انا سميتي سهام انا بنت يتيمه وخا وليديا عايشين ملي حليت عينيا وانا مكرفصه ومحرومه من الحنان الام ديالي تخلات عليا وانا عندي 4 شهور والاب ناض دربها بتزويجه وسمح فيا عند جدا هيا لكبراتني مسكينه كانت هي كولشي بنسبه ليا ولكن عندي واحد لعمامات كيعاملوني بحال شي خدامه واخا مزوجات لبغان تسبن تجيبني حتا نكملها شغال دار وتسيفتني لوحدا اؤوخرا هكدا كانت حياتي ليوميه حتى لقرايه مخلاوني نكملها بكيت بزاف لكن شكون داها فيا ولادهوم كيقراو لابسين ومهليين ماشي فحالي الام ديالي حدايا كتسكون عمرها شرات لي حتى حلوه كانت حتى شوفه مكتسرقهاش فيا كنت كنتعدب بزاف ولكن عمري بينت كانت امنيتي حتا انا نمشي لمدرسه ونلبس حوايج لعيد جداد ماشي شياطه ديال بنات عماتي تمنيت نحني فرمضان نهار 27 ونلبس لقفطان ويفرحو بيا حتا انا مشي غينتفرخ على البنات ونبكي
هاد الاحلام بقات فقلبي بﻻ متحقق دازت الايام وانا مزالا فديك لعيشه حتى درت16 سنه قررت نتعلم شي صنعه تعاوني وتنقدني من هاد الظروف لاني كنت حتى فلوس لحمام كنجمعها بدرهم لمرا مرا كيرموهلي ولكن هادشي حتا هو رفضوه قالولي شكون يعاون جداتك فدار ونتي عاد بغا تولي بحال مك تخرجي لطريق وديري ما بغيتي حنا عدناش البنات لكدور فزناقي، حتا نقاش مكينش معاهم عييت بلبكا مادارلي والو بقيت كنفكر ننتحر ونهني راسي من هاد لعيشة لكن جدا كانت دايمان مكتخلينيش وكتسبرني وكتقولي دابا تزوجي ابنتي ويسهل عليك االله وتعيشي لي بغيتي راه معندي انا باش نعاونك راكي عارفه لكاين .مسكينة مكنتش تقد تهدر معاهوم حيت هما لكي يصرفو عليها لمهم رضيت بالواقع ديالي وكملت حياتي حتى لواحد نهار كنت فسطح كنشر شي حوايج وانا يبانلي واحد كميون ديال سلعه بلاصة حدا الدار بقيت كنطل نزل واحد راجل بقيت حاضياه فين جاي حتى حل واحد لهري كان مقابل معا دارنا لكن كان مسدود وهو يعلي عينيه وشاف فيا، واو شحال زوين اول مره نشوف شيواحد ويعجبني حتى هو بقا واقف وكيضحك معايا لكن انا دغيا نزلت بحالي لغدا فنفس الوقت حبس عاوتاني وبداو لخداما كينزلو السلعة وانا نطل ونلقاه حاضيني بقا قلبي كيضرب بزاف، تعودت نطلع كل نهار غير باش نشوفو وليت كنفكر فيه، عجبني وكانساين كل نهار نشوفو ورى سرجم حتى لواحد نهار سرداتلي عمتي نمشي عندها وانا غاديا وانا كنحس بشي حد تابعني سرعت لخلفة وخا هكاك وان ندور لقيت هداك لولد لدالي قلبي بلا منحس قرب لحدايا سولني شنو سميتك بقيت مسمرة فبلاصتتي وكنحس بسخانة شداتني مابقيت عارفا مندير واش نزيد وﻻنبقى كمل كلامو بواحد ضحيكة وقالي بلي عجبتو وشحال وهو حاط علي لعين وكان كيساين لفرصة باش يهظر معايا
