخدو الوراق ونخرجو بلا مايشوفنا شي حد ما قادين على مصيبة وهادي خرجات لينا من الجنب خصنا نتفكو منها.
السيد1:لا حماقيتي ماغاديش نخليك تقتلها..
السيد2:ياكما جاتك الشفقة عليها راحنا خدامين اسي نسيني غراضنا..
ومشا جيهة ريحانة و باغي يقتلها..ملي جاتو الضربة من اللور وبقاو كيضاربو..
السيد1:بصاح حنا جايين ناخدو حقنا ولكن ما بغينش هاد الانسانة تموت وهي مادارت غير خدمتها غنخليوها هنا ونمشيو.
خرجو بجوج وخلاو ريحانة تما فالصباح جاو الهدامة ومامات ريحانة و باباها كيجريو لقاوها مغيبة وداوها للصبيطار وقاليهم الطبيب انها غير فقدات الوعي نتيجة مادة مخدرة. وبقات ريحانة فالصبيطار حتى فاقت و جا الشاف ديالها سولاتو واش وقعات شي حاجة في المحل قاليها بلي الفلوس كاينين.. مامشات حتى حاجة من المحل..وهي ماقالت والو كانت خايفة لا تقول شي حاجة تندم عليها من بعد.بقات الام ديالها مقابلاها ملي خرجو من الصبيطار ارتاحت شي ايام ورجعات ثاني للخدمة ديالها و للروتين
بقات خدامة شي ايام كيف العادة ومرة مرة كتفكر فهادشي لي وقع..وهي منهمكمة في شي حسابات وقف عليها شي حد.. ريحانة:السلام عليكم مرحبا اسيدي خاصاك شي حاجة؟ السيد:انت ريحانة قاديري ؟؟. ريحانة:نعم اسيدي هيا انا. السيد:معاك الشرطة تفضلي معانا شوية للمركز.. وبدون تردد مشات معاهم ريحانة وخايفة..سولاتو شنو الموضوع ماجاوبهاش.دخلات ريحانة عند الظابط لي بقا كيسولها شي اسئلة على مدام الانصاري هنا حسات ريحانة بلي خاصها تعاود لهم الحقيقة باش تفك راسها ولكن الامر زاد تعقيدا ملي ماصدقوهاش خصوصا وانها ماجاتش علماتهم فاش وقع المشكل..حسات بلي ولات هيا المتهمة الاساسية في القضية.. ريحانة:ولكن اسيدي انا مادرت والو.. الظابط:تقدري تمشي دبا وملي نبغيوك غنعيطو ليك. خرجات ريحانة من المركز ومشات تكمل خدمتها وهي تالفة غير كتخربق..جا عندها الشاف طلبها توصل شي حاجة للفيلا ولكن اعتاذرات وطلباتو يصيفط شي واحد ومشات تكمل الحسابات..وقف عليها شي خد مرة اخرى.. الشاب:السلام عليكم. ريحانة:انت ثاني شنو كدير هنا خرج فحالك المجرم.. الشاب:كيضحك..انا ماشي مجرم وبحال والو تكوني انت المجرمة.على اي انا ماجيتش لهنا.. مزال ماكمل كلامو وهي تقوليه ريحانة:خرج فحالك لاش تابعني.. الشاب:تايقة فراسك بزاف .. وهو يجي الشاف:اهلا سي مروان مرحبا زارتنا البركة. ريحانة بقات غير كدور فعينيها تصدمات.. الشاب:شكرا انا غير جيت نشوف كيف غادية الخدمة راك عارف شنو واقع هاد الاواخر..الشاف:غير تهنا اسي مروان كولشي غادي مزيان.تقدر طالع على الحسابات..ريحانة وري لسي مروان الحسابات ديال هاد الشهر.. ريحانة اشارت براسها بالموافقة.. مروان:غير تفضل لخدمتك.ومشا كلس فالمكتب وكيتسنا ريحانة تجيب ليه الوراق. ريحانة بقات مترددة فهاد الموقف ضرها راسها من هادشي
هزات الملفات وطلعات للمكتب دقات وهي تحل الباب كان عاطيها بظهرو ملي دخلات دار وقاليها جلسي جلسات وهي تحط ليه الملفات قدامو وبقا كيسولها على شي حسابات..وهي كتشرح ليه وكتفكر كيفاش اقدر بنادم اقتل روح..ومرة مرة كتشوف فيه وكتقول مع راسها المظاهر خداعة انتبه للنظرات ديالها و هو يقوليها يالاه هزي عليا هادشي و خرجي عليا من هنا استغربات لهاد التعامل وهي تجاوبو:بلا ماتعذب راسك ماكيشرفنيش نبقا مع المجرمين ..غير سمع هادشي تعصب و هز واحد العلبة فوق المكتب ضرب بيها فالارض و طار واحد الطرف منها جا لريحانة فوجهها وجرحها شوية..وهي تقيس وجهها وكان فيه شوية ديال الدم.. مروان:اخر مرة تقولي عليا هاد الهضرة فهمتي وماتنسايش راسك عند من خدامة. ريحانة:انت ماشي راجل لي كتطاول على النساء.. تعصب وهو يقوليها:ماتنسايش بلي الهوية ديالك عندي والعقد فاي لحظة نقدر نغرقك فالحباسات.. ريحانة تشجعات وهي تقوليه الى كنت راجل ديرها و هاد الخدمة ماخارجاش منها حيت كولشي كيحتارمني وعارف مكانتي هنا..وهاد التهديدات ديالك انت لي غطيح فيهم الى ماغرقتك انا ماكنتسماش ريحانة.. وهي تزدح الباب فوجهو وخرجات كملات خدمتها وهي كتعجب منين جاتها الشجاعة باش تقوليه هاد الهضرة.. سالات الخدمة ديالها ولبسات حوايجها وطلعات فوق سكوترها و دارت الكاسك وبقات غادية مكسيرية وكتفكر شنو غدير.. وفالطريق وقفات ليها سيارة فالطريق وكانت غدخل فيها حبسات السرعة وهي تهبط معصبة وغادية جيهت السيارة وكتخاصم غير هبط الزاج و هي تشوفو..وتمات راجعة تكمل الطريق ملي هبط ولاح ليها العقد و الهوية قدام رجليها شافتهم وهي تهزهم وشافت فيه باحتقار.. مروان:انا ماعنديش الوقت لي نضيعو معاك الى باغا تلعبي لعبي مع قرانك نتمنى مانشوفش وجهك مرة اخرى..
كملات ريحانة طريقها وركبات ومشات لدارهم وهي كتشكر الله حيت نجاها منو وهي ماقادة على صداع..كمل مروان طريقو لدارو وهو مرتاح حيت تهنا منها باركة عليه الهموم لي عندو..لقا ختو فبيتها و هي كيف ديما ماكتحركش جات الممرضة وهي تقوليه بلي العلاج ديالها ماعندو حتا تاثير عليها الصدمة لي تلقاتها مازال مأثرة عليها..مشا حداها وبقا كيداعب فشعرها وهي كتبكي بصمت خرج معصب وجلس فالحديقة وكيتحسر على ختو لي ضاعت منو والاب ديالو لي فجيهة..جا خوه عادل ولقاه فديك الحالة.. عادل:مالك ثاني؟؟ مروان:راك عارف مالي .. عادل:اففف صافي ياك انا قلت ليك ندخلوها لشي مصحة ونتهناو.. شاف فيه مروان بغضب:وانا كنقوليك لا مايمكنش نتخلا على اختي واش عارف شنو كتعني توام ديالك راها جزء مني وانت بلا ضمير.. وناض وخلاه.. عادل:اففف داير ليا فيها الدراما ثاني..خليني نمشي نسهر فشي بلاصة نقاد المزاج.. --------------------- داز اسبوووع وريحانة عايشة حياتها عادية لكن نفسيا كانت كتعذب و صورة الجريمة لي شافت مازال بين عينيها عيات من الكوابيس.. وفي الفيلا ديال عادل و مروان.. عادل: كيهضر فالتلفون.. راه قلت ليك خاصك تشوف لينا شي حل مع هاد الوضع خاصنا نسجلو كولشي بسميتنا.. دخل مروان وهو يقوليه معامن كتهضر.. عادل اشار ليه يتسنى حتا يكمل.ملي سالا. عادل:كنهضر مع المحامي لي قاليك ما غتوزع الثروة حتا يعرفو القاتل الحقيقي ديال ديك العقروشة..اففف مالقات امتى تموت غير دبا.. مروان:الى بقيت معاك غير غنحماق خليني نمشي.. وبغ خرج وهو يقوليه عادل:زعما ماتكونش انتا لي قتلتيها؟؟؟ تصدم مروان وهو يخنزر فخوه لي سكت.. --------------------- ريحانة كانت خدامة ثاني ملي جاو الشرطة وداوها وهي مافاهمة والو ..كلفات كريمة تعيط ليها على واليديها يوصلو عليها..
