انا مغاديش نحكي ليكوم قصتي من البداية ماشي مهم شكون انا منين جيت و كيف دايرا حيث قصتي هي قصة الف بنت حلمات بفارس الاحلام و ملي قالو ليها كاين العريس فرحات حيث غتبت بلي هي انثى و غترفع راس عائلتها بزواج
انا كنت عاد شديت الباكالوريا ملي تقدم لي واحد من عائلة جيرانا ... كنت بحال قريناتي كنقول غنكمل قرايتي و نخدم و ندير و ندير و متوقعتش اجي شي واحد اخطبني دابا .. مكنتش خايبة و فنفس الوقت انا ماشي ملكة الجمال .. الحمدلله على كل حال
مهم ملي علماتني الواليدة ديالي حشمت و فنفس الوقت فرحت حيث هذا اكبر دليل بلي كبرت فكرت فبنات عمي لكانو كيقولو وصلتي ل 18 و مزال متقدم ليك حتى واحد و فكرت فكل صحاباتي لتزوجو ملي كنتلقا بيهوم كيهضروا على رجالهوم و على النعيم لعايشين فيه .. كنت كنتقيهوم و عمرني شكيت بلي هي مجرد هضرة كلها كذوب و تستر على المشاكل لكانت فكل دار
دارو معانا اجو نهار الجمعة مكناش علرفين شحال من شخص غيجي بالضبط و قلنا الى كانو كاع بزاف مغاديس افوتو 6 و لا 7 اصلا غير غيهضروا فيا و نشوفو واش نتافقو ... انا مكنتش متسوقة لواليدة ديالي و الواليد لكانو كيبانو متوترين و خايفين لتكون شي حاجة ناقصة و لا يكونو كثر من داكشي لدارو ... كنت كنبان هادئة ليهوم و لكن كنت فرحانة و كنتسنى الاضواء تسلط علي ... ايييه لالة مولاتي العروسة
من بعد العشاء سمعنا دقان على الباب مشا الواليد حل و كنت كنسمعو كيقول تفضلو مرحبا بيكوم الدار داركم و مي كتعاود نفس الهضرة ... لا ولا الصداع يزاف مكنتش قادرة نسمع حتى حاجة و كلينين حتى الدراري الصغار ..( علاش جايبين الدراري حتا هوما؟؟ .. واخا ماشي مشكل )
جات عندي ختي الصغيرة كضحك و قالت
- الدري لغادي تزوجي بيه باقي صغير يلاه عندو 24
فرحت قلت همزة هادي غنتزوح بشاب باقي صغير بحالي بحالو .. كنت جالسة لابسة قفطان سمبل فالبيض و جمعت شعري للفوق و درت شوية دالمكياح باش نبان عادية بلا منكثر .. اصلا مكنتش كندير المكياج عاد درتو 2 مرات فحياتي فعرس بنت عمي و فعرس ولد خالتي العام لفات ...
المهم بقيت فالبيت كنتسنى بوحدي و نتسنى و انا مقدرا نسمع والوا حتى عيطات لي الواليدة
- اجي ابنتي اجي الكوزينة
هزيت قفطاني لكبير عليا شوية و مشيت الكوزينة دابا نمشي نفرق عليهون اتاي .. هزيت ديك الطبلة الثقيلة و خفت غير لنطيح و يطيحو فوقي و نتبهدل قدام الجناعة تبعاتني مي بشوية دخلت مهزيتش فيهوم عيني نهائيل بديت كنفرق اتاي واحد بواحد كينين رجال بزاف و عيالات حتى وصلت عند واحد المراة تكون عندها شي 50 وقفاتني و هزات وجهي شافت فيه
- تبارك الله الله احفظك ابنتي
و دارت شافت فالولد لحداها اكيد هذا هو ملي شفت فيه عجبني معرفتش واش بصاح نيت هو من النوع لكيعجبني و لا غير حيث عارفة بلي هو غيكون راجلي هز حتى هو الكاس ديالو و شاف فيا بحال الى كيحقق فتفاصيل ديال وجهي و دزت عند لبقاو
مخرجت من تنا حتى كانت روجي غتقطع عطيت الطبلة لختي و رجعت هربانة البيت و بقيت كنتسنى بزاف حتى دخلات لي مي واحد الطبسيل فيه شوية داللحم ناكلو و ماكليت حتى سمعتهوم كيقولو
- ان شاء الله خير .. السيمانة الجاية الخطبة ان شاء الله و عرفت بلي غادين امشوا دابا قربت من الباب و طليت و لقيت راجلي العزيز بصاح باقي صغير و لكن بوغوص و كيبان واعر حمدت ربي و رحعت لبلاصتي نكمل عشايا
ملي خرحو كلهوم بدلت و لبست بيجامتي لعندي شي 4 سنين هادي عمرني شريت وحدة جديدة و غسلت وجهي مزيان و ملي جات الواليدة بدات كتزغرت و تبكي