انا مجاوبتوش كنت كنخاف بزاف من هاد المواضيع مشيت وخليتو داز اسبوع على هاد شي مبقاش كيجي كيمولف رديتها عاوتاني لبكا لغدا جات فصباح واحد لمرا بغات جدا لمهم دخلتها وحطيت سينية ديال اتاي ومشيت نقوم بشغالي كيلعادة واحد شوية تنسمع زغاريت واش هادي جدا حمقات جريت عندها شنو وقع بقات كتعنقني وتبوس فيا مبروك ابنتي مبروك مفهمت والو راه جاوك لخطاب الحبيبة وفلعشية غايجيو نتفاهمو فتفاصيل، أنا تخلعت تزعزعت مفهمت والوا بفيت غير حالا فمي، لمهم بدينا ان وهي توجاد قادينا كلشي فلعشيه جاو عماتي وبقاو بلهدره عاوتاني منين كتعرفيه شوفي على زهر عندك بناتنا لقراية وزين وتى واحد مساومهم انا مزال فلكوزينة حتى دخلو ناس وانا نطل من لباب نشوف شكون هاد السيد لمكنعرفو ما والو وباغي يتزوج تما كانت الفرحة ديالي ملي شفت هداك الولد لبدل حياتي وخا معرفت حتى سميتو ولكن بحال يلا مدة وانا عارفاه تفاهمو على كلشي لعرس وداكشي لتابعو ودخلت سلمت عليهم ودوزت اتاي وانا لفرحة ديالي مكتوصفش دازت التحضيرات ديال العرس لتكلف بها كمال راجلي سميتو زوينة بحالو ورضنا على كلشي داز عرس غزال مكنتش كنحلم بيه ولشي حاسدني جيت زوينة بزاف بحال الممثلات هههه كمال محيدش عينو مني ليلة كلها وانا حشمانا نت حاسا بحال شي اميرة ديال رسوم متحركة وحدايا الامير ديالي داز العرس سافرنا لشهر لعسل وانا عمرني مامشيت حتى لبلاصة مشينا لاكادير ومراكش ودازت سيمانة ديال الاحلام رجعنا لدارهوم استقبلاتنا مو خالتي هنية بتمر ولحليب وشيخي لحاج علال وخوتو لعاد غنتعرف بهم مزيان 3 ديال خوتو كبر منو هو صغير ومجوجين وعايشين هما ووﻻدهم معا 2 خواتاتو حتى هما ورجالهم مجموعين تبارك اللع العائلة كبيرة زاد هاد شي فرحني وراولي بيتي مشيت حطيت حوايجنا بقيث كنستف فداك شي حتا دخلات مي هنيه عندي سوﻻتني واش عجبني البيت وشرحتلي نظام لي ماشيين عليه هادي سنين وطلبات مني حتا انا نلتازم بهاد شي وانا بست ليها يديها وقولت ليها راكي مي دابا انا لطلبتيها نديرها وانكون غير كيف بغيتي حتا هيا عنقاتني وطلبت مني نوض نتعشاو باش غدا نبدا النوبة ديالي فشقا الدارتعشينا مجموعين لجو لعائلي رتاحيت ليه .لغدا نت بكري مشيت لكوزينة عجنت مسمنات لفطور وخبزت لحرشة وجدت كلشي ماجات مي هنية تفيق حتاحطيت كلشي فطابلة تفاجئت بزاف وبدات كتضحك معايا انا كنت مولفا شقا عند الناس ودابا بكل فرحة كنوجد فداري ...
