أناا صفاء 28 عام الناس كلهم كانو تيقولولي اسم على مسمى..حيت كنت صافية وعندي نية وحدة مع كاع الناس مكنعرفش شنو هو الحقد ولا الغدر..
ولكن تمشي الرياح بما لا تشتهي السفن حتى واحد ماعارف أشنو كيتسناااه القدر ديما تيفاجأنا بشي حوايج ماكيكونوش على بالنا ولكن هادشي اللي كان مخبي لي القدر ديالي ماكانش على البااال!!!!!!.:...
المهم بحالي بحال البنات قريت...
وكنت ديما تنجي الأولى في القسم حيت كنت تنقرا مزيااان وشديت الباك بميزة زوينة بزاااف اللي خلاتني ندخل لكلية الطب بعيني مغمضيين..
وتماك تعرفت على ياسين ملاك على شكل ٱنسان كنا مفاوتين ب 4 سنين أنا عرفتو في العام التاني ديالي وعشنا أنقى وأطهر حب في الدنيااا بغيتو بزاااف وحتى هو بغاني مللي دوزنا عامين في علاقتنا كان هو بدا الخدمة وكانو الناس تيشكروه بزاااف والحمد لله عائلتو كانو ميسورين عاونوه بزااف باش دار عيادة ديالو خاصة ومللي دازت 3 أشهر من نهار دار العيادة اتصل بي واحد النهار...
صفاء: ألو الحبيب ديالي كيف عامل؟!!
ياسين: موحشك و بزاااف كيدايرة مع القراية راني خطفت شوية الوقت باش نسمع صوتك ..راه الكليان على برا تيتسناو هههه
صفاء: أحسن مادرتي والله حتى انا توحعلياا مع صوتك..
ياسين: واخا أحبيبة غدا نشوفك غنجي عندك الكلية واخا؟
صفاء: أكييييد نتلاقاو راني توحشتك..
ياسين: أنا اكتر يله حبيبة نخليك نخدم شوية هههه
صفاء: بسلامة حياتي
الغد ليه جا عندي ومشينا لواحد القهيوة تنجلسو فيها ديماا..
وبقينا نتحدتو شوية وكل واحد تيعاود للاخر على اش دار هاد الايام بلا لاخر..
ياسين: أنا قررت واحد القرار أ صفاء..
صفاء: ممم قول أحبيبي..
ياسين: نتي عارفة شحال كنبغيك وكنحتارمك..
صفاء: أه وحتى أنا نموت فيك أياسوني ههه
ياسين: انا دفعت في پرطمة ..وهي واجدة لابغيت نسكن فيها..
صفاء:مبروك أسيدي االله يدخلها عليك بالربح...
ياسين: خاصك تقولي الله يدخلها علينا حيت هاديك غتكون لينا بجوج..
صفاء: ان شاء الله..
ياسين: صفاااء امتى غنجي نخطبك؟
صفاء: تخطبني؛!!!(تزنكت وتلعتمت وليت ندخل ونخرج في الهضرة بالفرحة)
ياسين: أمالك هههههه ضحكتيني وامتى نجي راني علمت دارنا..
صفاء: بصح تدوي من نيتك هههه
ياسين: لا كنتفلا!!!
صفاء: متصورش شحال كنبغيك انت اعظم انسان شفتو في حياتي
ياسين: صفاء أنا نهار جيت هضرت معاااك حيت عجبتيني بزاااف وأول مرة شفتك شفت فيك مراتي ماشي صحبتي وداكشي لاش حاولت نحافظ عليك هاد المدة ومنقللش احترامي ليك تتكوني حلالي..
صفاء: لهلا يخطيك علياا أنا غنهضر مع الدار ونعلمك امتى تجيو..
ياسين: حتى انتي لهلا يخطيك أحبيبة والله يخليك ديما هاكة صافية ونقية كنبغييك.
صفاء: هههه تتحسسني أني ملاك ههههه ايوا ربي يخليك أهم حاجة عندي أنك تعرف أني كنبغيك وتاحاجة ماتقدر تفرقنا فين نلقا بحالك هههه تالامرضت تداويني هههه..
المهم وصلني ياسين للدار ودخلت بدلت و كليت ومشيت قاديت شي بحوت كانو عندي وخرجت عند ماما وبابا وخويا الصغير باش نتعشاو مجموعين..وفي وقت العشا..نطقت..
صفاء: ممم بغيت نقولكم شي حاجة..
ماما: هضري أبنتي راه في النعاس..
بابا: حتى أنا هههه فايق الصباح بكري..
صفاء: هههه كلنا في الهوا سوااا..المهم واحد الطبيب كان معانا في الكلية جا عندي اليوم للكلية وقاللي باللي بغا يخطبني. وطلب مني ناخد ليهم موعد عندكم باش يجيو يدويو في (حدرت راسي حشمانة)
بابا: أش غنقولوليك أبنتي هاديك راها حياتك لا كنتي موافقة مرحبااا بيه ..
صفاء: آه موافقة أبابا مللي كان تيقرا في الكلية كلشي كيدوي على الأخلاق ديالو كنظن مغنلقاش اللي يحتارمني ويحطني في عينيه بحالوو..
ماما:(ناضت عنقتني) مبرووووووك أبنتي..والله حتى فرحت ليك الله يكمل عليكم بالخير..
صفاء: لهلا يخطيك أماما...المهم امتى نقول للناس يجيو؟!!!
بابا: من هنا لسيمانة بينما وجدنا راسنا شوية واخا؟..
صفاء: واخا أبابا باش ماكان غنصيفط ليه نمرتك باش يتاصل بيك ويكون داكشي بيناتكم..
بابا: إيييه أبنتي هادشي اللي خاصو يكون ..
المهم داكشي اللي كاان تفاهم مع بابا وطلب ايدي بالتيليفون...
ومللي وصل الوقت اللي غيجيو فيه كنت كنطيح و نوض هههه الخلعة والفرحة كلشي تخلط عليااا...
دوزنا الخطبة كانت ولا الأحلام خصوصا أني غناخد اللي كنبغي واللي كيبغيني كنا أنا وياسين فرحااانين حيت الحب ديالنا غيشوف النووور و غيتزاد كتر وكتر ..واتافق مع بابا باللي غنديرو العقد في أقرب وقت ومن بعد نبداو نوجدو للعرس يعني من هنا للصيف ان شاء الله نكون في دار راجلي حبيبي هههه..
دازت 4 شهور على العقد ومالين الدار غارقين في التوجاد هههه بنتهم الوحيدة غتزوج هههه الروينة نايضة..
ووصل نهار العرس بعد طول انتظااار..
كانت قاتلاني الفرحة وف نفس للوقت ماساخياش بواليدي نخليهم ..والفرحة ديالي كانت مضوبلة مللي عرفت أني نجحت وبميزة هههه الحمد لله قرب الحلم ديالي يتحقق ونكون طبيبة كيف ما تمناني نكون بابا الحبيب..
المهم اليوم نهار عرسي وأنا خاصني نكون في قمة السعادة ..