مشات ريحانة خايفة وكتعجب كيفاش لقاو عليها القبض بهاد الطريقة .وصلو للمركز بقاو كيحققو معاها وهي كتجاوب على اساس انها مشات غير تعاون السيدة..شوية خرج الظابط لي مكلف بالتحقيق وبقات كتسنى داز بزاف ديال الوقت و هي متوترة وكتطلب ربي يعاونها هي غير مجرد شاهدة.دخل ثاني الظابط..وقاليها بلي واحد من الجيران ديال السيدة شافها داك نهار وهي مع السيدة وهو لي عطا الافادة ديالو..وبما انه هاد الدليل بوحدو لي كاين مايقدروش القيو عليها القبض حيت مازال مالقاو اداة الجريمة او اي دليل اخر..ترددات تخبرهم ولكن اخيرا قالت لهم بلي شافت سي مروان داك نهار كيتخاصم هو والسيدة فالصالون يعني قبل ما توقع الحادثة..خرج الظابط وطلب حضور مروان و جلسوهم مع بعض يتواجهو.. الظابط:هادا هو الراجل لي شفتي مع السيدة؟. ريحانة وهي كتشوف فمروان وخايفة:اه اسيدي هو لي شفت.. مروان مهدن: انا ماننكرش بلي كنت معاها ولكن انا خرجت وخليتها حية و ماتنساوش بلي انا لي بلغت على الجريمة. ريحانة:كييييفاش؟؟ الظابط:كيفما سمعتي.. سي نروان سبق ليه قدم الافادة ديالو وهو فاش رجع لقا السيدة ميتة وعيط لينا. ريحانة:ولكن انا قلت لكم بلي هو لي كان معاها وانا شفتو فاش قتلها.. الظابط:واش شفتيه وهو كيضربها باداة الجريمة؟ ريحانة:انا ماشفتش مزيان انا شفت غير ليدين ديال القاتل وكانو كلهم دم.. مروان(:سمح ليا اسي الظابط ولكن هي غير كتاهمني وهي ماشافتش واش انا لي قتلتها.. الظابط:ماتهضرش نتا حتى نعطيك الاذن..ريحانة شوفي راكي كتاهمي انسان وفق لمجرد توقعات يعني هادشي كيتسمى تخربيق وحنا هنا باش نخدمو ماشي نسمعو توقعاتك.. ريحانة:والله الى غير كنعاود لكم الحقيقة وانا كنت خايفة وماجيتش خبرتكم..والله الى انا بريئة عافاك خليني نمشي.. الظابط:ما كنضنش غتمشي!
ريحانة:كيفاش زعما شنو انا غنبقا هنا؟. ناض الظابط خرج هو و مروان وخلاوها تابعاعم ملي سدو عليها الباب.. ريحانة:والله ما درت شي حاجة انا غير مضلومة... خرج سي مروان و كيقاد فالقميجة ديالو.. ملي تلاقا مع عائلة ريحانة شاف فيهم وحس بالشفقة عليهم ولكن دغيا تراجع ومشا للدار ديالو.. في الفيلا.. عادل:فين كنتي من الصباح وانا كنصوني ليك؟؟. مروان:كنت في المركز.. عادل:بان شي جديد فالقضية؟؟ مروان: اه راهم لقاو شي وحدة كانت داك نهار فالفيلا وهي دبا لي ولات متهمة في القضية حيت ما مشاتش تعطي الاقوال ديالها نهار الجريمة.. عادل: يعني صافي هيا القاتلة؟؟ اوووووه هادشي مشوق هههههه. مروان:لا مزال ماكاين شي دليل قاطع عليها هي مزال في المركز كياخدو الاقوال ديالها..اووففف خليني من هادشي دبر راسها..غنمشي نشوف اختي كيف بقات.. خلا خوه ومشا عند ختو لي كانت ناعسة وكتدوي باينة كتحلم بشي كابوس مزعج.. مروان:اختي مالك فيقي!! بسمة:لااااااا غيقتلووني . مروان:فيقي عافاك غير كتحلمي!!! فاقت اختو مرعوبة و هو كيهدن فيها وجات الممرضة ولكن هو قاليها غير خليني معاها شوية.. مروان: ششش صافي كان غير مجرد حلم.. بسمة:خويا راهم غيقتلوني انا بغيتهم ادخلو الحبس انا خايفة بزاااف عافاك ما تخليهمش ايجيو ليا مرة اخرى انا كنشوفهم ديما ديما.. مروان:شششش صافي نساي داكشي. جات الممرضة لي شافتها تتهلوس وعطاتها مهدأ ونعسات.. --------------------- في المركز..ريحانة مزال كتسنا وجا الظابط.. ريحانة:غافاك خرجوني من هنا والله مادرت شي حاجة..ماعندكم عليا حتى دليل.. الظابط:عندك الزهر خرجتي اليوم بكفالة ولكن راكي مازال تحت الاتهام حتى نلقاو شي دليل عليك.. خرجات ريحانة كتجري وعنقات ماماها وبابها وختها وهي كتبكي.. ريحانة:ماما والله ما قتلتها
الام:عارفة ابنتي نتي ما يمكنش تاذي شي حد.. الاب:بنتي علاش ماجيتيش وعاودتي لينا شنو وقع ليك ..كان بامكاننا نعاونوك ماشي تخبي الشهادة ديالك حتى تولي ضدك.. الام:ماشي وقت هاد الهضرة هادي خلي عليك البنت باركة لي فيها يكفيها ماكتشوفش لونها كيف مخطوووف.. الاخت الصغيرة:اختي واش غتمشي للحبس؟؟ بقات ريحانة كتشوف فختها الصغيرة وكدمع ملي جا شي واحد وهزها وقاليها: لا احبيبة اختك غاتبقا معاك ديما ماتخافيش!! الاخت الصغيرة:بصاح اعمي!!. ريحانة: ممكن نعرف شكون انتا لي كتدخل فالامور ديالنا العائلية؟؟ الام: كوني تحشمي عوض ما تشكريه كتقولي ليه هاد الهضرة عيب عليك.. السيد:غير خليها غتكون مازال تحت الصدمة.انا عادل و مد ليها ايديه.. ريحانة:ومن بعد؟؟ الام:راه كون ماشي هاد السيد كون ماخرجتيش اليوم من تما.. ريحانة:كيفاش زعما ماشي نتوما لي خرجتوووني؟؟ الاب:سمحي لينا ابنتي ماكانش عندنا داك المبلغ كولو وهاد المحسن الله يجازيه بالخير كمل لينا الباقي!! ريحانة:شكرا ابابا حطيتوني فهاد الموقف..ولكن اسيدي كون هاني فلوسك غنرجعوهم لك في اقرب وقت..زيدي اماما.. الام:سمح لينا اولدي راك عارف مازال مصدومة.. عادل:ماشي مشكل الالة خودو راحتكم!الى بغيتو نقدر نوصلكم؟؟ ريحانة:الله الله ياكما يصحابليك راسك البطل الخارق..راه بابا عندو السيارة ديالوو. الاب:سمح لينا اولدي.. مع السلامة. ومشاو وخلاو عادل واقف كيشوف وكيفكر كيفاش ايدير اتقرب من ريحانة...... دخلات ريحانة للدار شربات اسبيرين ونعسااات مافاقت حتال الليل وراسها كيضرها..مشات توضات وصلات وبقات تتدعي ربي يفكها من هاد الورطة ويوريها الطريق الصحيح..حتا من الخدمة مابقات بغات تمشي ليها حيت عارفة راسها غيجري عليها بعدما تاهمات مول المحل بلي هو القاتل..بقات تتبكي بوحدها ..