دازت سنة على زواجنا انا وكمال ورزقنا ربي بنية وئام ربي يحفضها لينا وليت انا لمكلفة بالطياب وشهيوات عمي لحاج غيكيدخل كيعيت عليا ويسولني على اش دايرا لعشا وذا تشها شي حاجة نوجدها ليه عيلات لوايسي مكانوش كيحملوني وكي قولولي نتي عاد جيتي لبارح بغيتي تحكمي فالدار ان كنت عاطيهم تيساع كنهرب من صداع ولكن وخا هكاك تفاهمو علي خلاو شقا الدار كلو وبقاو كيضربو غيلتحت لتحت حدا لعائلة كيتسخرو ويضحكو معايا لا اختي سهام غيكلسي ارتاحي وفلكوزينة سمحين ليت فكولش وخا هكاك متنهدرش ونقدي ونسكت وحتى راجلي مقولتهالوش لأنو كيبقى فيا يقيل خدام وفليل نبرزطو بمشاكل اخرى باركا عليه تمارا حيت هو هاد اﻷيام كيجي مهبوك حتا العشا مكيكملوش وكينعس كيطيح دودة مكانجي نمشي لعندو حتى كلقاه في 7 نومة الحبيب ديالي لهلا يخطيه عليا ويسهل عليه ويفتح ربي ليه بيبان الخير دائما كندعي معاه هو دنيتي وحياتي عاد تلونت من دخل فيها انا بقيت مدة وانا على هاد الحال تنسولو مالك واش مريض كيقولي ﻻ غيتمارا ديال الخدمة حلينا واحد محل جديد ديال المفروشات وكنبقى واقف معى الخدامة هادشي عش وانا عنقتو بشدة وقولتليه دائما تفكر بلي واقفه معاك حتى بروحي نفديك يﻻتطلب اﻷمر باسني من راسي وحسيت الدموع نزلو من عينيه كمال حنين بزاف ..... بنتي وئام بدات كتمشي وكلشي كان يبغيها حيت مكتسمعش حسها ولي جا لعندها كتدحك معاه وتمشي لعندو انا صحاحيت وزيانيت وليت كندور براسي ونقاد لوايساتي مساكن كانو دائما يقولولي تهلاي فراسك وديري المكياج باش كمال ميشوفش برا انا كنت متآكدة من حب راجلي وتايقى فيه كنقولهوم راه مسكين قاتلاه تمارة مكيحكش حتى راسو وهما يضحكو ولَيْنِي راكي هبيلة اسهام واش راجل فيه الثقة انا هاد الكلام مكنتش كنديها فيه حتا لواحد نهار جاتني واحد المكالمة مجهولة معرفتش شكون كانت بنت قالتلي انتي هي سهام قولتلها نعام قالتلي الما غادي تحتك ونتي ماحاساش فيقي من لقلبة وقطعت بقيت مشوشة شكون هادي واش بغات تقصد بكلامها
ومنين كتعرفني سؤال يديني واحد بردني المهم داز نهاري غيبسيف جات العشية رجع كمال من خدمتو عيان كيف العادة ديتليه شوية ديال الماء سخون يكمد رجليه وانا نجلس هداه وشفت فيه مترددة واش نعاود ليه هاد شي لطرا معايا وهو يسولني ياكماكاين شي مشكيل الحبببة ديالي وانا نتشجع ونقوليه الحبيبة ديالك زعما شحال كتبغيني واش عمرك ما شفتي شي وحدا خرا عجباتك من غيري وانت المحل ديالك عامر غيبلعياﻻت دار يدو على فمي وقالي انا عمري ماشفت وﻻ عنشوف شي وحدة بحالك عيني ماكتشوفك غير نتي ان دبت فهدرو مابقيت كنفكر حتى فشي حاجة داك الساعة فصباح نت حاسة براسي عيانة مقدرتش حتى نوقف وكان رد بزاف لدرجة سخفت محسيت براسي حتى لسبيطار لقيت كلشي داير بيا ومبروك مبروك هادشي لكانسمع جا عندي