برزت حدا راجلي العزيز وبقينا الليل كامل شادين النميمة في الناس هههه وفمي ماتسدش بالضحك هههه كانت باينة في الفرحة..
المهم دوزنا ديك الليلة وفاش كنت رايحة مع راجلي شفت ماما تتمسح دموعها وتتشير لي "باي باي" ماحسيتش براسي حتى بديت نبكي وياسين تيسكت في وانا نمشي نجري عند ماما عنقتها وقلت ليها كل نهار ندوز نشوفك ماتخافيش انا غير حداك اماما الحبيبة..قالتلي سيري ابنتي ممزيانش ترجعي لعندنا سيري سيييري راجلك تيتسنا..بستها ومشيت مع ياسين في الطونوبيل للوطيل فين كنا حاجزين ...دوزنا فيه 3 أيااام كانت أحلى أيام في حياتي ومن بعدها سافرنا للشمال دوزنا 2 سيمانات خراين وغير جينا جاو دارنا جابو الفطور هههه عطلناه،،جمعنا شوية و ضحكنا شوية مع عائلاتنا داز النهار زوين تغدينا مجموعين ودرنا الكوتي..ومشاو ..
فاش سدينا الباب شاف في وابتسم،،
ياسين: انتي أصفاء أحسن كادو عطاه لي الله كنواعدك نخليك أحسن وأسعد وحدة في هاد الدنيا والله يقدرني ونكون الراجل اللي تمنيتيه.
صفاء:.(عنقني بالجهد وأنا غمضت عينيا ومكنتش باغا نفيق من هاد الحلم) حتى أنا أحياتي تنبغيك اكتر من نفسي والله يقدرني نسعدك..
من بعد دوزت معاه 3 سنين كانو أحلى أعوام في حياتي شفت منو كل الحب والاحترام والتقدير ومكنتش عارفة باللي السعادة حدها 3 سنين مع الأسف!!!!!!!!!!
المهم من بعد 3 سنين زواج كملت قرايتي وخدمت طبيبة في واحد المستشفى بعيد شوية على داري..ومن بعد 3 شهور من الخدمة جات واحد الحالة مستعجلة ..
الممرض أيوب: دكتورة صفااااء دكتورة صفاء...عتقي حالة مستعجلة سربي..
مشيت كنجري لبلوك لقيت شابة في مقتبل العمر..حاولت تنتحر درنا ما في جهدنا باش نعتقوها ولكن كان فات الفوووت بقاات في بحالاش ولكن ماكان بيدي ماندير السم انتشر ليها في داتها كاملة وماتت..
كملت الخدمة وخرجت برا كنتسنى طاكسي..وانا نسمع شي حد تيغوت: والللله لا بقاات فيك يا القتالة..
مللي درت لقيتو راجل باقي صغير شوية ديك 32 عام قلت واقيلة ماشي معايا وهو يجي تالحدايا بغا يضربني كاع...وبقا يعاير...انتي اللي قتلتيها قتلتي اختي..
صفاء: الله يخليك أسيدي جمع راسك علاياش كتهضر!!!!
قاللي: كندوي على ختي اللي شربت السم ومعتقتوهاش وخليتوها تموت ولكن والله لابقات فيك قتاااالة...
بقيت مصدومة ماعرفت ماندير وهو مشا فحالو شديت طاكسي ومشيت للدار..
وصلت لقيت ياسين في الدار موجدلي مسكين عشا رومانسي الساعة لقاني ماعندي كانة..ولكن ماقدرتش نبين ليه شي حاجة حيت غادي يتخلع علي..
تعشينا ودوزنا ليلة رومانسية وزينة ونعسنا بكري شوية حيت الصباح تابعانا الخدمة ...على النبوري..
فقت الصباح وجدت الفطور ولبست وفطرنا أنا وياسين..ووصلني للمستشفى فين خدامة ومشا لخدمتو ..
كان داك النهار مشارجي بالخدمة الله يستر ماحكيتش راسي..وحتى الغدا تغديت غير في الخدمة ماكملت حتى ل 9 ديال الليل حتى جات الطبيبة اللي غتخدم الليل..
خرجت وبقيت تنتمشى شوية بنما نلقا طاكسي وتقول هاد الطاكسيات انقارضو وكانت الدنيا خاوية حيت المستشفى كان خارج المدينة..
شوية بانلي طاكسي ولا طونوبيل جاية ووقف حدا رجليا وبالزربة هبطو من الطونوبيل 3 ومن بينهم هاداك خاينة اللي هددني حيت ختو ماتت
خرجو من الطونوبيل ووقف عليا تيضحك وانا ميتة بالخلعة تنشوف قدامي ومورايا الدنياا خاوية ماكاين اللي يفوكك..
وهو يجمع إيديه تالسما داك خاينة وسرفقني بديت نغوت وهوما يسدو لي فمي باللساق وطلعوني صحة للطونوبيل وبديت نتركل ونتحير وهوما يكتفولي إيدي ورجلي ومشاو بي مسافة طويلة ديال ساعة وهوما يغمضولي عيني حسيت بروحي غتخرج من بلاصتها غوتت تاعييت ومخليت مادرت وبقيت عاطياها للبكااا تاسخفت مابقيتش عقلت على راسي ..
مللي فقت لقيت راسي فشي بلاصة بحال العروبية مسدود عليا فواحد البيت حالتووو وكللو موسخ ..
ومن بعد ساعة تقريبا باش فقت دخل عندي داك الحيوان..
قاللي: غندمك على النهار اللي تزاديتي فيه..غير بلاتي أرواح الناس عندكم لعبة غنخليك تمناي الموووت ومغنعطيكش شرف النيل ديالووو...
حيدلي اللصاق على فمي وبقيت نبكي..
صفاء: واسيدي الله يهديك راكم جبتوها تافات لفوووت السم سرا ليها في داتها الله يخليك خليني نمشي فحالي أسي..
قاللي: أحمد سميتي أحمد..وديك الهضرة كوليهااا و الحساب غيبدا وجدي راسك..
صفاء: سي أحمد سي حم... عافااااك (وكنبكي ونغوت)
ماجيت فين ندور تا شفتو دخل تاني هو وصحابو وشدوني مارسو علي جميع أنواع الإعتداء...الضرب و الإغتصاااب قتلوني وأنا حية داكشي لاش سميت هاد النهار باليوم الأسود ..
الغد ليه هزوني بحال الشرويطة..ورماوني في واحد الخلا..
لقاتني واحد السيدة وعيطات للإسعاف جاو داوني..
وعرفو باللي تعرضت لإعتداء..
ولكن أنا طلبتهم باش مايقولو والو لراجلي و مللي خرجت عيطت ل ياسين..