- بنتي تولي عروسة شكون بحالي ... رفعت راسي فيك الله اهنيك و يسعدك ابنتي .. و راجلك مكين محسن منو
مقلت والوا بقيت ساكتة
- الجمعة الحاية الخطبة و ننافقو على العرس امتى و منها تجلسي مع راجلك وو تشوفي واش عجبك مغاديش نبززوا عليك حتا حاجة نتي تعرفي
- الله اخليك ليا اماما نتي روحي
نعست داك النهار و انا كنحلم بالعمارية و الزعاريت و الدقة المراكشية و ياريتني ماحلمت
كل نهار كنت كنحس بالافتخار و العز ملي كنمشي نسخر كولشي كيقةلي مبروك و صحاباتي ولا كيعاملومي فشكل كاينة لفرحانةبيا و كاينا لمعجبهاش الحال و بنات عمي مصدعوش ريوسهوم اجي اباركو اصلا مزال مكاينا الخطبة معرفتش علاش هاد الفرحة كولو و مزال متخطبت و لكن الناس ظايرين فيها خطبة كما كيقولو لمهم جا من باب الدار ... الحمدلله حلال الله
هاد المرة مشيت الحمام فالصباح و جبنا الطباخة طيب لينا باش الواليدة تجلس معاهوم و درنا الرجال بوحدهوم و العيالات بوحدهوم و حتى انا خصني نجلس معاهوم .. ملي رجعت من الحمام دارت لي صاحبتي السشوار و قادات ليا شعري غير تسريحة بسيطة و ممعيقاش و لبست فراشة شفت راسي زوينة واخا ضعيفة هاكا كيعجبني راسي .. هاد المرة جاو مع العصر و كانت عاللتي حتا هي حاضرة مشفت راجلي الواليدة ديالو لكانت حاضياني و مجلساني حداها و كترلقبني كيفاش كناكل و كيفاش كنهضر بحال المحققة و اي حاجة كلاتها تعطيني منها يعني تبين بلي كتبغيني .. خوات راجلي مكانوش ظريفين بزاف و سمعت بلي هو الصغير فيهوم و كاين خوه الكبير و لكن كاين ففرنسا و خاطر ليها ملي كان صغير و كيجي فالعطلة مرة مرة من بعد مشد الوراق .. مكانش هاظشي كولو كبهمني لمهم انا غنتزوج و غنركب فالعمارية و نلوح لماما و بابا و صحباتي و ختي الصغيرة ...
من بعد سمعنا الواليد كيعيط على حساب نلبسوا الخواتم و جا العريس و الواليد ديالو و الواليد ديالي لعندنا و داوني انا حدا راحلي لبيلي الخاتم و حتا انا نفس الحاجة و سلم عليا فراسي و ملي بغاو ياخدو لينا صورة غير حنا و الواليدين ديالنا عيط لخواتو بجوجهوم اتصاوروا معانا و ماي جات ختي قالتليه مو
- نتي باقي صغيرة ابنتي رجعي لبلاصتك جلسي
ضرني كلامها فخاطري بزاف و لكن سكت و ضحكت قدام الكاميرا خاصة من بعد مدرت تصويرة بوحدي و راجلي ملي سالينا داونا لبيت جلسنا فيها بجوجنا مع ختي الصغيرة يعني تراقبنا
انا كنت متوترة كنهز عيني غير بشوية نشوف فيه و نلقاه حتى هو كيشوفني و يضحك .. كان زوبن صراحة زوبن بزاف شوية قرب مني جلس حدايا و قاليا
- اوى عندك سي شروط الالة
كنت بغيت نقول بزاف ديال الشروط
) بغيتك تهتم بيا و تحتارمني و ثيق فيا و تعطيني شوية دالحرية و تديني عند والديا كل عطلة و ندوزا عندهوم ليوم ثاني ديال اي عيد و تبغيني و تكون كلمتي فوق كلمة اي مراة خرى و تكون لي داري بوحدي و تصبر معايا و نصبر معاك .. كان عندي بزاف ميتقال ) و لكن فالاخر قلت ليه بهمس
- بغيتك غير تحتارمني و تحترم عائلني
-هههه ( ضحك ) ختاريتك حيث عارف بنت الناس و اكيد غنحتارمك يعني دابا تسمعي شروطي
هزيت راسي موافقة
- بغيتك الالة تختارمي عائلتي هادي هي اهم حاجة و الى بقيتي كتسمعي الهضرة نعاملك بحال الملكة و انا و نتي باقي صغار خصك تصبري معايا دابا و ان شاء الله ميكون غير الخير ملي نكبر نستقروا بوحدنا و تكون ليك دارك نتي لتهضري فيها و ديري فيها معجبك و المهم تحترمني حتى انا و تكون هضرتي مسمعوعة واخا !!