داز اسبوع وريحانة جالسة غير فالدار رهقها التفكير دينا كتجي عندها كريمة وكتبقا معاها وديما متطلبها ترجع للمحل حيت الشاف ديما كيسول فيها..وريحانة رافضة هادشي حيت عارفة بلي الى مشات غتبهدل وبلي الى شاف فيها شي حد نظرة شفقة او اتهام غادي تجرح.. واحد النهار الاحد اصرت عليها مها تخرج شوية وعيطات لكريمة تجي تخرجها بزز.لبسات ريحانة و طلقات شعرها و دارت النظارات و لاحت فوق راسها وشاح.. كريمة:مالكي دايرة فراسك هاد الحالة بحال شي مجرم هارب من العدالة؟؟ ريحانة:وكيفاش بغيتيني نخرج والناس ماكاين فعينيهم غير الاف الاسئلة باربي اش داني لتما.. كريمة:صافي نساي عليك هادشي ويالاه نفوجو شوية.. وصلو حدا البحر وبقاو غاديين مع الامواج وريحانة كتطلب ربي تفوت هاد الحالة لي عايشاها وكان الريح شوية ودا ليها الوشاح لي كانت دايرة فوق راسها وبقات تابعاه حتى وصلات فين طاح تحنات تهزو.. وهي رافعة راسها كيبان ليها شي حد قدامها و مع الشمس ماكيبانش ليها وجهو واضح.. السيد:انسة ريحانة! ريحانة:نعم اسيدي كانعرفك؟؟ السيد:حيد النظارات !اه هاذا انا عادل نسيتيني؟ ريحانة:فخاطرها صبحنا على الله..شنو حى الخاطر فلوسك راه غادي نعطيهم لك فاش اكونو عندي.. ومشات وخلاتو تتجري عند صاحبتها. كريمة:شكون هاداك؟؟ ريحانة:والو غير شي واحد تالف كيسول على الطريق.. كريمة:مممم واخا انا تيقتك.يالاه احبيبة راه دايرة مع الشاف بغا يهضر معاك فواحد الموضوع.. ريحانة:كيفاش زعما تاصلتي بيه يجي لهنا؟؟ الله يسمح ليك شكون قاليك بغيت نهضر فالخدمة؟؟ كريمة:ريحانة صافي ديري عقلك هو غير بغا يهضر معاك خلينا نشوفو شنو غيقول . مشاو لواخد الكافي كان فيها الشاف ديالهم كيتسنا بقا كيهضر مع ريحانة وقاليها بلي سي مروان ماعطا حتى شي امر باش اطردها وخصها ترجع
اقتانعات ريحانة باش ترجع للخدمة خصوصا انهاا محتاجة تخلص الدين لي عليها.. فاقت نهار الاثنين وقررات تبدا الخدنة وتنسى دوك المشاكل.. مشات للخدمة و لكن اغلبية العاملين كيهضرو وراها وحاولات ماتديهاش فيهم.كانت كتحسب شي فاتورات و كتستقبل الزبائن.ملي دخل عادل. عادل:اهلا اش هاد الصدفة الزوينة انت خدامة هنا؟ ريحانة:اه اسيدي شنو حب الخاطر؟ عادل:وخا انا عارفك خدامة دبا ماغنشدكش بااهضرة.جيت غير ناخد كومند. ريحانة:تفضل هاهيا الائحة اختار لي عجبك. عادل خدا الائحة ومشا لاغلى حاجة اختار شوكولا من النوع الممتاز ومعاه الورد مزينين بطريقة راقية. ريحانة:عندك الذوق تفضل تسنا غيوجدوه ليك.. بقات ريحانة خدامة تحت انظار عادل ولكن تجاهلات وجودو وكملات خدمتها ملي قادو الطلب ديال عادل عطاتو ليه وخلص و خرج..جا الشاف كيدور على الخدامة.. الشاف:ريحانة امدرا ياك مرتاحة ماكاين لي كيزعجك؟ ريحانة:لا اسيدي كولشي مزيان بفضلكم. الشاف:انت موظفة ممتازة لذلك مانقدروش نلقاو بحالك. ريحانة:شكرا. الشاف ممكن نطلب تسبيق من الخلصة ديالي؟ الشاف:واخا ولكن تسناي حتى يدخل سي مروان بما ان هو المدير الجديد والمالك ديال المحل اعطى الاوامر ماتخرج حتى حاجة بدون موافقتو. ريحانة:واخا اسيدي حتى يجي و نقولها ليه. كملات ريحانة الخدمة ديالهاوصلات العشية ودخل سي مروان غير شافتو دخل للمكنب ترددات تمشي تواجهو ثاني خصوصا بلي اخر مرة تاهماتو.ولكن تفكرات الدين وهي تشجع دقات في الباب سمعات صوت كيقولها دخل دخلات.. مروان:نعم اش كاين؟ ريحانة كتمشا جيهتو :انا جيت بغيت نهضر معاك. مروان:انا كنسمعك قولي شنو عندك دغيا.. ريحانة:جيت بغيت تسبيق من الخلصة ديالي.. مروان حط القلم من ايديه وشاف فيها بغا يضحك ملي صونا الهاتف ديالو قاليها بلاتي نجاوب.
مروان:الووو شنو واقع؟ المتصل:سي مروان اجي دغيا راه اختك خرجات من الدار حيت مالقيتها فحتى بلاصة. مروان:ششششنوووو وانت شنو خدمتك الى ماقابلتيهاش هاني جاي دبا. حط التلفون وناض مروان بغا يخرج. ريحانة:وداكشي علاش جيت انا؟؟ شاف فيها مروان وهو كيلبس الجاكيت ديالو.. مروان:حيدي قدامي دبا.. ريحانة:ولكن انا محتاجة القرض ضروري. قرب منها وقاليها:ماعرفتش شنو لي مصبرني عليك ماعرفتش علاش ماقادرش نجري عليك!والى مابغيتيش نجري عليك دبا حيدي من قدامي.. خرج بسىعة وخلا ليها الريح بقات تتشوف هاد الجو المشحون بيناتهم لي كيزيد كلما تلاقاو. ريحانة:افففف مالو ثاني شكون غيكون تاصل بيه.. وانا مااالي اش بغيتو مزيانة فيه نيت. كانت بغات تخرج ملي جاها الفضول تجاه المكتب ديالو.مشات ليه وجلسات فوق الكرسي.بان ليها المجر مفتوح والساروت فيه زاد فضولها ملي شافت واحد العلبة فتحاتها وهي كترعد لقات فيها تصويرة شي شابة و2رجال و السيدة الانصاري لي ماتت و لقات في واحد قطعة من جريدة دازت عليها عامين هزاتها بانت لي نفس صورة الشابة وهي في المستشفى بدات تتقرا المقال وتصدمات كان مقال ديال شابة تعرضات للاغتصاب من طرف 2اشخاص مجهولين.تصدمات ومزال كتفكر اش هادشي واقع ملي تفتح باب المكتب بسرعة وقفات ورمات الجريدة حيت لي بان ليها قدامها خلاها مصدومة كان سي مروان واقف وكيشوف فيها بنظرات كلهم غضب نفس النظرات لي كان كيشوف بهم في السيدة قبل ماتموت.حسات بالنهاية ديالها ملي سد الباب وجا جيهتها. مروان:حطي داكشي من ايديك. قالها باعلى صوتو لدرجة كاع لي فالمحل جاو كيدقو الباب. مروان:حتى واحد مايبقا حدا الباب الى لقيت شي واحد غنطردو.. ريحانة:سمح ليا والله غير جيت بغيت نسد المجر.. مروان:كتجسسي عليا باغا تصيفطيني الحبس.شدها من ايديها بقوة.
ريحانة:لا والله ماكانت نيتي .. مروان:سكتي مابغيتش نسمعك..شكون سلطك عليا دوييي. ريحانة:مافهمتش.. شدها من وجهها وزير عليها.. مروان:غتقولي ليا ولا غنتبعك لديك لي ماتت. كانت ريحانة كتشوف الموت قدام عينيها وحاسابراسها غتفقد الوعي طلع ليها الضغط بزااف.وبدات تتبكي وتتطلبو يخليها تمشي.. مروان:انت مصيبة سلطك شي حد عليا دوي قولي شكون. ريحانة ماكتجاوبش بقات غير كتبكي وكتحرك راسها بالنفي..بقا كيشوف فيها كتبكر وتفكر ختو تفكر ان ختو بكاوها دوك المجرمين قبل حس بلي كيفجر غضبو في انسانة بريئة..ريحانة كانت كتحس بلي غتفقد الوعي فاي لحظة هو خانقها وكيفكر..ملي حس بلي ايديك ريخانة لي كيمنعوه بداو كيترخاو شاف فيها وتصدم شنو كان غيدير حيد ايديه على فمها وطلقها ومشا هز الهاتف ديالو لي نساه فوق المكتب وشاف فيها كانت جالسة في الارض وكترعد وهو يحل الباب وخرج لقاهم كلهم كيتسناوه اخرج بداو كيتجاراو عند ريحانة.. خرج ومشا فسيارتو للفيلا..كان عادل كيراقبو وكان هاز الطلب في ايديه وكيتسنا فسيارتو ريحانة تخرج. بقات ريحانة مصدومة وكريمة جابت ليها الماء ملي شربات تهدنات وكتلعن راسها حيت تخطات الخصوصيات ديالو وهي عارفاه مجرم خطير غياذيها.. طلبات من صديقتها توصلها لشي بلاصة مريحة وخرجو بجوجات ملي بان ليها عادل جاي جيهتهم وهاز الورد..تعصلات عليه ولاحت عليه داكشي وخلاتو وركبات مع صاحبتها ومشاو للبحر..اكثر مكان كيريح الاعصاب واينسيك فالمشاكل غير وصلو لتما بدات ريحانة كتبكي وصاحبتها كتهدن فيها..وهوما كيتمشاو شافو الناس مجموعين على شي حد. كريمة:واقيلا شي حد غرق.اجي نشوفو.. مشاو كيدفعو فالناس حتى هوما باش ايشوفو وطلات كريمة يالاه بغات طل ريحانة مالقاتش بلاصة. ريحانة:شكون هاداك واش غرق؟ كريمة:لا شي بنت هادي مسكينة
ريحانة: واش عيطو للاسعاف وهوما مجموعين عليها تما؟؟ كريمة:ماعرفتش اصاحبتي شفتي الدنيا كتخلع. يالاه بغاو امشيو و كتبان ليهم سيارة الاسعاف جايا و كيحاولو اسعفوها و الناس بعدو من البنت.دارت ريحانة تشوف شكون هاد البنت لي قررات توضع حد.لحياتها وكون غير مادارت. ريحانة:هي هي نفس البنت. كريمة:شكون هادي؟واش كتعرفيها؟ ريحانة:ناري اش هادشي كيفاش حتا مافكرتش فيها اجي ا كريمة.. مشاو قربو كثر للضحية لي مجموعين عليها المسعفين وماكانتش كتستاجب.سمعو شي صوت رجولي من بعيد وكولشي تلفت..وكان مروان جاي كيجري وكيعيط باسمية اختو.ماوقف حتى هزها بين ايديه.. مروان:اختي فيقي حلي عينيك انا جيت عندك.. المسعف:ماغاديش تفيق.. مروان:كيفاش ماغاديش تفيق؟اش كتقول؟ راه اختي هادي ومايمكنش تموت بهاد الطريقة.. المسعف:خلينا نديرو خدمتنا اسيدي.. مروان:حتا واحد مايقرب منها..بسمة فيقي اختي ماتخليش خوك بوحدو عافاك.. بقاو كاع الناس كيشوفو المشهد الحزين..فارقات بسمة الحياة وخلات البحر يغسل داكشي لي وقع ليها.. بقات ريحانة وكريمة كيتاملو المنظر مصدومات..والناس بداو كيمشيو وبسمة بعدوها المسعفين على مروان غير بزز..هو جلس كيبكي..وهنا حسات ريحانة بالحزن عليه واخا كان كيعاملها خايب لكن هو الان يحتاج لي يتعاطف معاه.كان منظرو مؤلم ولكن ماعمر ريحانة انتبهات لوسامتو حتال اليوم كانت صورتو الحزينة بين عينين ريحانة معلقة بغات تمشي تواسيه وخافت ادير شي ردة فعل ضدهاوكريمة منعاتها لكن هي ماهمهاش هادشي حيت من الواجب ديالها توقف معاه واخا ماكتعرفوش شي معرفة قديمة لكن من الجانب الانساني خاصها تعاطف معاه.مشات وقفات حداه. ريحانة:البركة فراسك! شاف فيها وهو ينوض..بقات ريحانة كتشوف فيه وهو ماقادرش انوض ومشا ركب فسيارة الاسعاف مع ختو..