صفاء: ألو ياسين أش تتعاود
ياسين: حبيبة ياسين توحشتك موووت حاولت بزاف نتاصل بيك ولكن متيشدش لي عرفت باللي غتكوني غارقة في الخدمة أالطبيبة ديالنا .هههه
صفاء:(ضحكت ضحكة صفرا) آه داكشي اللي كاين ..المهم أياسين أنا غندوز نيشان لدارنا حيت توحشتهم غنجلس شي يومين ولا 3
ياسين: اللي بغات حبيبة نيت انا عندي خدمة هاد السيمانة في مراكش خاصني نحضر ضروري تهلاي لي في راسك نشوفك فاش نجي..
صفاء: إن شاء الله ..إن شاء الله الله يديك على خير..
ياسين : آمين أحبيبة ..واخا را صوتك ماعجبنيش..
صفاء: (كنتقطع وماقادراش نبين) لا أحبيبي غير ضربني البرد شوية يله نخليك دابا بيناتنا التليفون..
ياسين: بسلامة كبيدة..
غير قطعت معاه وانا نطيح في بلاصتي وبقيت نبكي ياربي أش هاد المكتاب هادشي كتر من طاقتي ..
نضت كملت طريقي..وأكيد فاش وصلت لدارنا ماما وبابا تخلعو فاش شافوني بديك الحالة ومقدروش يتيقو يسحاب ليهم ياسين ضربني
ماما: ألله أبنتي أش هاد الحالة..
صفاء: (عنقت ماما بالجهد وبقيت نبكي) تكرفست أميمتي تقهرت..
ماما: عمرني ماكنت نتيق باللي ياسين يدير هاكة..
صفاء: ش..شنو ياسين..!!! لا أميمتي ياسين مادار والو انا تلقاولي الشفارة وضربوني ..(بديت نبكي حيت مقدرتش نقوليها باللي مارسو عليا جميع أنوااع الإعتداء اللي ممكن يكون)..عافاك أميمتي هادشي ماخاصوش يوصل ل. ياسين ..
مللي جا بابا طلب مني باللي خاصني نديكلاري ولكن انا مابغيتش حيت قلتلو صافي رامالقاو عندي والو وضربوني وأصلا ماشفتش أوصافهم..
دوزت ديك السيمانة اللي ماكاينش ياسين فيها في دارنا وحتى الخدمة مامشيتش ليها درت شهادة طبية والحمد لله الجروح ديال الخارج براو ولكن الجروح الدخلانيين كانو كلما تيدوز شي نهار تيزيدو يكبرو كثر وكثر .
عييت ومرضت ومعرفتش شنو ندير كيفاش غنقدر نكمل حياتي من بعد هادشي اللي وقع..
وشنو ذنب ياسين يكون مع مرا اغتاصبوها ثلاثة الناس..پففففففففف
هادشي بزاااف ماقادراش نستحمل..
المهم اتاصل بي ياسين..
ياسين: روحي..حياتي أنا ليوم جاي بليييز نلقاك في الدار..
صفاء: علاش ..أجي ديني ونمشيو بجوج !!!
ياسين: حبيبة والله ماكرهت العيا وصافي وزيدون أنا موحشك ماباغيش نلقا حداك حتى واحد باش نشبع فيك تعناق هههههه
صفاء: اوك انا غنمشي للدار مورا الغدا نتا معاش جاي...
ياسين: فراسك نتي ماعاجبانيش هاد ليام النبرة ديال صوتك تبدلات تاكلمة توحشتك مقدرتيش تقوليهالي هاد ليااام..
صفاء: ( آآه يا ياسين كون تعرف شداز عليا وشحال مشتاقة نشوفك ونبكي بين إيديك ونقوليك شحال تنبغيك ونعاود ليك على كل ماجرالي..آآه ثم آآه)..لا أحبيبي غير تيجيبليك الله غير هاد السيمانة كيف قلت ليك كنت عيانة شوية..وكنت شاداها باش نرتاح وصافي..يله طريق السلامة أحياتي تجي ونهضرو..
ياسين: مييكون باس حبيبة تهلاي فراسك تنبغيك..
قطع من هاد الجهة وأنا الشلالات ديال الدموع مابغاوش يحبسووو حشومة نظلم ياسين معايا يا إما نتفارق معاه يا إما نعاودلو كل شي ونخليه يقرر..
فكرت وفكرت تاعييت وملقيتش الحل ..
المهم مللي تغديت جمعت الحوايج ومشيت لداري كل خطوة كنت تنخطيها كنت تنحس براسي تنزيد نتخنق كثر وكثر ..قلبي كان تيضرب في 90..بإنى وجه غنشوف فراجلي ..بإنى قلب غنحس بحبو لي وحبي ليه قلبي تنحس بيه مزير و مقبوض ومتيعرف غير إحساس واحد هو : الكره..الكره لدوك الناس اللي ظلموني و دمرو لي حياتي...
وصلت لداري وحليت الباب ودخلت ..
أول حاجة درتها هي مشيت شفت راسي في المراية وكنتساءل واش ياسين غيلقى في صفاء اللي عرف وبغا و اختارها تكون مراتو ..
أسئلة كثيرة كانت تدور لي في دماغي ...والأجوبة ديالها مكانتش عندي...
حاولت نخلق جو زوين لياسين فاش يجي ..دخلت دوشت وقاديت حالتي ووجدتلو ماياكل و بقيت نتسناه...
تك تك تك تك تك صوت قلبي اللي كنت حاسة بيه غيسكت..
ومن بعد ساعة سمعت صوت الباب تحل يعني ياسين جا!!!
دخل ياسين وغير حط صاكو جا تيجري عندي..
ياسين: حبيبةةة حبوباتي فييينك..
صفااء: وي ياسين هانا في الكوزينة..
جا عندي تيجري وعنقني بالجهد....
صفاء: (اللله شحال كنت محتاجة هاد الحضن اللي كيحسس بالأمان ...وبلا مانحس نزلو دموووعي)توحشتك
ياسين: حتى أنا أحبيبة(وشافلي فعيني) والبكا علااااش هانا جيت..(وعاود عنقني) ايوا كاين شي عشا ولا نرجع فحالي؟؟؟
صفاء: هههههه كاين..يله نمشي نوجدو..سير بدل عليك ودوش وارتاح مع راسك..بنما نحط العشا..
ياسين: واخا حبيبة ..
مشا ياسين لبيت. النعاس وانا مشيت للكوزينة ..حسيت بالراحة شوية أنو معايا ولكن حسيت بأني خاينة ولا كدابة حيت ماشاركتش شريك حياتي همي..
المهم تعشينا بقيت نسولو كيدازت عندو التسافيرة و بقا يعاودلي وفي الهضرة لمح لي باللي توحشني بزااف وتماك تشوكيت ومعرفت ماندير ..حيت أنا ممستعداش نكون معاه في الفراش فهاد الفترة...ومع ذلك حاولت ننسى كل مافات ونرجع مع حبيبي وراجلي كل اللحظات الزوينة اللي عشناها..
ناض هو وخدم موسيقى رومانسية و شد لي فإيدي ونوضني نشطح معاه السلوو
بقا تيشوفلي في عيني وباسلي إيدي وقاللي:
ياسين: خاصك تعرفي باللي نتي أجمل كادو عطاه لي الله
صفاء: (عيني دمعو) معرفتش شنو غنقوليك من غير كلمة تنبغيك ..