كمال بالفرحة باس ليا يديا وراسي وكيبكي ويقول راكي حاملة بتوام غتكبر عائلتنا وئام غيوليو عندها خوت راكي دابا فشهر 5 انا مزالا مصدومة شهر الخامس وانا محاسا بوالو ،الطبيب كيطلب مني الراحة ومجموعة ديال التحاليل المهم رجعت لدار لقيت عمي الحاج بيدو كيستقبلني وابنتي على سلامتك ونورت الدار مليوم مابغيتك تنوضي من بلاستك ليبغيتيها تجيك حتى لبيتك بست ليه يديه وقولت ليه الله يطول لينا فعمرك ويخليك تاج فوق ريوسنا مشيت لبيتي بقيت شهراين وانا مكاندير حتا حاجا غي الماكلة والجلاس قنطت بزاف انا مولفة الحركة وتوحشت جدا شحال ما مشيت لعندها مسكينة طلبت كمال يديني لعندها منها نبدل حتى الجو مشيت دخلت لديك الدار انا ووئام وكنتفكر الماضي بحال شي فيلم كيمر من قدامي ﻷسف لقيت عماتي تماك وحدا كانت عيانا شوية المهم جلست حداها وهي مسكينة كيدرتي ابنتي معا الثقل راني مقديت نجي عندك وهي طير وحده منهوم راها بحال لحلوفة مكتشوفيش حتى حاجة مكتهدها وبقاو يضحكو انا مديتهاش فيهم شديت يد جدا وضحكت معاها وهي تبكي مسكينة قالتلي معندك سعد ابنتي حتى تهنيت عليك ودابا .... مالكي اجدا انا الحمد لله مخاسني حتى خير ربي عوضلي لعداب ديال صغري براجل كيبغيني وهما بداو مسكينة يكما مازال عايشا فدار غفلون حنا عارفينك حمارة وليني مشي لهاد الدرجة شكتقصدو بكلامكم انا مفهمت حتى حاجة ناضت عمتي نجية نسيتي المكالمة لقالتلك راه الما كيجري تحتك هههههه وانا هيا هاديك لتاصلت بيك لكن والو غبية وغتبقاي غبية الراجل ديالك ضريها بتزويجة ونتي عاطياها لوﻻد انا وقفت ماحسيت براسي حتى جمعت معاها بواحد الصقلة وقلتلها حداك تما حتى راجلي بزاف عليكوم تهضرو فيه بغيتو تخربو عليا حياتي مغنسمحش ليكم وهي ترد عليا بصقلة اخرى قالتلي فيقي المدينة كلها سايقا اﻷخبار حتى المحل كتبو ليها ونتي مزاﻵ كتدافعي عليه هزيت بنتي وخرجت شديت التاكسي وانا كنبكي وكرشي على فمي وتالفة شيفور اختي فين غتمشي وانا كنبكي وهو كيدور فتالي عطيتو لعنوان ديال المحل دكمال
ياريت مامشيت كنت متآكدة كمال ميديرهاش ولكن واحد اﻷحساس كييجيني حيرني ضروري نعرف شنو واقع مول التاكسي ابنتي ردي البال لراسك ومتبقايش تخرجي بوحدك ونتي فهاد الحالة مرديتش عليه ومشيت وقفت فلباب ديال المحل ما بان لي كمال والو واحد شوية ندور لقا عمي حسن عاد رتاحيت هاد الرجل هو اليد اليمنى ديال كمال كان كيجي لعندنا لدار مرا مرا وهو يسولني اش جابك ابنتي لهاد لبلاصة الموسخة راها مشي ديال مقامك لا حول ولا قوة اﻻ بالله الله يهدي سي كمال خلا بنت الدار والتباته والعقل ومشا لوسخ ديال العياﻻت بقيت حلال فمي فهاد الشي حسيت رجلي بردو عليا وشداتني الدوخة وسولتو فين كمال قالي بلي منهار كتب المحال فسميت لمكتسماش مبقا جا وحتى هو خرج من الخدمة هدي