مشات ريحانة للدار وجلسات مع واليديها خبراتهم انها ماتقدرش تكمل الخدمة.تفهمو الوضع ديالها وتعشاو ومشات تنعس..بقات تتقلب فالفراش ماقدراتش تنعس كلما كتغمض عينيها كتبان ليها صورتو وحسات بالشفقة على حالو وكتفكر فحالتها هي وكيفاش في هاد المدة القصيرة تقلبات حياتها لي كانت عادية جدا وبقات تتبكي ماعرفات واش تبكي على راسها ولا تبكي على البنت لي ماتت. --------------------- فالمستشفى كان مروان كيتسنا الاجراءات اكملو مابقاش قادر اوقف على رجليه مازال ممصدقش بلي ختو التوأم ماتت تفكر خوه وتاصل بيه ولكن تلفونو طافي.. مروان:اففف فين كاين هذا ثاني.ياربي اش هادشي كيفاش غنتقبل انني نبقا بوحدي. الطبيب:انت من عائلة الضحية؟ مروان:اه انا خوها. الطبيب:البركة فراسك تقدر تمشي تسلم المستلزمات لي كانو مع الضحية.. مشا مروان خدا السنسلة والخاتم لي كانت دايرة ختو وبقا جالس قدام المستشفى وكيبكي..جا عندو واحد الراجل كبير في السن وقاليه:غير صبر اولدي هادي حال الدنيا اكيد فقدتي شخص عزيز على قلبك. مروان:فقدت روحي وتوأم روحي ماقادرش نصبر.. داز الليل طويل على مروان من المركز للمستشفى وهو كيتسنى يصبح الحال اديرو الجنازة..وصل الصباح وتكلف واحد صاحبو بالجراءات ديال الدفن.. كانت الشمس ساطعة وهوما فالمقبرة وكيدفنو بسمة .ومروان كيبكي وكولشي كيسغرب وعادل لي ماطيح حتى دمعة..واخا هي اختو غير من باه..وهو لي ماطيح حتى دمعة على مو كيفاش يقدر ابكي على اختو. المقبرة بداك كتخوا ومروان جالس حدا القبر وكيبكي. عادل:يالاه اصاحبي راه الشمس غضربك وانت ماعندك باش تفيدها بالجلوس ديالك هنا. مروان:سير انت عارف بلي ماكتهمكش من هي حية خلي دبا فاش ماتت ودفناها. مشا عادل وخلاه وبقا مروان كيهضر بوحدو مع اختو
داز شهر والحياة بدات تترجع لمجاريها بالنسبة لريحانة لي بدات الخدمة فواحد الاوطيل.اما مروان فالحياة توقفات من نهار ماتت ختو وهو ساد عليه.اما عادل كيجري غير وراء الورث لي مزال مايمكن اتفرق خيت القضية دديال مقتل الام ديالو مزال ماتحلات.بقا كيسير المحل ومرة مرة كيخرج للخارج فين كاين الاب ديالهم لي خلاتو مدام الانصاري مشلل وكيتعالج في واحد المستشفى.. ريحانة دغيا تاقلمات مع الخدمة فالاوطيل مرة مرة كتزور صاحبتها كريمة لي قربات تزوج.. واحد النهار كانت ريحانة خدامة كيف العادة ملي جاها بوكيه ورد.شافت البطاقة شنو مكتوب فيها(عندما رايت عينيك ادركت ان لا حياة في غيابك فالحب لاشيء ان لم يكن لك سانتظرك بفارغ الصبر لاراهما في مقهى la rose غذا مساء سانتظرك) قرات البطاقة مرة اخرى وهي كتقول بلي غيكون شي حد كيتمازح معاها ولكن زميلتها في العمل شجعاتها تمشي تلاقا هاد العاشق خصوصا وان الورود ديما كتوصلها طيلة هاد الشهر..قررات ريحانة تمشي تشوف هاد العاشق وتخبرو مايبقاش اصيفط ليها.سلات الخدمة بكري وخرجات مشات للكافي وصلات كانت شبه فارغة طلعات للطابق العلوي جلسات كتسنى وهو يجي شي حد جلس حداها.. ريحانة:هذا انت؟ عادل:مرحبا بيا واخيرا شفتك.. ريحانة:سمح ليا انا جيت غير نقوليك ماتبقاش تصيفط ليا انا ماشي ديال التفلية وداك اللعب ماشي ديالي. عادل:شنو تشربي؟ وديك الساعة نهضرو. خدا ليها عصير بارد وخدا هو قهوة .وهي كتسناه اهضر. عادل:شكون قاليك انا باغي نتفلا؟انا راني بغيتك للحلال من نهار شفتك مافرقتي بالي.ودبا بغيتك تعطيني فرصة.. ريحانة:كيفاش شنو كتقصد؟ عادل:تقبلي تزوجي بيا؟؟؟؟ ريحانة:لا والف لا الدين لي عليا غادي نكملو ليك. عادل شد ليها ايديها :عطيني فرصة وماتردي ليا تا حاجة بغيتك غير انت.