غمضت عيني مابانولي غير دوك الحيوانات اللي اغتاصبوني وانا نبدا نغووووت:
صفاء: لااااالااااااا عافاك لاااا ماقادرااااش
ياسين: حبيبة مالك بليز ماااالك
صفاء: (تنغوت ونبكي بحرقة) اسمحلي ياسين ماقادراااش ماقادرااش (ماجيت فين نكملها تاطحت)
ياسين: صفااااء صفاااء
مللي فقت عاودلي ياسين:
ياسين: انتي عندك شي حاجة أصفااء عاوديلي..شنو بيك
صفاء: (شديتلو إيديه ) سمحلي أياسين معرفتش مالي والله غير سمحلي وخلاص..
ياسين:صفاء لآخر مرة تنسولك واش مخبية علي شي حاجة؟؟؟؟انا 3 سنين وانا مزوج بيك عمرني شفتك بهاد الحالة!! العجب..
صفاء: لا معندي مانخبي عليك ..غدا غنمشي للخدمة و نشوف الطبيبة سعاد تشوف مالي ..
ياسين: أصلا انا دقيت ليك واحد البرا وقست ليك الضغط وبانلي هابط..ودابا نيت خاصك تاخدي الدوا..
صفاء: واخااا
ياسين: ارتاحي أحبيبة ..انا غنخرج نتفرج شوية ويلا احتاجيتي شي حاجة عيطيلي..
خرج ياسين لبرا وانا بقيت تنبكي على حالي وتنقول حرام نظلم معايا هاد السيد ونخليه يعيش مع مرا غتعذبو فحياتو..
المهم الغد ليه دخلت للخدمة والحمد لله تاواحد ماكان فراسو أش وقع معايا عرفوني غير كنت عيانة وخلاص..
حسيت بواحد الطاقة جديدة فاش بديت الخدمة وحاولت ننسى ديك الحادثة ..والحمد لله من بعد شهر وليت حاسة براسي احسن ..قررت نطوي الصفحة ونبدا حياة جديدة معاه رغم الجروح اللي فقلبي..
ولكن كيف كيقولو مللي تنبغيو نطويو الصفحة وننساو الماضي هو تيدير الرجلين وتيجي يجري يقلب علينا
واحد النهار كنت غاديا للمستشفى كيف العادة وأنا نسمع واحد الصوت تيقولي هيييه!!! الطبيبة ديالنا!!! لاباااس!!؟ ههههههههههههه
بديت تنزرب وهو مورايا تيزرب حتى شدني من دراعي وانا ندور لقيتو داك الحيواان اللي سميتو "احمد" كانت عندي واحد الطاقة كبيرة ديال الغضب شديتو وشنقت عليه وبقيت نضررررررب نضررررب وهو يصدمني بواحد الكلمة ..
احمد: غير بلاتي تكالماي أالطبيبة وشوفي هاد الصورة!!
مللي شفت الصورة لقيت راسي فيها عريانة وهوما تيتعداو عليا مقدرتش نصبر بهول الصدمة طحت ..
ومللي فقت لقيت راسي في المستشفى دايرين بي الاطباء وكلهم أصدقاء ديالي وقالي الدكتور خالد:
خالد: على السلامة ألالة صفاء مايكون باس..
نضت مخلوعة..
صفاء: ش..شنو وقع!!!
خالد: والو أدكتورة واقيلة كنتي جاية للخدمة و طاحليك الطونسيو وطحتي حدا المستشفى!!
صفاء: وشكون جابني هنا؟؟؟؟؟؟
خالد: أنا كنت داخل ولقيتك مرمية في الدخلة ..المهم راه ياسين جاي!!!
صفاء: علاش خلعتوه انا لاباس..
خالد: قلت غير خاصو يعرف وصافي..
صفاء: مكنتش باغاه يتخلع على والو..
خالد: المهم. أدكتورة لاباس عليك نخليك دابا عندي الخدمة بزااف غير تحسي براسك بخير تقدري تلتحقي..
(فهاد اللحظة دخل ياسين )
ياسين: صفاااء صاڤا حبيبة شوية..!!!؟
صفاء: ماتخافش را غير خلعوك هكاك..
خالد: يله الله يجيب الشفا..(سد الباب وخرج)
ياسين: (باسلي إيدي) ماقادرش نتصور توقع ليك شي حاجة خايبة،..
صفاء: ياسين ديني للدار عفاك..ديني دابا ماقادراش نبقا دقيقة هنا..وديرلي شهادة فيها 3 أيام..
ياسين: هي الأولى أحبيبة..
مشينا للدار و نضت عادي واخا ياسين قاللي ارتاحي قلتلو لا راماكاين والو..
دوزت ديك الليلة غير في البكا والتفكير..ماكانش ياسين كان خدام بالليل..
مابقيتش عرفت ماندير يله حسيت براسي وليت شوية وبديت ننسى اللي داز علاش ياربي علاش وقعلي هادشي..انا عمري آذيت شي حد..
نضت وتوضيت وبقيت نصلي الليل كامل ونطلب من الله يعاوني ويوقف معايا فهاد المحنة اللي انا فيهاا..
ونعست ..جا ياسين لقاني ناعسة مابغاش يفيقني مسكين ومشا صايب الفطووور ومللي حسيت بالتقرقيب في الكوزينة نضت لقيتو جا..عنقتو وقلتلو :
صفاء: حبيبي غير خللي داكشي انا نغسل ونجي نوجد داكشي..
ياسين: حبيبة ديالي ماشي مشكل هانا خدام بنما تجي..
حسيت براسي داك التقرب ديالي من الله حسسني بالأمااان وباللي الله معايا وعمرو يتخلى عليا وأكيد غياخدلي حقي من اللي ظلموني..
ومللي كنا كنفطرو قلت لياسين:
صفاء: انت عارف باللي جامعة شي شوية الفلوس في البنكة ياك..
ياسين: اه احبيبة هادوك فلوسك وتقدري تصرفي فيهم..علاش تتسوليني؟؟؟
صفاء: تنفكر نشري طونوبيل..حيت مرضوني الطكسيات ..انا الحمد لله عندي الپيرمي وتنعرف نسوق راك انت اللي علمتيني..
ياسين: واخا أحبيبة خللي دوك الفلوس مجموعين..انا غنشريها ليك..
صفاء: لا انت عندك بزاف المصاريف وممقصرش معايا غير خليني نشريها انا..
ياسين: والمهم اختاري احبيبة اللي بغيتي ويحن الله..
صفاء: انا باغا نشريها في أقرب وقت الى ممكن اليوم نمشيو نشوفو شي موديل..
ياسين: واخا أحبيبة..
المهم مشا معايا راجلي شفت واحدة عجباتني وكان خاصني 3 المليون كملهالي ياسين حيت مابغيتش نخليه يخلص كلشي..