مدة وجا باش ياخد خلاص ديال 6 شهور صافي تماك وليت كنتفكر اﻷيام لي كان كمال كيجي مغير وقررت نشوف هاد خيتي لبدلني بها وهي تخرج مالكي واقفة تماك هادي ساعة واش خاصاك حتى نجي ريشك عاد تحيدي من الباب خلعاتني واحد لكمارة كتخوف كلها سيكاتريس مشيت كنجري ماحسيت براسي حتى لقيت راسي هازابنتي وحدا الدار معرفتش كيدرت قطعت ديك المسافة على رجلي دخلت لدار لقيت فاطمة مرت لوسي الكبير كتجمع الحالة وهي تشوفيا وتضحك شتك جايا بوحدك مجابكش كمال ههههه وقيلة سمح فيك فداركوم ونتي بحال لعادة ﻵصقة مقديتيش تجلسي حتى نهار هاء نسيت نتي اصلا مغيقبل بيك حتى واحدهههههه جريت لبيتي وانا مزال عندي امل يكون كلشي كذوب واخا هادشي لسمعت صونا تلفون كمال كيعيط الو حبيبة واش نجي موراك نمشيو نتغداو فشي بلاصة تبدلي لجو عاد نرجعو لدار انا واش راك فلمحل هو اه مزال تماك سكت وحسا قلبي وقف وتنفس وقف ليا وهو مالكي سهام واش واقعا ليك شي حاجة قطعت عليه وانا كنشوف فتصاور ديال عرسنا لمعلقين ونطيح فيهم بلا منحس حتى جرحت راسي واحد شوية وهو يدخل لقاني فديك لحالة ويدي كلها دم مالكي شنو واقع وانا دموعي فزكو حوايجي مابقيت حتى لهدرة نقد نخرجها كانشوف فيه ونغوات شنو درت ليك اش لغلط لي درت معاك بدلتيني بهاديك هو بقا كيبكي ويقولي مشي كيفهمتي خليني نشرحليك وانا شنو غاتقول مشيت لمحل وشفت كلشي بعيني بلا متكدب انا عرفت كلشي على اﻷقل ميبغيتي تبدلني ختار ماحسن مافكرتيش فوﻻدك جا عمي لحاج ومي هنية مالكوم ملي سمعو لغوات غيشافوني فديك لحالة سكتو ضرت عندهوم وكنبكي كنتو عارفين بهاد الشي لدارو ولدكوم وانا اخر من يعلم مقديتش نبقا جيت خارجا وشدني لوجع فكرشي لحريق قوي مقديتش نتحمل وفقدت الوعي
عيتو ﻷسعاف هزاتني دخلوني لعماليات مباشرة حيت لوﻻدة كانت صعيبة مع تؤم لعندي درت لعملية وتزاد عندي 2 وليدات ولكن انا بقيت فغيبوبة مدة شهر اﻷطباء معرفوش السبب عﻻش وﻻدي فالحضانة مساكن بﻻ ميعرفو الحنان والريحة ديال مهم واحد صباح حليت عيني كنشوف غير ضبابا كنسمع لهدرة دكمال وغوات وليدات صغار معنديش الجهد باش نتحرك او نتكلم حاسا راسي بحال يﻻ منملة اومبنجة شوية وهي تدخل لفرملية شافت فيا وهي تعيط لطبيب وقالت سي كمال المدام فاقت الحمد الله على سﻻمتها بغا يجي حدايا مخلتوش قالتلو حتى يجي الطبيب ويشفها هو اﻷول منبعد يامات وانا على داك الحال حتى وﻻدي معنديش الرغبة نشفهوم واحد الحالة اﻷكتئاب شداتني حتى كمال كلمى بغا يدخل عندي كتشدني حالة هستيرية صعيبة حتى الطبيب منع عليه الزيارة ديالي حتى نتحسن حيت كلماشفتو كتزيد حالتي تدهور....