حيدات ريحانة ايديها من بين ايديه ومشات وخلاتو.. عادل:واخا دبا نشوفو حتال امتى غتبقاي عنيدة معايا راه عادل هذا واجرك عالله.. مشات ريحانة معصبة كيفاش حتى يطلب منها الزواج وهي ماباغاش مزال تزوج خدات طاكسي للدار دخلات جلسات مع الاب ديالها ونسات شوية موضوع عادل بقاو كيتحدثو وهي تجبد ليها ماماها موضوع الزواج. ريحانة:ماما راني قلت ليك مابغيتش مزال نتزوج باركة عليا نبقا هاكا مهنية. الام:لا لا هيا لي ماتكون ليك واش بغيتي نبقاو هضرة على كل لسان. الناس قتلاتنا بالاسئلة.خصكي تفكري فدارك.. ريحانة:مابغيتش مزال نتزوج شفتي الاول مزال كاعما كمل وطلقت بغيتيني نتصدم مرة اخرى؟؟ الام:اوا بزز منك غتزوجي وحنا لي غنختارو ليك وحنا لي عارفين مصلاحتك ماشي انت. ناضت ريحانة معصبة و مشات تكات فبيتها وهزات واح. الرواية تتقراها كانت رواية رومانسية وهي كتقرا تفكرات مروان حبسات القراءة وهي كتعجب كيفاش تتفكر فيه وهي مدة طويلة ماشافتو بدا كيضرها قلبها وهي كتفكر ملامحو الوسيمة وكتقارنو بعادل بيناتهم شبه كبير ولكن مروان اوسم من عادل. ريحانة:اففففق خرج من بالي علاش كنفكر فيك افففف خرج.. انا وليت كندوي بحال شي حمقة.. نعسات ريحانة بلا عشاء وفالليل بدا تلفونها كيصوني تعجبات شكون غيكون المتصل وهي تجاوب:الووو شكون معايا؟ عادل:ماجاوبتينيش اليوم وانا بغيت جواب نهائي مانقدرش نعس حني فيا.. ريحانة: واش كتفهم انا مابغيتش نتزوج صافي قلب على وحدة اخرى انا مانصلاحش لك.وقطعات عليه. فالصباح مشات للخدمة كيف العادة وعاودات لزميلتها في الهمل شنو وقع وعيات ماتقنعها توافق خصوصا وان عادل وسيم وثري ولكن ريحانة مابغاتش..داز نهارها ممل وفاش رجعات للدار دخلات وكتسمع الزغاريد.. ريحانة: اناري شنو هادشي.. مامل شنو واقع هنا؟ الام:مبروووك
ريحانة:كيفاش مبرووووك؟؟ الام:ابنتي اليوم جاك سعدك جا خطبك واحد الراجل لاباس عليه غيعيشك فالنعيم ربي سمعومني ابنتي ياك غير البارح دكرت ليك الزواج وربي ماخيبنيش.. هادا فال زوين..هنية عليك. ريحانة:اماما يهديك الله انا مابغيتش نتزوج اماما. الام:اناري اعباد الله باغا تخرجيلي عقلي علاش بحال هادا كيرفضوه الناس؟ ريحانة:وااامابغيتش...مابغي
مشات للدار وخبرات واليديها لي فرحو خصوصا وانهم كانو شايفينو وتايقين فيه.وبداو تيوجدو لنهار الاحد.. --------------------- في الفيلا كان مروان كيف العادة ساد عليه وهو كيسمع شي حد كيصوني فالهاتف ديال الدار.صدعو صوت الهاتف مشا جاوب.. المتصل:الو سي عادل.. مروان:شكون بغاه؟ المتصل:ممكن تقوليه بلي الخدمة لي وصاني عليها درتها. مروان:واخا. مشا مروان راجع لبيتو ملي داز من حدا غرفة المكتب.دخل ليه زجلس كيقلب فالاوراق ملي بانت ليه صورة ريحانة ..هزها وكيتعجب شنو كدير هنا عند عادل.بقا تيقلب ولقا مجموعة من الشيكات بمبالغ هائلة خارجة من الحساب ديال المحل وكلها فهاد الشهر.تعجب فين كيمشيو الفلوس..سمع شي حد كيدخل لدار وخرج من المكتب تلاقا عادل كان جاي وفرحان. مروان:شفتك راشقة ليك. عادل:ااااه وبزااااف قرييب ناخدو الورث ديالنا. مروان:لاش كتخطط ثاني ؟؟ عادل:بارك لخوك راه غنتزوج. مروان:بهاد السرعة؟ عادل:المهم بغيتك تمشي معايا نخطبها راك عارفك انت الوحيد لب عندي وضروري تمشي معايا. مروان:واخا. دخل مروان للبيت ودخل عادل للمكتب..ملي تفكر مروان قضية الشيكات رجع عندو يسولو وسمعو كيهضر مع شي حد وكان كيقوليه بلي خاالقضية تحل في اسرع وقت وبلي الامور غادية كيف بغا.بقا مروان كيشوف من الفتحة ديال الباب بان ليه مروان هاز تصويرة ريحانة وكيشوف فيها..حس مروان بلي عادل كيخطط لشي حاجة. رجع للغرفة ديالو قبل ما يعيق بيه عادل.واخا هو خوه لكن مابغاش ياذي شي حد وخصوصا الى كانت امراة.. فالليل كانو جالسين على مائدة العشاء.. مروان:ماقلتيش ليا شكون هادي لي غتخطب؟؟ عادل:هههه وحدة دات ليا قلبي..ماغتيقش شكون؟ مروان:انت صاحب المفاجآت. عادل:عقلتي على البنت لي كانت خدامة في المحل ديالنا لي سميتها ريحانة. مروان وحلات ليه اللقمة
مروان:انت غتزوج شي وحدة بحال ريحانة؟زعما باغي المعقول؟ انا عارف النوع ديال البنات لي كيعجبك وريحانة ماشي منهم. عادل:انا صافي قررت وبعد غذا ان شاء الله غنمشيو نخطبوها. مروان:واخا اسيدي نتمنى تكون كتهضر بصاح وداير عقلك. فالغذ ليه ريحانة وماماها كيوجدو للعراضة. الام:عارفاك ابنتي مابغاش هادشي ولكن حنا كنديرو هادشي على مصلاحتك بغينلك تستاقري.. ريحانة:صافي اماما الى كان داك السيد من نصيبي غادي نتزوجو ونا راضية بلي قسم عليا الله. مامشاتش للخدمة النهار كولو وهوما فالسوق.تاصلات بها صاحبتها كريمة. ريحانة:الو حبيبة راني مانسيتكش.. كريمة:اواعنداك ماتجيش.. ريحانة:لا غنجيو ان شاء الله انا وماما.يالاه نمشي نجيب القفطان عند الخياطة.. وصل نهار الاحد وجدو الغذاء وكيتسناو الضياف اجيو..كانت ريحانة لابسة فراشة فالبيج وطالقة شعرها لي مصاوباه بعناية دارت ماكياج خفيف جات غزالة ملي عيطوليها تحط الغذاء كان مروان وعادل جالسين فالصالون مع واليديها وختها الصغيرة.حطات العصائر وكانت كتحس بنظرات عادل موجهة ليها.. الاب:مرحبا بكم اولدي.. عادل:الله يبارك فيك ..بلاشك راك عارفين علاش جينا.نخطب بنتك على سنة الله ورسوله. الام:او اولدي مانلقاو ماحسن منكم.. ريحانة كانت جالسة حدا ماماها وماكانتش رادة البال لهضرتهم مرة مرة كتشوف فعادل وكتجي عينيها فعينين مروان لي جالس حداه.عادل كان لابس كوستيم اسود ومصاوب شعرو البني..اما مروان لابس قميجة بيضاء وسروال اسود ومحلق لحيتو باناقة وكان كيبان بحال نجوم السينما.ريحانة كانت كتشوف وكتفكر ملي ابتاسمات ومولشي شاف فيها حدرات راسها وكتسمعهم كيقراو الفاتحة.ملي سالاو تغذاو.وهي تمشي للكوزينة ملي سمعات صوتو دارت لقاتو عادل.قاليها:مبروك علينا ملي قبلتي
ريحانة:واش قاليك الاب ديالي كولشي عليا.. عادل:اه قالي كنت مزوجة ولكن مازال مامشيتي عند راجلك.وقالي راكي كبر مني بعام.يعني انا عندي 26سنة وانت 27سنة. ريحانة:اهاه وقابل على هادشي .. عادل:اه باغيك كيفما انت.. ريحانة:يالاه سير قبل مايجي بابا راه حشومة يلقانا هنا.. مشا عادل وكيضحك لقا مروان كيتسناه ودعوهم باش اوجدو الاوراق ديال العقد فاقرب وقت.. وصل الليل ومشات ريحانة لبسات قفطانها خيت اليوم عرس صاحبتها لبسات قفطان فالازرق الملكي وطالون اسود وجانعة شعرها ببروش ودارت ماكياج ازرق للعيون و عكر وردي بارد جات اطلالتها بسيطة وساحرة جاب باباها السيارة وداهم ملي دخلات للعرس والناس كيشوفو فيها. الام:قراي ابنتي سورة الاخلاص دبا يضربوك ليا بالعين. ريحانة:صافي اماما بحالا انا ملكة جمال العالم.اجي نجلسو هنا.. دخلات العروس كريمة وريحانة فرحات ليها بزااف كانت غزالة فالتكشيطة فاللون للوردي..دارت معاها ريحانة شي صور تذكارية.ودوزات كاع اللباسي لي جات فيهم كريمة فكل وحدة مختلفة وانيقة.قرب اسالي العرس ملي صونا تلفون ريحانة خرجات تجاوب خارج القاعة.. ريحانة:الوو ماكنسمعكش.. عادل:جيتي زوينة اليوم.. دارت ريحانة وراها كيبان ليها عادل جاي عندها وصل حداها وقاليها:هاد الاناقة كولها ومادرتيهاش فالصباح فاش جيت عندكم.. ريحانة:شنو جاي دير هنا؟ عادل:اوا تاصلت بباباك وعطاني العنوان وجيت نشوف خطيبتي توحشتها وانت ماتوحشتينيش؟ ريحانة:صافي دبا ماشي وقت هاد الهضرة خليني نمشي للداخل هانتا شفيتيني. يالاه بغات تمشي شدها عادل:بلاتي فين زربانة قولي ليا هو اللول بلي توحشتيني. ريحانة:صافي عادل طلقني نمشي. عادل:لا حتى تقولي ليا.. ريحانة:صافي توحشتك يالاه خليني نمشي. يالاه بغا يسلم عليها فخدها ملي منعاتو:راه حنا غير مخطوبين