كان خاصني ضروري ناخذ هاد الخطوة..باش مانبقاش نتلاقى داك الحيوان ...
ووليت تنمشي للخدمة بالطونوبيل ديالي
والحمد لله مابقيتش شفت ديك الكمارة اللي وراتني الويل. .وليت بحال المسطية تنخاف من خيالي..ولكن راه اللي تيعضو الحنش تيخاف من القنب..
دوزت شي شهر ونص في الهنا وراحة البال..وواحد النهار عيطاتلي الواليدة والواليد وقالولي باللي خاصنا نلقاو شي نهار ماخدامينش فيه بجوج انا وياسين ونمشيو عندهم حيت توحشو يجلسو معانا..مع الخدمة كاين غير الجري ولينا نشوفو واليدينا بالخطفة..
وداكشي اللي كان..مشينا واحد الويكاند تغدينا معاهم ودوزنا معاهم النهار كامل..
ومن بعد عاد عرفت علاش بغاونا نجيو عندهم حيت مللي جلسنا معاهم مورا الغدا فاتحونا في الموضوع:
ماما:الصراحة واخا ماشي من حقنا نسولوكم ولكن راكم طالعين في 4 سنين ومازال مافرحتونا بشي بنية ولا وليد !!! إيوااا؟ أش تتسناو؟؟
(ياسين ابتاسم ولكن أنا تنكريت وبقيت غير كندور فعيني)
صفاء: آه إيوا انشاء الله الله يدير اللي فيها الخير أميمتي..
ياسين: قريب أخالتي ان شاء الله حتى انا باغي نسمع كلمة بابا..
ايوا بقات الهضرة تتدور بيناتنا ..دوزنا نهار زوين ضحكنا هضرنا ...وجا الوقت باش نمشيو ..سلمنا عليهم ومشينا..وفي الطريق:
ياسين: شفتي أحبيبة خاصنا نبداو نفكرو فهاد الموضوع بجدية...
صفاء: ايوا والخدمة كيفاش غنديرو!!(بديت نقلب على الحجج الخاوية حيت انا باقا ماتهنيت من المشكلة اللي وقعاتلي وباقا حايرة اش غيدير داك الحيوان ديال " احمد" بتصويرتي!!!)
ياسين: والناس اللي والدين وخدامين أش وقع ليهم !!!
صفاء: يكون خير أحبيبي انا غنحبس الكينة وان شاء الله ربي يرزقنا( ملقيت مانقول حيت هو مصمم)
المهم داكشي اللي كان ..حبست لكينة وكان عندي أمل يتعطل الحمل من عند الله بنما نفك حريرتي..
دازت شي شهرين وانا على الروتين اليومي ديالي من الخدمة للدار..حتى لواحد النهار كنت خارجة من المستشفى..وغادية لطونوبيلتي يله حليتها وبغيت نركب وهو يجي داك الحيوان ثاني وقف علي وشدلي الباب مخلانيش نسدو..وقاللي:
احمد: ايوا ألالة الطبيبة لاباس عليك؟ بصحة الحديدة هههههه باغا تهربي مني ..وراك وراك والزمن طويل خلاوها خوتنا المصريين هههه..
صفاء: آش باقي باغي مني ..احمد الله حيت مابلغتش بيكم و شوهتكم عطيوني اتساع حرام عليكم..
احمد: انا مكفانيش داكشي اللي درت ليك ومازال تشوفي كثر وكثر..روح اختي ماغاديش نخليها معذبة وغندم اللي خلاوها تموت بسهولة غير بلاتي!!
صفاء: علاش ماباغيش تفهم باللي اختك جبتوها تافات الفوت علاش!!!!!
احمد: ماكاين لاش نبقى نتزايد معاك في الهضرة شوفي..وجديلي 2 المليون من هنا سيمانة ولا هاد التصاور غيوصلو لراجلك فهمتي!!! من هنا للثلات الجاي غنجي ناخذ الفلوس ونعطيك تصاورك ..
(مشا وخلاني مصدومة)
مبقيت عرفت باش تبليت فكرت تاعييت ومالقيتش ليها تخريجة من غير اني نعطيه الفلوس!! ولكن هاد السيد مافيه ثقة شكون قاللي غيقيلني عليه!!
أوووووف أووووف الله يلعن داك اليوم هداك هو " اليوم الاسود" فحياتي كرهت كلشي راسي كرهتو
مشيت للدار لقيت ياسين مازال ماجا..
وجدت الغدا حيت عارفاه غيجي يتغذا ومللي جا تغذينا
ومشى دخل يرتاح شوية حيث كان عياان من الخدمة خدم الليل وزاد الصباح..
المهم بقيت تنفكر فشي حل لمشكلتي وملقيتش ..كاين 2 حلول ياإما نصارح ياسين باللي وقعلي..
ياإما نستسلم للابتزاز ديال داك الحيوان!!!
وبجوجهم صعاااب
اش ندير ياربي اش ندير..قررت ماناخذ حتى قرار دابا تنفكر مزيااان..حاولت نشغل راسي بأي حاجة باش منبقاش نفكر..وهي تطيح علي فكرة أني ندخل لل"أنترنت" ونشوف شي تجارب ديال نسا تعرضو للإغتصاب وشنو التصرف اللي دارو باش واجهو المشكلة..
وفعلا لقيت الآلاف ديال العيالات تعرضو لبحال هاد الشي اللي وقعلي وكثر..
ولكن هاد النسا كانو عندهم جرأة كبيرة عليا باش يفضحو صحاب الفعلة و يوقفو لهاد الجريمة اللي تتمس بنصف الجتمع اللي هو" المرأة"..
ولقيت باللي كاينة واحد الكوتش تتساعد بحال هاد الضحايا ديال الإغتصاب وقررت نتاصل بيها حيث كانت حاطة نمرتها وفعلا اتصلت بيها وسولتها فين جات البلاصة اللي ممكن نتلاقة معاها فيها وحددت معايا البلاصة ومللي مشيت عندها قالتلي انا كوتش نادية نتمنى نعاونك..ومللي جلست ارتاحيت ليها بزاااف وعاودت ليها كلشي اللي وقعلي بالتفصيل الممل..
كوتش ناديا: صافي أدكتورة صفاء الله يخليك هاد المشكلة مغتتحلش بالبكا اللي وقع وقع..
صفاء: نتي أول وحدة نعاود ليها مشكلتي هادشي جرحني بزااااف ومقدرتش نعاودو لشي حد سمحيلي والله ماقادراش نتحمل كثر..
كووتش ناديا:خاصك تعرفي واحد الحاجة هادشي ماشي ذنبك ..نتي ضحية هادشي ذنب دوك الحيوانات اللي افترسوك ...واللي نقدر نقولو ليك هو خاصك تواجهي مشكلتك ومتستسلميش لهداك الحيوان..
صفاء: مكرهتش ياختي نلقا الحل النهائي لهادشي..هادشي اللي تنعيش بحال شي كابوس...والله توحشت حياتي القديمة قبل من داك النهار الكحل...