بقيت مدة فالمستشفى المهم وليت كنهز وﻻدي وكيجيبولي بنتي وئام لكانت هي سباب دوايا مبغيتهاش تعيش لعشتو انا كتبولي على لخروج جا عمي الحاج يخرجني حتى كمال مبقاش يقد يبان حدايا كيخاف لنمرض عاوتاني مشيت لدار معى ولداتي ولكن مقديتش نزيد ندخل لدار كنحس بحال شي حد كيخنقني قررت نمشي نطرق الباب ديال اﻷب ديالي لعمرني قصدتو حتى لدابا دقيت حل عليا خويا لعمروا شافني شكون بغيتي شفت فيه وغلباتني البكية طرت عليه عنقتو راني ختك سهام جا الوالد شافني دخلنا تعرفت على خوتي لخرين كانو ولد و 2 بنات عرفتهوم بوﻻدي بقاو يلعبو معاهم ويسولوني سبحان الله هاد الوليدات باش كتفرقي بيناتهوم انا هدا ياسين وهدا الياس شوية وهي تدخل مرت با شكون لجا عندنا سهام كتبانيلي مريضة ياك ﻻباس وفين راجلك واش غتعشاي معانا انا حشمت بقوة اﻷسئلة وبا يقوليها راها جات تعرف وﻻدها على جدهوم ههههه ﻷ اسيدي راها سمح فيها راجلها وجايا تلسق ليك وﻻدها واش انا متكافيت حتى بوﻻدي عاد نقبل بوﻻد الناس بقات هي والواليد متضاربين هزيت وﻻدي وخرجت كنشهق وقلبي كيتقطاع علاش اربي انا لعايشا فلعذاب ملقيت حد يصبرني ووﻻدي كيبكيو معايا مشيت لواحد جردة وبقيت جالسا وكنفكر بحالي لوصلت ليه بلا ميكون عندي دخل وهي تبان ليا مي جالسا محسيت براسي حتى وقفت حداها ونسولها نتي ام نتي انا مغنسمحش ليك على هاد العذاب لعايشا بيه فسبابك نتي تخليتي عليا بلا متفكري حتى مرة كيدايرى حالتي واش واكلة وﻻ جيعانا واش مريضة وﻻ صحيحة شافت فيا وقالتلي انتي بنت باك وعماماتك هما السباب فاش نسيت عندي شي بنت بتصرفاتهم معايا وانا اشنو دنبي باش نبقا يتيمة وواليديا عايشين ناضت عطاتني بضهرها ومشات بقيت نبكي حتى حسيت بعينيا نشفو
قررت نرجع لدار ونواجه كلشي على قبل وﻻدي ومبغيتش حتا انا فيوم من اﻷيام يشوفو فيا بعين العتاب او الكره وانا غاديا كيتلقاني كمال كان كيقلب علي مخلى فين سول عليا، سهام فين كنتي تقلقت عليك كنت غانحماق لتكوني درتي فراسك شي حاجة وانا نشوف فيه بنت ليك حمقى انا مليوم غنعيش على قبل وﻻدي حتا واحد اخر مايستحق نقتل راسي على قبلو بغا يشد ليا يدي ولكن مسمحتش ليه مشينا لدار وكولشي كيترقب آش غيوقع تصرفت عادي بحال حتا حاجة ما واقعا مي هنيه ابنتي على سلامتك والله يكملك بعقلك الراجل يدور حتى يدور مرجوعو لوليداتو خص غي شوية الصبر راحنا ابنتي باش درنا هاد العائلة وكبرناهم تاحنا داز علينا الهم وخا هكاك صبرنا وكلشي كيتعوض مع الوقت......دازت عامين على هاد الشئ ولكن كمال حتى لدابا مسمحت ليه كيجي كل ليلة ويبوس رجليا باش نعطيه فرصة يشرح ليا ولكن دائما مكنخليهش صافي قلبي تهرس ومابقيت نقد حتى نشوف فيه اونتكلم معاه واحد النهار غدا نجيب وئام من المدرسة وانا تبانلي فاطمة مرت لوسي كتهدار معا شي وحدا وكيتناقشو بصوت مرتفع قربت منهم لقيت هادك الحتالة لكان مزوج راجلي اش عرفها بفاطمة وعلاش كيتغاوتو مفهمت والو شوية جبدات فاطمة فلوس كثيرة وعطاتها لؤخرا وبقاو يضحكو