عادل:ومنسلمش على خطيبتي؟ ريحانة:ماشي دبا مزال الحال على هادشي حتى نتزوجو.. فلت ايديها وخلاها تمشي.وهي خايفة ماحملاتش اقرب منها مشات جلسات حدا ماماها.ملي سالا العرس ودعات صاخبتها بالدموع.. كريمة:صافي راه مابقا والو وتجي نوبتك حتى انت..غنبقاو على اتصال تهلاي ليا فراسك بزاااف..وقتما دخلت للمغرب اول وحدة غنشوفها هي انت. ريحانة:وعلاش شحال من كريمة عندي وغتمشي ليا دبا..سلمات عليها وواعداتها كريمة تجي لعرسها الى قدرات. تفارقو غير بزز ملي مشات ريحانة لدارهم بقات تتبكي حيت صاحبتها الوحيدة غتمشي وتخليها..نعسات وفصباح فاقت غير بزز مشات للخدمة.. فالفيلا كان عادل مزال ناعس.اما مروان فاق بكري اليوم وقرر انه يحاول اكمل حياتو كيفما هي وبلي الحزن ماكيرجعش لينا الناس لي كنبغيو..خرج للجردة كيتمشا.ملي جاه الجوع دخل لقا الفطور وجداتو الخدامة وكيفكر فريحانة كيفاش حتى قبلات تزوج بواحد بحال عادل.ناض من المائدة معصب طلع للمكتب كيقلب احل الدرج حلو بصعوبة لقا شي وراق بقا تيقلب فيهم وتصدم من داكشي لي شااف..خرج دغيا قبل ما يشوفو عادل..دار راسو مزال ناعس ملي سمع عادل فاق وكيهضر فالتلفون خرج للجردة تبعو مروان بالتخبية بان ليه عادل داخل بين الاشجار و كيحفر شي بلاصة قدر اعقل عليها.. رجع للفيلا وكيفكر شنو ممكن اكون مخبي عليه ولاش كيخطط.. مشا دغيا لبس وخرج هز تلفونو صونا على ريحانة.. ريحانة كان الخط ديالها مشغول كانت تتهضر مع ماماها لي قالت ليها بلي باها وجد الوراق ديال العقد ويقدر هاد الايام ايديرو العقد.كملات ريحانة خدمتها وصونا تلفونها مرة اخرى. ريحانة:الو شكون معايا؟ مروان:خصني نشوفك ضروري. ريحانة:شكون انت؟؟ مروان: مروان! ريحانة بغات تعصبو:شكون مروان؟ مروان:علاش شحال من مروان كتعرفي؟ ريحانة قطعات عليه
ملي قطعات عليه تعصب مروان بزاااف..ومشا ركب السيارة ديالو.ماوقف حتال البلاصة فين خدامة ريحانة دخل للاوطيل وقف عليها:دبا عرفتي شكون مروان؟ ريحانة:ماكتشوفش انا خدامة دبا حتال من بعد. مروان:انا خاصني نهضر معاك دابا..يالاه معايا. ريحانة:قلت ليك ماغادياش.سير باركة من الشوهة.. مروان:لحقي عليا دبا للسيارة ولا ماغاديش اعجبك الحال. هرج وتبعاتو ريحانة كتعايرو غير فخاطرها.خافت لا يخرج ليها على خدمتها. وصلات حدا السيارة وقاليها طلعي طلعات وهو يسد البيبان وديمارا وهي تتقوليه وقف ماكيسمعش ليها..ماوقف حتال حدا البحر..وهو يقوليها:ماتزوجيش بيه! ريحانة:شنو؟وشكون انت باش تعطيني الاوامر. مروان:سمعي ليا هاد المرة وماتزوجيش بعدل مايصلاحش ليك. ريحانة:جايبني حتال عنا باش تقولي هاد الهضرة انا غنتزوج بيه وقراري اخديتو. مروان:باغا تزوجيه على فلوسو ياك؟ شفتي شاب صغير زوين وبفلوسو وقلت هادي همزة ماخصنيش نفلتها ياك؟ ريحانة:ماعندمش الحق تحكم عليا سير شوف راسك شنو داير.وجاي دبا كتقولي مانتزوجش بخوك وبدون سبب يالاه قولي علاش حاسدو؟ مروان:شنو حاسدو؟ نحسدو عليك؟انا قلت ليك ماتزوجيش وعندي سبب. شافت فيه ريحانة بتحدي .. مروان:ماتشوفيش فيا بديك الطريقة كتسمعي؟ ريحانة:انا غنتزوج عادل بغيتي ولا كرهتي..وانت الى عندك ماتقول قولو دبا.. مروان:ريحانة ماتستفزينيش..مانقدرش نقوليك السبب. ريحانة:هانتا حيت ماعندك حتى سبب..وخرجات من السيارة وبقات غاذية تشد طاكسي ملي جا تابعها. مروان:طلعي نوصلك.. ريحانة:لا غير سير قادرة نعتمد على راسي.راني بعقلك وكنميز بين الصح والغلط.وضغطات على هاد الكلمتين الاخيرتين.. مروان:طلعي بلا عناد. طلعات ريحانة والطريق كلها وهوما ساكتين وصلات للخدمة ديالها فرحات حيت الشاف ديالها مازال ماجا..
فالغد ليه تاصل بيها عادل وطلب منها يخرجو فاش تسالي الخدمة بقات تتهرب ولكن هو ماخلاش ليها الفرصة وقررات تمشي. فاش سلات الخدمة لقاتو كيتسناها حدا الاوطيل طلعات معاه فالسيارة وقاليها:فين باغيانا نمشيو؟ ريحانة:فينما بغيتي.. عادل:واخا الالة نمشيو نتعشاو فشي بلاصة على ذوقي.. حركات راسها بالموافقة ومشاو لواحد الريسطو هادىء جلسو فبلاصة زوينة وطلب العشاء لي كان عبارة عن طعام بحري.. بقات ريحانة كتاكل وعجبها الاكل البحري.. ملي تعشاو قالت ليه:شكرا كان الاكل لذيذ بزاف.. عادل:بالصحة والراحة احبيبة. خداو ديسير وبقا عادل كيشوف فيها وهي حدرات راسها.. عادل:ماعرفتيش علاش عرضت عليك..بغيت نقوليك بلي غذا غنديرو العقد .. ريحانة:بصاخ دغيا داز الوقت.. عادل:حط ايديه على ايديها.. شفتك مافرحاناش؟ ريحانة:كتحاول تفلت ايديها :لا فرحانة غير متوترة. سالاو العشاء وهي تقوليه ريحانة يرجعها للدار حيت باغا تنعس بكري غذا خدامة. وصلها للدار وقبل ماتهبط بغا يسلم عليها ماخلاتوش كيف العادة .دخلات للدار نعسات هي اصلا خلات واليديها اتكلفو بامور العرس.بقات متخاول تغمض عينيها وكتفكر فمروان وعادل ما عارفاش علاش خاطرها مامرتاحاش لهادشي ماعرفات شمون تصدق واش عادل ولا مروان.وكلات امرها لله ونعسات. فالصباح خدمات نص نعار والعشية مشات للصالون دارت les soins وخدات التكشيطة هي مابغاتش العرس.يعني غدير غير حفلة صغيرة تاصل بيها عادل لي عاونها حتى اختارت وتقدات كولشي وفالفيلا كانو الناس كيوجدو ومروان غير كيشوف وكيطل من الشرجم على الجردة فين غيديرو الحفلة.. وصا عادل العدول لي غيجيو فالوقت وصل ريحانة لدارهم..عاوناتها ماماها تلبس كانت خايفة ومتوترة ولكن كتقول بلي هادشي عادي.كانت لابسة تكشيطة بيضاء ودارت مشطة وتاج وماكياج عيون اسود
طلعات زوينة وعنقاتها ماماها وكترضي عليها. الاب:يالاه ابنتي دغيا راه الناس سبقونا غيكون العدول كيتسنا. الام:بلاتي خليني نفرح ببنتي. ريحانة:يالاه اماما.. طلعات للسيارة ديال الاب ديالها وفالطريق كان مروان كيصوني ليها شافت التلفون وهي دير ليه صامت وخلاتو كان قلبها كيضرب بسرعة..كيفما وصلو للفيلا بسرعة هبطات من السيارة ومعاها واليديها وناسها لي كيتسناو دخلو من الباب الخلفي للفيلا تلاقات عادل لي كان متالق في كوستيم ازرق..جا سلم عليهم وشد ايدين ريحانة بقاو كيهضرو بان ليها مروان واقف فوق الدروج وكيشوف فيهم..حسات بنظراتو كيختارقوها بحال الى كيوصل ليها شي رسالة من خلال نظراتو قررات تجاهلو حيت اليوم يومها وخصها تفرح..قرب منها عادل وقاليها فودنيها:اليوم غنخليك اسعد وحدة فالذنيا كوني متاكدة.. ابتاسمات ريحانة بدون شعور وشدات فعادل..مشاو للحديقة فين كانو الناس كيتسناو.جلسات فبلاصتها.وصلها مسج فتحاتو بلا ماينتابه ليها عادل كانت رسالة من مروان(ماتقبليش ا ريحانة ثيقي فيا) هزات عينيها تشوف فيه ومادار حتى شي ردة فعل..حتى هي تجاهلاتو.بداو العدول كيهضرو هي ماكانت تتسمع والو كانت تتسمع غير صوت داخلها كيقول :نقبل ولا ما نقبلش.. حركها عادل وهي تنتابه بلي العدول كيسولها واش موافقة..سكتات ريحانة وكتشوف فمروان وكتسنا منو يقوليها شي خاجة ولكن ما قال والو قلب وجهو للجهة الاخرى وهي تقول بالجهد اه موااافقة!!كولشي صفق وعطاهم اوقعو كانت كترعد وهي شادا الستيلو رجعات شافت فمروان..يالاه بغات توقع وهي تسمع شي حد كيقوليهم حبسوو... كولشي شاف جيهة الباب كانو البوليس لي جاو.. عادل:شنو واقع هنا؟ الظابط:حنا لي خاصنا نسولوكم شنو واقع. الاب:هدا عرس بنتي ياك لاباس- الظابط:هنا كاين واحد المتهم بجريمة قتل مدام الانصاري..