كوتش نادية: خاصك تعرفي أختي صفاء أني دزت من نفس تجربتك واكثر من هادي 10 سنين وقعلي اغتصاب جماعي كرهت حياتي والدنيا ومايجي منها ولكن انا ماسكتش ومشيت عند البوليس بلغت..وقلتها لراجلي وجريت وجاريت حتى تشدو المجرمين وراجلي وقف معايا تشديت حقي واكثر ومن تماك قلت خاصني نعاون البنات والعيالات اللي تيعانيو من هادشي ..
صفاء: (نضت عنقتها بالجهد) هادشي كامل في خاطرك ياختي.. ولكن انا معنديش الوجه اللي يواجه الناس و راجلي منقدرش نخسرو..
كوتش ناديا: وعلاش غتخسريه هو لاكان تيبغيك مغيفوتكش في وقت الشدة ديالك..ثيقي بي احسن ماتخلي حيوان يستغلك ماديا ومعنويا..ويمشي يقولها ليه او يصيفطلو التصاور ويولي موقفك خايب اول حاجة غيخليك على ودها انك خبيتي عليه!!
صفاء: ختي ناديا نتي شجعتيني وانا غنوقف هاد المهزلة وغنعاودلو كلشي ويلا خلاني من حقو..
المهم دوزت ديك العشية مع كوتش ناديا ومشيت للدار مرتاحة وقررت نصارح راجلي بكلشي ونديكلاري بدوك الحيوانات...
مللي وصلت للدار لقيت ياسين كيتسنى و سولني فين مشيت قلتلو غير مع واحد صاحبتي شحال مشفتها..
المهم نضت طيبتلو العشا وفاش كنا تنتعشاو ..حسيت براسي داك العشا مابغاش يدوزلي ..كنت دايرة الكفتة ولاصوص وقلتلو هاد الكفتة خااانزة واش متتشمش؟؟؟
ياسين:لا احبيبة ماشميت والو جاتني بنينة..
نضت تنجري للدوش رديت كلشي..
بقيت على ديك الحالة يومين وانا معدتي مقلوبة..وقاللي ياسين والو نديك للكلينيك فين خدام تشوفك شي طبيبة ..
وفاش دخلت دوزو لي لقيت المفاجأة اللي مكانتش على البال!!!
قالتلي الطبيبة:
دكتورة حياة: إوا ألالة مبروك. عليييكم..
صفاء: مبروك حيت انا مريضة؟
دكتورة حياة: لا مبروك حيت حاملة ههههه
صفاء: ك. كي..كيفاش!!حاملة؟؟
دكتورة حياة: كيف تتسمعي أدكتورة صفاء..واه زعما راك طبيبة و ماعرفتيهاش هههه واخا ماشي الضومين ديالك ..ايوا عطي لراسك الراحة تافقنا؟؟
صفاء: merci bcp khty hayat
دكتورة حياة: يله نوضي فرحي هداك اللي غيموت بالخلعة ههههه
صفاء:(ابتاسمت ابتسامة خفيفة ) الله يهنيك دكتورة بسلامة عليك..
دكتورة حياة: بسلامة عليك وتهلاي في البيبي وكولي مزيان..
خرجت لقيت ياسين قدامي شد في :
ياسين: ياك لاباس حبيبة اش قالت ليك الطبيبة!؟
صفاء: انا حاملة أياسين
(نقز قدام الناس بالفرحة وقاللي)واش تدوي بصااااح غنولي بابا!!!!
صفاء: إنشاء الله..إنشاء الله..
غير خرجنا من الكلينيك وحنا نتلاقاو داك الحيوان..الخلعة شداتني من صبع رجلي الصغير...وجاي قاصدنا ..
احمد: سمحولي نسولكم انا ماشي ولد هنا..فين جا المستشفى الحكومي؟؟ القريب
ياسين: قريب اخويا سير نيشان ودور على ليمن..
احمد: شكرا خويا بزاااف..
مشينا وانا شاداني الرعدة و قلت في خاطري هاد الحمل جا في الوقت غير المناسب بالمرة ...ولكن كيفما كان الحال خاصني نصارحو..واليوم
غير وصلنا للدار بدا يعنق في و يغوت بالفرحة بحال شي مسطي هههه ولكن انا كنت تنتحسر على هاد الزهر اللي عندي ووكلت أمري لله وقلت الحمد لله وباللي ربي أدرى مني وهو عارف علاش عطاني هاد الرزق في هاد الوقت وكأنو تيوحي لي باللي كاين رابط قوي اللي مغيخليش حبنا يسالي عند هاد المشكلة اللي تعرضت ليها...
ومللي شفت الفرح فعيون ياسين مقدرتش نقتلو فرحتو ونعاود ليه على ماجرالي..
وبقيت هكاك حتى وصل نهار الثلات وتماك حلفت حتى نوري لداك الحيوان الوجه اللي عمرو شافو فحياتو ونوقف ليه بالمرصااد..
وفعلا غير خرجت من الخدمة لقيتو واقف حدا طونوبيلتي..
صفاء: جيتي يا عيفت الرجال!!!
احمد: تحل لمك الفم أالطبيبة ..المهم انا معنديش الوقت اللي نضيعو معاك طلقي الفلوس.!!
صفاء: ههههه الفلوس!! على انا فلوس تيتسالني حيوان بحالك؟!! هههه
احمد: شوفي بلا متزيدي تعصبيني مغاديش نفكرك بآشنو عندي ضدك ..
(وهو يجبد التصاور ثاني..صور باين فيهم وجهي فشي أوضاع مخلة للآداب..ولكن كان واضح باللي مغتصبة غصبا عني ماشي بخاطري)
صفاء: (طلعت للطونوبيل وديماريت وقلتلو ): مزيان أراهم لي حيت محتاجاهم نيت
(خطفتهم ليه وكسيريت)
احمد: (تيغوت) عندي منهم بزاااااف غير سيري..
(رجعت تالحداه و سادة الجاج مخلية فيه شوية) وقلتلو:
صفاء: ههههه عارفة عندك بزاف ولكن هادو غنحتاجهم في المحكمة حيت غنرفع بيك دعوة ...هههه وكمامركم باينين نيت ..بااااي...هههه
(كسيريت ثاني وخليتو)
احمد: تسناااي اجي نتفاهمو تسناي..
معقلتش عليه خليتو كيف الكلب تما وزدت..
مشيت للدار واتاصلت براجلي..
صفاء: حبيبي لاباس؟؟؟
ياسين: حبيبة توحشتك انا لاباس ونتي وولدي هههه تهلاي فيه
صفاء: كون هاني أعمري..المهم معاش غتجي؟؟
ياسين: انا عندي دابا واحد العملية مهمة غير نساليها نجي ..يعني غنتغدا معاك ان شاء الله..
صفاء: ياسين ..حاول متتعطلش خاصنا نهضرو فواحد الموضوع مهم ..اوك؟
ياسين: واخا
كنت متوثرة وعلى أعصابي حيث صافي قررت نعاودليه كلشي و نخلي ليه مجال يختار واش غيقبل يكمل معايا ولا لا...