زادت الحيرة والشك فراسي بغيت نعرف اش جاب الشامي على المغربي جبت بنتي ورحعت لدار بقيت نهار وما طال وانا مراقبة فاطمة حتى لواحد النهار وهي تجيها واحد المكالمة بقات كتصفار وتزراق وفاﻷخر هزات تلفون ومشات لبيتها جاني الشك تبعتها وبقيت كنتسنت من شقة ديال الباب الو شنو خاسك عاوتاني واش مكفاتكش لفلوس لخديتي انا دابا معندي منين نجيبلك عاوتاني نتي لستافدتي من الخطة لي عطيتك دغيا ضحكتي على كمال وخديتي المحل لكونتي تخدمي حياتك كلها وما تملكيهش ودابا كتهدديني من لفوق راني يلا تفضحت غندمرك معايا المهم مشيت مسلت لبيتي باش متحسش بيا وبقيت كنفكر اش هادشي وكنحاول نستف اﻷفكار ديالي انا ضروري نفهم مزيان هاد اللعبة الحقيرة عييت على كمال فتلفون مكانش كيعمر الدار باش مايزعجنيش تفاجئ سهام ياك ﻻباس الدراري مزيان نتي مزيانة انا كلشي هو هداك بغيت نتكلم معاك ضروري واخا انا جاي دابا ﻷ انا باغا ندوي معاك على برا المهم خرجت تلاقيتو وهو الفرحة شاداه سحابو غنتصالحو مشينا شوية ووقف وجبد المصحاف ودارو على عينيه وبدا يحلف بلي عمرو مامس شي وحدة منغيري منهار تزوجنا وهو مخلص معايا وعاطي وعد على راسي نبقى نبغيك حتى الموت منكدبش تاترت بزاف ولكن بقيت شادا راسي كيفاش يضحك علي بكلمة انا دابا بغيت نعرف لوقع بالتفصيل شوف ماتخبي عليا حتى تفصيلة كيدرتي تعرفتي على ديك لمرا كمال واخا يلاه نجلسو فشي قهوة ونهدرو المهم بقيت كنسمع ليه ومصدومة واش هاد الشئ فيلم هندي المرا جات لعندو بحال شي كليان خدات شئ اتات وفراش وطلبات منو ليوصلو معاها حيت معندها حد يعاونها صرد الدراري لكانو خدامين عندو هزو داكشي وصلوه من بعد يومين كترجع تكلم معاه فتلفون المحل وطلبات منو يجي يشوف شي ديفويات فالتوب داك النهار جمعة ولخداما مكيكونوش فالمحل كيكون غير هو كيجمع الحسابات رفض يمشي لعندها ولكن قنعاتو حقاش غيجيو عندها شي ناس غدا وما بغاثش يشوفو داك الشئ المهم مشا عندها دخل وهي اش تشرب كيقوليها زربان غنشوف الخدمة علاش جيت تحقق من العبارات لكانت عندو لقا داكشي مطابق معى لسردلها قاليها عطاتو العبارات ناقصين هي مشي مشكل خود العبار الصحيح وتلمنبعد وكملوه جابت ليه واحد لكاس ديال العصير وبزت عليه حتى حشم وشربو منبعد معرفش شنو وقع منبعد لقا راسو بلا حوايج وهي ناعسا حداه بقى فصدمة واحد الشوية يسمع الدقة فالباب معرف باش تبلى هي ناضت ملوية فيزار، جوتي خوتي حتا هجمو عليه بقاو عليه بالضرب