ريحانة بدون شعور شافت فمروان..لي حس بلي هي كتاهمو بنظراتها..ولكن هي ناقدراتش تفكر بلي شي واحد اخر امكن اكون قاتل..قاطعه صوت الظابط تفكيرها .. الظابط:تفضل معانا اسي عادل.. ريحانة:كيفاش شنو علاقة عادل بالجريمة. الظابط:هادا لي كنت غتزوجيه هو لي قتل الام ديالو بلا شفقة او رحمة وكان باغي يلفق ليك التهمة.. ريحانة:كييييفاش عادل لا مايمكنش.. عادل: انا مادرت والو ماعندكم حتى دليل عليا و ريحانة هي لي كانت في مسرح الجريمة ماشي انا. ريحانة:شنو كتقووول؟؟انت ماكتسواش باغي تلفق ليا جريمة انت سبابها يا المجرم.. الظابط:تفضل معانا راه السلاح باش قتلتي كاين فالمركز.. شدوه البوليس و مشات ريحانة حداه. ريحانة:انت واحد المجرم و قليل الشرف وزايدها باغي ضحك عليا وهي تصرفقووو.. داوه البوليس وهو كيقاوم..بداو الناس كيمشيو وكيهضروو جلسات ريحانة كتبكي وكتفكر بلي هي اكثر وحدة مظلومة في هادشي.تفكرات مروان وهي تنوض كتجري دخلات للفيلا كتقلب عليه..وكتعيط ليه.. مالقاتوش التحت طلعات الفوق ومشات تتقلب على بيتو. ملي لقاتها بانت ليها واحد الورقة جلسات تتقراها(الى لقيتي هاد الرسالة ديالي غتكوني فهمتي داكشي لي كنت باغي نوصلو لك مدة هادي..اكيد بزاف ديال الاسئلة غيكونو كيدورو فبالك..علاش ماقلتش لك شحال من حاجة فقلبي.عادل ماكانش كيبغيك هو دار هادشي كولو غير باش تكوني قريبة منو ويلفق ليك التهمة باش اتقسم الورث ويدوز ليا انا يصفيها ليا وايبقى ليه كولشي هو كان من الاول ناوي يلفقها ليا فاش عارفني مشيت عند المدام للدار وتبعني ولكن تواجدك فنفس المكان خربق ليه كولشي وبدل الخطة ديالو.فهاد اللحظة انا غنكون بعيد عليك.اقدر كون فهمتي هادشي قبل كون راه حياتنا مختلفة انا وياك لكن انت ماكنتيش كتيقي فيا.نتمنى لك السعادة مع غيري
قرات ريحانة الرسالة ودبداو الدموع كينزلو من عينيها. ريحانة:كيفاش قدر امشي .وعلاش انا كنبكي علاش؟؟هاد الدموع ديالاش واش ديال الزهر لي ماعنديش ولا ديال الحياة لي عشتها..علاش كنبكي عليه..شنو كيجيني.. جلسات في الارض وحاطا اديعا على عينيها.زعما غيكون كيبغيني؟ولا غير كيشفق عليا هوماقالش ليا كيبغيني..ولكن قال في الرسالة الله يسعدك مع غيري..نو غندير انا دبا.. سدات البيا وجلسات تتقلب على اي حاجة تقدر تادي لمكان فين مسافر مروان..لقات كولشي خاوي دا كولشي..قلبات البيت سفاها على علاها وكتغوط..ملي سمعات الدقان في الباب.صحابليها مروان..حلات وكان واحد الشاب. ريحانة:شكون انت.. الشاب:انا المكلف بالفيلا وصاني سي مروان نسدها.. ريحانة:انت كتعرفو فين مشا ياك ؟ الشاب:لا ماعرفتش.هو وصاني غير نسدها..واش محتاجة شي حاجة. ريحانة:لا صافي..انا غنخرج دبا..مشات هزات الرسالة وهبطات..تلاقات ماماها كتقاب عليها مشاو للدار وماماها كتواسيها تنسى كتطلب منها السماحة حيت عي السباب ديال هادشي حيت ضغطات عليها باش تزوج.. الشاب لي خلات ريحانة في الدار كان كيصوني تلفونو. الشاب:الوو فين مشيتي اصاحبي؟ مروان:كانت تما؟ الشاب:اه لقيتها في البيت ديالك راها قرات الرسالة. مروان:وماسولاتش عليا؟ الشاب:قالت لي غي واش عارف فين كاين ومشات. تالم مروان حيت هادشي كيبين بلي ريحانة مامهتماش بيه وبلي غتكون غير سولات عليه حيت بغات تانبو كيف العادة.. مروان:صافي بلا ماتقوليها فين انا.. قطع مروان الاتصال وكمل الطريق ديالو كان غادي لخارج البلاد عند الاب ديالووو. دازت يوماين على الحادث ملي جا الظابط عند ريحانة وطلب منها تمشي للمركز تعطي اخرمرة الاقوال ديالها.. مشات ريحانة مع الام ديالها تلاقات مع الظابط دخلات لغرفة التحقيق..
ريحانة:انا كنت خدامة ملي جات السيدة وقالت لي ندي لها الطلبية للسيارة وطلباتني نمشي معاها للدار ملي مشيت نحط الطلبية في المطبخ سمعت شي صداع.وبقيت كنراقب مان مروان كيتخاصم هو والسيدة والنقاش ديالهم كان مشتد وانا خفت ورجعت اللور وسمعت شي خد خرج ودخل ثاني ملي طليت ماشفتش مزيان كيبانلي شي حد قرب من السيدة وايديه عامرين بالدم تخلعت بزااف واتا نرجع للور نهرب وهو يتبعني مروان قالي بلي ماشي هو لي قتل وانا ماقدرتش نقدم بالتصريحات ديالي حيت كنت هايفة وطول هاد المدة وانا كنظن بلي مروان لي قتلها ولكن هو كان غير راجع ولقاها فديك الحالة. الظابط:بصح عادل خطط مزيان لهادشي كان باغي يدخل فالوقت لي كان مروان فالفيلا باش تبان للناس بلي مروان لي قتل كان باغي يحط شي حاجة ديالو فمسرح الجريمة ولكن ماتوقعش بلي مروان غيرجع مزال وبقا الموس فايدين عادل لي هرب.وملي شاف القضية مهدنة.عرف من المصادر ديالو بلي حنا كنا لقينا القبض عليك وبلي الاتهام كيدور بينك وبين مروان..داكشي علاش خبا اداة الجريمة في الحديقة وكيفمر بلي انت اسهل وحدة يلفق ليها التهمة قال بلاتي يتزوج بيك باش ملي تكونيفالدار يحط السكين فالمطبخ وتستعمليه وابقاو فيه بصماتك ويكون الدليل القاطع فيه بصماتك.وقالينا بلي ملي ماوافقتيش صيفط لك واحد الشارف يخطبك وباش واليديك اضغطو عليك ويجي هو ابان المنقد ديالك.ولكن سي مروان لقا كولشي ضدو وهو جا خبرنا فالوقت المناسب. ريحانة مصدوومة:ياااربي هي كولشي كان مخطط ليه وماكانش صدفة نتخطب لداك الشارف وانو يخلص ليا عادل الكفالة..ياربي كيفاش كنت غبية.. الظابط:هو كان ذكي وداير ملف كبير جامع فيه كل المعلومات عليك وهاد الملف لقاه مروان..واستاغلو حيت كانو مشاكيل بينو وبين الام ديال عادل...ولكن نسا بلي الحق كيبان....
ناضت ريحانة وملي بغات تخرج شافت عادل دخلوه للتحقيق خنزرات فيه..وهي كتقول:بنادم ماعندو علاش احشم قاتل ماماه.. عادل حدر راسو عرف ان الندم بدا كيتسرب ليه..عرف ان الطمع وقتو وجيز.. ؛-------------------- دازت 4اشهر على هادشي..تحاكم عادل بالسجن المؤبد بتهمة القتل.. كانت ريحانة كتحاول تنسا كولشي واخا ديما مخبية اخر رسالة من مروان.. ايام كانت كدوز حدا الفيلا لي بقات مسدودة من نهار العرس المشؤوووم.. رجعات لخدمتها حاولات تجدد حياتها ولكن هاد المرة مانجحاتش..فكل مكان كانت تتخلي كبريائها منهازم قدام قلبها وهي كتمنا شي نهار تشوف مروان تشكرو على لي دار معاها.. اليوم الاحد بحال كل احد ريحاتة كتجي الشاطىء كتجلس بوحدها كتشوف فالبحر وكتهضر تخوي لي فقلبها..واخا ماعمر واليديها ضايقوها بشي حاجة بالعكس كان كيحاول يخففو عليها ويساندووووها.. بقات جالسة تتشوف الامواج كيضربو فالصخور وكتحس بالالم فقلبها كان قلبها بحر واااسع .. ريحانة: هههه واخا نعيا نحاول نتبدل مانقدرش ننسا ..شنو تبدل فيا شعري لي صبغتو ولا بلون اسود كسواد حياتي..شنو تبدل القصة ديال شعري لي درت فيه غرة كتغطي بيها عيني باش الناس مايشوفوش الحزن لي كنعيشووو..هنا..تبدل نمط حياتي .. جمعات الوقفة ورجعات للدار بحال كل يوم احد..