كنت حاطة جميع الإحتمالات قدامي وكنت تنقول الى قبل ياسين نكملو بجوج خاصو يوقف معايا حتى يتشدو دوك الحيوانات ويتعاقبو على داكشي اللي دارو في أشد عقاااب..
ولكن الى ماقبلش وقرر يفرقني..غنكمل المشوار بوحدي مع هاد القضية.. ونربي ولدي اللي جاي بوووحدي..
أفكار..وأفكااار طاحو لي في بالي وتمنيت يوقف الوقت حيت قدما قرب الوقت اللي غنقول لياسين الحقيقة فيه قلبي تيبغي يسكت ولكن خاص هاد الرمانة تتفركع...اللهم يسمعها مني ولا يتصدم من داك الحمار..
تحل الباب..وياسين جا..وجات لحظة الحسم...
ياسين: السلاام كبيدة توحشتككككك (باسني وعنقني وباسلي كرشي) حتى هاد الوليد توحشتو واخا باقي في الكريشة هههه
صفاء: حتى انا توحشتك أحبيبي ايوا كيداز نهارك..؟؟
ياسين: كيف قلت ليك..ديك العملية اللي كانت صعيبة ولكن الحمد لله نجحااات...
صفاء: مبروك أسيدي..
ياسين: ايوا كاين شي غدا؟؟في الجووووع..
صفاء: غنجيبو ونجي..(حطيت الغدا تغدينا سالينا جمعت الروينة وجلسنا نتحدثو)..
ياسين: شنو الموضوع اللي بغيتيني فيه..
صفاء: اه هاذ الموضوع محرج شوية..وقع لواحد البنت تنعرفها مزيان وعاوداتو لي ومعرفت مانقوليها ولا باش ننصحها.
ياسين: واخا الى كاين فاش نعاونك نعاونك ..
صفاء: واحد النهار كانت خارجة من الخدمة وتلقاو ليها شي وحدين ..داوها صحة واغتصبوها..وهي مقدرت تقولها لحتى واحد..حتى راجلها خبات عليه..
ياسين: پففففففف حيوانات صافي والله ..اش غنقوليك.. راجلها من حقو يعرف واخا راها قاسحة ولكن لاكان تيبغيها مغيسمحش فيها واخا هكاك..
صفاء: (مشعرتش براسي حتى بديت تنبكي بحرقة) ياسين انا هي ديك البنت..
ياسين: انى بنت مفهمت والو..
صفاء: واحد النهار جات واحد الحالة للمستشفى ..وماتت بين ايديا حيت جابوها معطلين كانت نتحرات..مللي خرجت بقا يتهدد عليا خوها وفي الآخير قالي مغتبقاش فيك ..وتلقا لي هو وشي حيوانات وداوني صحة ووقع اللي وقع..انا مقدرتش نقوليك والو..مقدرتش خفت تخليني وتمشي ..
ياسين:(بدا كيبكي ..وخلاني وخرج)
صفاء: ي..ياسين عفاك متمشيش
(طرااااخ ردخ الباب ومشا)
بقيت نتاصل بيه طافي تليفونو مبقيت عرفت مندير ولكن قلت اللهم نقولها ليه ونخلي ليه الإختيار ولا نبقى نكذب عليه وانا عييييت من الكدوب ..
بقيت نتسناه ماجاش حتى داني النعاس..
وقلت صافي خاصني نبدا نجمع حوايجي باش نرجع لدار واليديا..صافي بان القرار ديال ياسين..
الغد ليه غير فقت عيطتلو تيليفونو طافي..ونضت بديت نجمع حوايجي..
دموعي مانشفوووش حيث تعرضت لأسوء حادث في حياتي ...وراجلي تخلى عليا واخا مقدرش يقولهالي فوجهي ولكن بان العربووون ...من حقو هو راجل ميقدرش يتحمل هاد العبء فينما غيبغي يتقرب مني غادي يتفكر ماجرالي...يعني هذا أحسن حل لينا بجوووج واخا كنبغيه وماقادراش نتفارق معاااه..
جمعت حوايجي وخرجت من الدار ..مشيت لدارنا فرحو بزااف فاش شافوني وفي نفس الوقت مفهمو والو مللي شافوني جايبة حوايجي ..قلت ليهم غنجلس شي يامات هنا حيث ياسين ماكاينش هاد ليام في الدار..
المهم دازت 3 يام ماسول في ماوالو وحاولت نتاصل بيه شحال من مرة مسدود..
حتى للنهار الرابع كنت خارجة من الخدمة وهو يوقف عليا ياسين..كان باين فيه ماناعسش شحااال..
ياسين: (عينيه تيدمعو) علاش خبيتي عليا هدشي علاش؟؟؟
صفاء: انا كنت مصدومة وفي نفس الوقت مابغيتش نخسرك..انا تنبغيك بزااف ومبغيتش نخسرك بسباب هاد الحادث..انا قاسيت بوحدي وتواحد ماحس بي ولا كان معايااا..صفاء اللي عرفتي ماتت انا عايشة بلا روح ..دوك الحيوانات قتلوني وانا بالحيااااة..حرام هدشي حراااام والله
ياسين:(دموعو شلااال) صافي باراكا ماباغيش نسمع كتر عافااااك ..الى..إلى طاحو فيدي غنقتلهم واحد وااااحد...
صفاء: انا قررت نقوليك هاد السر فهاد الوقت حيت صوروني فديك الوضعية وبداو يهددوني بالتصاور مقابل نعطيهم الفلووس..وانا مقدرتش نزيد نكبر فهاد الحقارة كثر قلت نقوليك كلشي قدرتي توقف معايا ضدهم هداك هو النهار الكبير..مقدرتيش انا غنبقى موراهم حتى ياخذو جزاءهم اليوم قبل غدا..
ياسين: كيفاش قدرتي تنطقيها..كيفاش..قدرتي تقولي اني ممكن نتخلا عليك خصوصا أن ولدي اللي راك حاملة بيه..كوني متأكدة اني غنخليهم يتمناو المووت ومغيشوفوهش غير بلاتي...(عنقني) تعذبتي أحياتي بزاف ..ولكن مابقا قد مافات..
صفاء:(تنبكي) تعذبت بزاااف بزاااف انا منستاهلش هادشي..مانستاهلش..
ياسين: واخا..نمشيو للدار ونكملو هضرتنا..
مشينا للدار وكل واحد فينا فش قلبو على لاخر وفي الأخير قنعتو باللي الحل ماشي هو تقتلهم الحل هو نتابعوهم..خصوصا أني عندي الدليل اللي هو التصاور..
ياسين: ايوا اش تنتسناو هي دابا..
صفاء: واخااا يله..
مشينا لأقرب مركز شرطة..ودخلنا عند المسؤول درنا شكاية وعطيتو الدليل وعاودتلو كلشي بلامانتحرج حيت انا مادرت والوو هادشي كتاب عليا..