حتى سنالهم على واحد الورقة كتلزمو باش يتزوج بيها المهم خﻻوه يمشي بحالو على اساس يرجع من بعد يديرو العقد بقا شي سيمانه وهو غيكيدور ويخمم شنو الحل لغادي يدير فهاد الورطة حتا كيتعرضوليه واحد نهار حدا لمحل وجبدو عليه سيوفة وهددوه بلي غيدبحوه هو وعائلتو إﻻ ما وفاش بهضرتو خاف ودار داكشي لطلبو منو ديك الساعه عرف بلي انا حاملة نسا داكشي مع الفرحة لكن هي كانت كتجي عندو لمحل وتطلب لفلوس وكتقول ليه حتا هيا عنده لحق فيه خصوصا من عرفاتني حاملة بتوام وبقات كتهدد وتحلف حتى دير ليه الشوها فاﻷخير بقات تبتز فيه باش توافق على الطﻻق بشرط يكتب ليها المحل كمال لقى الخبر انتشر بواحد السرعة لتعجب ليها خصوصا ملي جات عندو فاطمة وطلبات منو باش يلقا شي حل باش انا منسيقش اﻷخبار بحيت خايفة علي وعلى ليفكرشي كمال مفكرش وماترددش مشا كتب المحل فسميت هادك لحتا سميتها مكتخرج ليا وحتا هيا وافقت على الطﻻق بلا مشاكل انا دابا فهمت كلشي وعدرت كمال وعنقتو بقوة توحشتو وحكيت ليه داكشي لعرفت حتا انا وقررنا نتاحدو باش نكشفو هاد المؤامرة مشا كمال عند كنزه (مراتو)طلب منها سماحا على داك تعامل ليدار معاها وآكد لها انه مل من مراتو وباغي يبدا صفحة جديده معاها هيا تيقاتو وطاحت فالشبكة بقا كيتلقا بيها بزاف حتى عاودت ليه كيفاش تفاهمت هي وفاطمة باش يخربوليه حياتو وتنتقم من مراتك لكانت معقداها فحياتها كمال تماسك وطلب منها تعاونو باش يلعبو عوتاني ضد فاطمة كنزه عجباتها القصة وبدات كتفكر باش تبدا وكمال كيقوليها انا فجنبك حتى لنهاية طلب منها تمشى لدار وتعاود كلشي لباه وهكاك وقع عيط على صاحبو فاﻷمن حكا ليه من اﻷول تعاطف معاه وقرر يعاونو دخلو لدار بلا ميشوفو حد فلوقت لي هدر مع كنزة تجي داكشي لكان حلت الباب فاطمة كتفاجئ بكنزة بقات كطلب منها تمشي لكن لؤخرا بدات كتغوت حتى تجمع كلشي عمي الحاج شكاديري هنا منبعد ما شتتي عائلتي وضيعتي ولدي كنزة انا ماشي بوحدي لخطتت لداك الشئ العدو ديالكوم عايش معاكوم وما عارفينش فاطمة بلا ماتديها فحال هاد اﻷشكال اعمي دخل فحالك انا غنتكلف كنزة طارت عليها ريشاتها وكاتعاود داكشي لوقع وبالتفاصيل وفاطمة ماتيقوهاش واش انا مرت ولدكوم شحال من عام داباغتكدبوني وتيقوها شديت فيدين كمال وقلت لها باني عرفت اللعبة ديالها وقررنا اناوراجلي نبينو الحقيقة ديالها قدام الجميع وهي تغوت وتزيد لعندي وقالت ليا بانها كتكرهني كتر من اي حاجة فهاد الدنيا وبلي ليلتعطات ليها الفرصة تقتلني بلا تردد هههههه وبليدارت داكشي باش تكرهنى فدنيا وتخليني ننتاحر بيدي لكن انا كنت قوية ربي عطاني الدرية لتحرمات منها وراجل يبغيني ويراعيني وهي ممزوجاش انا شنو دنبي عاد جيتي وليتي هي كلشي فالدار وخا حنا كبار منك عمي الحاج هادشي كلو خرج منك ولدي مصبرو على العيشه معاك وخا مجبتيناش الوليدات هدا الجزاء ديالنا الضابط سي منصف خرج ودخل فالنزاع فاطمة وكنزة مشاو لحبس ......دازت سنين دابا وئام دكتورة تبارك الله وياسين وياسر فكلية الهندسه غيتخرجو هاد العام واناوكمال مزال حبنا بحال النهاراﻷول او كتر عايشين فسعادة الله يدومها علينا......
النهاية