بعد 10 اشهر رجعات ريحانة للدار بحال ديما ولكن تفاجات بماماها عيانة بزااف طالعة ليها الحرارة..خرجات كتجري هزاتها فالسيارة داتها للمستشفى.. ريحانة:ماما انت لاباس؟ الام:اه ابنتي ماتخافيش دبا لاباس. ريحانة:صبري دبا يجي الطبيب. جات الممرضة ودخلو عند الطبيب دير فخص للام ديالها. الام:الله يرضي عليك ابنتي جيبي ليا نشرب. ريحانة:واخا اماما انا غنجيبو ونعمر الوراق تاع التغطية الصحية ماتحركيش من بلاصتك خرجات ريحانة وهي كتقاد الوراق .. تصاطحات مع شي حد. طاحو ليها الوراق لي كانو فايديها والراجل كان هاز بنت صغيرة.. ريحانة وهي تتجمع لوراق:سمح ليا اسيدي راني كنت ساهية. الراجل:حتى انت سمحي ليا كنت ملاهي مع البنت.. ماقدرش اهبط اعاونها حيت كان هاز الطفلة وهي مزال صغيرة.. الراجل:سمحي ليا مانقدرش نهبط نعاونك..راكي شفتي هاز البنت . ريحانة :لا متشي مشكل غنجمعهم.. بقات تتقاد الوراق..ومشا الراجل كمل طريقووو.. ريحانة:افففف ماكيشوفش قدامو وزايدها قاليك مايقدرش اعاوني..الرجال ديال اخر الزمان...ناضت وهي تقول:انا فبلاصتو نهز البيبي وندير شحال من حاجة ونقدر نتحرك هاكا وهاكا وهاكا...بقات كتحرك ايديها بحال البهلوان..وضربات الحيط.. ريحانة:اييييي اففققق مالي منحوسة باغا ندير فيها بطل..اي ايدي .. كملات الطريق وبقات واقفة كتسنا النوبة تعمر الوراق ديال التغطية الصحية وكل مرة كطلع الGصة لي دايرة حيت تتمنها من الشوفة... ريحانة:اش داني نقطع هادشي وليت بحال المراهقات..
عمرات الوراق.مشات ريحانة تشري قرعة ديال الماء .. وجات كتجري حيت تعطلات على مها..ودخلات فشي حد.. ريحانة:اح سمح ليا اخويا.. ماجاوبهاش وهي تهز عينيها وشافت فيه وهي كتحيد شعرها على وجها. ريحانة:انتاااااااا مروان:بقا كيشوف فيها:ريحانة!! بقاو كيشوفو فبعضياتهم مدة.وبدات البنت الصغيرة تتبكي.. شافت ريحانة فالبنت وهي تقوليه:الله يصلح.. مروان:ريحانة تسناي..وشدها من ايديها.. ريحانة:طلق مني ماتقيسنيش..مزوج وزايدها كتهضر معايا .شكون انت انا كاعما كنعرفك.. مروان:بلاتي.. مشات ريحانة وخلاتو عاونات ماماها حتى هبطو للسيارة. الام:بشوية عليا ابنتي..مالكي من قبيلة وانت كتجري . ريحانة:سمحي ليا اماما راني غير ماكنحكلش ريحة السبيطارات .. ملي وصلو للدار وريحانة متوترة غير كتخاصم.. ريحانة:قاليك بغا يهضر معايا غابر عام وجاي فايديه بنت..السيد مزوج. ماما اجي تغداي دغيا راني راجعة للخدمة.. تغداو مجموعين .. وخرجات للخدمة.. فالخدمة قاليهم الشاف بلي غيكون شي حفل خيري فالاوطيل اليوم بالليل وبلي خاصهم اعاونو الناس وبلي غاتكون شوية الخدمة.. مشات ريحانة للدار جابت معاها واحد اللبسة رسمية ورجعات كانت القاعة ديال الاوطيل بدات تتعمار.. ريحانة كتهضر مع صاحبتها:كون غير ساعفونا وخلاونا نمشيو فحالنا هادي ماشي خدمتنا اففف. وصلات 9ديال الليل والقاعة عمرات السربايا وزعو المشروبات..المكلفين ديال الاوطيل كيراقبو اي حاجة ومرة مرة ريحانة كترحب بالناس. بداو الناس كيتبرعو بالمبالغ وريحانة واقفة كتشوف كانت تتمنى لوكان عندها باش تعاون الناس..واخا الحفل زوين ولكن بانو ليها ناس اجانب في الحفل.. قرب شي واحد من ريحانة وقاليها:الحفل زوين.. ريحانة:اه اسيدي زوين والعمل الخيري احسن حاجة ديروها. الراجل:حتى انت زوينة. ريحانة:سمح ليا.
الراجل:اجي فين غادية؟ ريحانة:طلق مني.. جا شي صوت وراهم:راه قالت لك طلق منها.. مشا الراجل وبغات ريحانة تمشي.. مروان:بلاتي ماتمشيش خلينا نهضرو شوية.. ريحانة:ماعندنا فاش نهضرو.. مروان:راني جيت على قبلك.. ريحانة:على قبلي انا ههههه واش كضحك عليا علاش شنو كان بيناتنا؟ مروان:بصاح ماكان بيناتنا والو.ولكن انا جيت نهضر معاك. ريحانة:ياك مزوج لاش مزال تابعني وعندك بنت.. مروان:انا بصاح عندي بنت اه ولكن انا مطلق.. ريحانة:هي ماصدقاتش ليك؟؟هههه انت ماكنتيش مجرم ولكن راك ماكتسواش واش كنبان لك انا ساهلة حتال هاد الدرجة. مروان:ريحانة راكي غير كتخرفي اش هاد الهضرة لي كتقولي..جرها من ايديها بزز وركبها فالسيارة.. وطلع جلس حداها:شوفي فيا حنا بصاح غلطنا فالاول ولكن عطيني فرصة اخرى ماكنتش نقدى نعتارف لك قبل ولكن انا متاكد دبا بلي كنبغيك غير انت.. ريحانة:راك مزوج وانا ماكنبغيكش.. مروان:انت كتبغيني وكون ماكنتيش كتبغيني كون مانفاعلتيش هاكا ملي شفتيني انا حاس بك مقلقة مني ولكن حتى انا اني دفعت الثمن تزوجت وحدة ماكنبغيهاش ولكن مانادمش حيت عندي بنتي دبا. ريحانة بقات تتشوف فيه..وشد ايديها وحطها على قلبو:تيقيني انا ماكنتفلاش عليك. بقات ريحانة مصدومة..خليني نفكر.. مروان:واعديني بلي غتفكري مزيان فمصلاحتنا بجووج. ريحانة:كنواعدك كنواعدك.. مروان:يالاه انا نتسناك حتى يسالي الحفل باش نوصلك. سالا الحفل وصلها للدار..وقبل ماتهبط ريحانة من السيارة قالت ليه:عافاك مابغيتش نتلاقاو حتى نجاوبك وعطيني شوية ديال الوقت. مروان:خودي راحتك تصبحي على خير. الليل كولو وريحانة كتفكر فهضرة مروان نرة تقول نوافق مرة تقول لا مايستاهلش. نعسات وقررات تاخد وقتها فالتفكير..دازت 3ايام وهي مازال ماجاوبات مروان منها نيت تعذبو شوية حيت خلاها
كانت فبيتها ملي سمعات شي هضرة فالصاالون وجات ماماها عندها:بنتي راني جيت نقوليك شي هضرة ولكن ماتقلقيش.. كانت ريحانة كتاكل فالمكسرات:اهاه غير قولي اماما. الام:ابنتي جا شي واحد هضر فيك ولكن باباك قاليه ماغاديش تزوجي يالاه خرج من الدار دبا. ريحانة:ممم احسن مادرتو. الام:ولكن ماسولتينيش شكون هاذا؟ ريحانة:واصافي امي غير سيري مابغيتش نعرف سدي معاك الباب بغيت نعس شوية. الام:جمعي غير شعرك .. ريحانة:واصافي امي سدي معاك الباب ودارت المانطة على وجهها. الام:كان اصحابلي باغا تعرفي شكون هذا ولكن حسن نيت هو راه طلع عندو بنت وانت ماغتقبليش. غير سمعات ريحانة هاد الكلمة ودوراتها فبالها.نقزات من بلاصتها وطلات من الشرجم بان ليها مروان غادي اركب فالطوموبيل.هبطات بالجرا من الدروج وخرجات تابعاه ديمارا وهي ماوصلاتوش.خرجات من الزنقة الاخرى وخرجات ليه قدام الطوموبيل شوية ويضربها. هبط من السيارة معصب:واش حماقيتي؟ ريحانة:هههه سخفتيني حشومة عليك. مروان:اوا انت لي جريتي عليا وبغيت نسخفك ههه.اش هاد الحالة دايرة فشعرك؟ ريحانة:واصافي باركة هههه ماضحكش عليا. مروان:تقبلي تزوجي بيا؟ ريحانة:مممم واخا وريتيني جوج وجوه ديالك راني قابلة نصبر عليك هههههه قابلة نتزوج بيك امروان
النهاية