سولني البوليسي علاش تعطلت هاد المدة كاملة عاد جيت شكيت!!!
وقلتلو باللي انا ماكنتش قادرة نصارح راجلي باللي وقع و بدا داك الحيوان تيبتزني وانا مقدرتش نسمح بهادشي يطوال كثر..
واعدني البوليسي باللي غيخرج قرار باش يتشدو وديك الساعات غياخدو الجزاء ديالهم غير نكون هانية...
مشينا فحالنا عنقني ياسين وكنت حاسة بيه تيحاول يداوي لي جروحي واخا حتى هو مجروح كثر مني غير ماباغيش يبينلي ..وطلبت منو باللي نحاولو مايعرف حد بالموضوع ويبقى غير بيني وبينو ..
وداكشي اللي وقع..
بقى البحث على دوك حثالة المجتمع ولكن مازال ماتلقاوش...وكنت تنمشي للخدمة عادي ..
دازت شي 15 يوم وبداو تيبانو عليا علامات الوحم ..تكرفصت مزيااان الدوخة والردان ...حالة وصافي ومبقا عندي خاطر لوااالو..تامن الخدمة تنمشي ليها غير بزز..
دوزت واحد الشهر ونص ديال العذاب عاد بدا تيخف هادشي وبقا في غير الدوخة والردان ديال الصبااح..
كان ياسين كل مرة كيمشي يسول عند البوليس فين وصل البحث ..ولكن ديما تيقولو ليه باقي متشدوووش..
وهادشي كان تيوثرنا بجوووج...ولكن الصراحة تنحسد راسي على هاد الملاك اللي عطاني الله هاد الراجل مكينش بحالوو تيبغيني وتيحترمني فوق القياس علمني بزاااف ديال الحوايج..علمني باللي اللي تيبغي شي حد خاصو يبغيه تالموت مهما وقع مايفوتوش..خسارة كاين شي رجال تيتخلاو على عيالاتهم لاتعرضو لبحال هاد الحادث..وكاينين شي نسا تينساو كلشي ويتخلاو على رجالهم نهار كيطيحو و يوليو عاجزين أنهم يوفرو ليهم كل مكيتمناوه..باختصار : الحب تضحية و مشاركة للشريك في السراء والضراء..ماشي لا كانت سراء راك حبيبي و الى ضراء نساني عليك..!!!
المهم واحد النهار خارجة من الخدمة كيف العادة يله ركبت في طونوبيلتي وهو يوقف عليا داك الحيوان ..بغيت نغوت ولكن سد لي فمي قاللي تغوتي ندير فيك كثر من اللي شفتي مني..
صفاء: أش بغيتي عندي مازال؟؟ صافي مابقا والو وتتشد وتخلص كاع داكشي اللي درتي انت والحيوانات اللي معاك..
احمد: انتي عارفة مزيان. اني ماكنتش نآذييييك كون ماقتلتي لي ختي..
صفاء: أوووف أووووووف عيييت باش نفهمك باللي ختك جات شبه ميتة واحنا حاولنا نعتقووووها وهادا قضاء الله علاش ماباغيش تيق..سير سول وغيقولو ليك ..المهم بعد من طريقي انا كرهت نهار اللي شفت كمارتك فيه..حيوان خرجتي عليا ولكن مازال نتحاسبو الى ماتحاسبناش في الدنيا نتحاسبو لهيه عند الله وكون ميقن عمرني نسمح ليك..
كسيريت وخليتو تيشوف بحال الى تأثر بكلامي حسيت بيه بحال الى ندم والله أعلم ..كان تيشوف جهتي بواحد النظرة فيها صدمة كبيرة من الواقع...
المهم..دازت سيمانة واتاصلو بي من الخدمة كنت فالدار ديك الساعة قالو لي دكتورة كاين 2 حالات مستعجلة خاصك تجي ..الدكتور رفيق..كونجي ..اجي دابا ..
لبست دغيا و خرجت..الروح هادي مخصناش نتهاونو عليها ..مللي وصلت دخلت نيشان للبلوك..لقيت 2 شباب عامرين دمايات واحد فيهم شبه ميت وواحد تيطلع النفس بزز..وكانت الصدمة كبيرة مللي لقيت أن هاد 2 هوما احمد وواحد صاحبو من اللي اغتاصبوني ..معرفت مندير واش نعتقهم ولا شنو..
ممرضة مليكة: دكتورة صفاء نزفو بزاف راه كانو 3 واحد مات في البلاصة وهادو حالتهم خطيرة..دكتورة صفااااء سربي خاصك تعتقيهم..
صفاء:( شفت قدامي كل مادارو في..مشيت عند احمد اللي كان تيحتضر ودموعي نازلين..)الدنيا غدارة شفتي ظلمتيني ولكن عذاب الله كان اقوى من عذاب الحبس والمحاكم..
احمد: دك..دكتورة عافاك ..س..سم...سمحيلي بزاااف انا غلطت فحقك و ظلمتك ولكن كنت معمي نتي درتي خدمتك وربي خدا اختي منا سمحيلي..سمحيلي..
صفاء: انا يكفيني أن دعائي لله استاجب وربي خدا لي حقي منكم..كاملين..
احمد: سمحيلي ..سمحيلي..
(وهو يغيب)
جا الطاقم تيجري عرفنا باللي عندو نزيف داخلي وواخا كل داكشي حاولنا نعتقوه..الطب مهنة شريفة وسامية كان خاصني ندير خدمتي واخا مع أكره الناس لي..
داك صاحبو مقدرناش نعتقوه مات حتى هو..و احمد بقى شهرين كوما شبه ميت..
ياسين عرف بكلشي وحتى هو قاللي باللي إرادة الله كانت أقوى من كلشي ربي انتاقم منو ...سدينا ملف القضية وحاولنا ننساو الماضي..
من بعد مافاق احمد من الكوما عرفنا كأطباء باللي داك النزيف أثر ليه على جميع الوظائف ديال دماغو يعني احمد دابا ولى " معاق" جسديا ميقدر يحرك حتى صبع يقدر يحرك غير عينيه ..تامن الهضرة مايقدرش يهضر..مللي خرجوه من المستشفى شاف في نظرة كلها حزن ودموعو تيطيحووو..الواليدة ديالو تتبكي..واخا بقاو في ولكن مقدرتش ننسى مادار في...
وهاديك كانت آخر مرة نشوفو فيها..
قطعت الصفحة اللي كانت مكتوبة بدم قلبي وحاولت ننسى الماضي..ونعيش حياتي كيفما باغا ..
وصل الوقت اللي غنولد فيه..كنت متوثرة ..حيت تابعني ألم الولادة و فرحانة حيت غنشوف ولدي..او بنتي..
والحمد لله جات بنتي "أمل" على خير وسميناها أمل حيت فعلا هي اللي عطاتني أمل في العيش وخلاتني نتغلب على كلشي..
أنا دابا عايشة أحسن أيام حياتي مع راجلي وبنتي الله يخليهم لي ويخلي لي واليدي ...
النهاية