هادشي لقال كثير لدرجة مقدرتش نتبع معاه و لكن هزيت راسي موافقة و انا ديك الهضرة مبغاتش تصرت ليا وقف و خرج من البيت و انا باقي مصدومة حتى جات ماما و رجعاتني عند العيالات و جلست ثاني حدا مو و لكن سرعان مانسيت ملي عاملاتني ختو مزيان و بقات كتهضر معايا و كنضحكو
ملي مشاو و خوات الدار بقيت كنجري من قنتة لقنتة باش نسالي دغيا و نجلس نشوف خاتمي لكيدل على المرتبة ديالي الجديدة و على التغير الكبير لوقع فحياتي ملي سالينا مشيتي لبيتي و درت بحال الى ناعسة و شعلت الضوء فالتلفون باش نشوف خاتمي واخا كان بسيط و باينة مفايتش ربعين الف و لكن عجبني بزاف و وقعت فالغرام دبالوا امكن فيد خرى ميعجبنيش و لكن فادي و خاصة من عزيزي عجبني بزاف ... هههه من دابا ولا عزيزي واخا مزال مهضرنا
الغد ليه فقت معطلة مع 10 و الغريب مفيقاتنيش الواليدة ملي غيفطرو كما ولفت غير فقت و توضيت و صليت صورت ادي و لحت الفوتو فلفيس و درت فيها بلي تخطبت و تسنيت التعاليق و مبروك خرجت من الفيس و مشيت فطرت لقيت الوالدة حايبة حلوى من لباتسري
- لاش هادشي كامل امي ؟؟ شكون كان هنا ؟؟
- حتى واحد و لكن خصكي تبقاي تاكلي بزاف باش تغلاظي بحالتك هادي غيجري عليك الراجل
- و لكن مشرطش عليا نغلاض
- و لكن مو شرطات قالت خصكي تغلاظي قبل العرس
- و امتا هاد العرس بالسلامة ؟؟
- بعد 3 شهور .. العشية نجيب ليك شي سيروم للشهية بصاح راكي رقيقة كجدر الشجر
تقلقت و لكن كليت و مخليت والوا فالطبلة بغيت نجمع الماعن مخلاتنيش الوتليدة و قالت لي فهاد 3 شهور متعجني متسيقي متغسلي الماعن طيبي و كولي مزيان و دابا نسولك الحاجة على شي تبريمات ديريهوم بحال متحشمينا نهار العرس
- اوفف امي مالي انا فناس المهم نركب العمارية احبيبو ديالي
- سكتي سكتي
رجعت لبيتي حليت الفيس و بقيت كنجاوب الناس و كنعاودليهوم على راجلي البوغوص و صغير فالعمر حتى عيطات لي الواليدة مشيت درتو و رجعت لبيتي
مهم بلا منتعطل عليكوم بزاف دازت شي سيمانة و كثر لا خبار عل العريس و عائلتو حتى داك النهار كان شي واحد كيدق
من الهضرة ديال الواليدة فهمت بلي خطيبي لجا .. خربت عند المرايا مشط شعري و قاديتو و شفت بيجامتي حمدلله يلاه صبنتها البارح لوكان تعطل لغدا كون لقاني فحالة مهم خرجت درت بحال الى معرفا بلي هو و ملي شفتو درت بلي تصدمت ... كلبات مني الواليدة نجلس معاهوم سلمت عليه بايدي و هو كيشوف فيا من الفوق لتحت و جلست حدا الوالدة نتخبا فيها و هي تمشي الكوزينة توجد العصير لطلب سي الخطيب دار راسو فقهوة و قاليك عصير .. اه يا ربي
بقا كيشوف فيا مدة ثم نطق
- سمعي افلانة واش عندك الفيس ؟؟
- اييبه
- اوي اليومة سديه و عمرك دخلي ليه ها نمرتي نصوني عليك و لا نهصرو فالواتساب و لكن الفيس نسايه اوكي
- اوكي ( قلتها من بعد مدة من التخمام )
قيد نمرتي عندو و برك كيشوفيا ثاني حتى جات الواليدة ديالي
- اوى ابنتي عطيتيه النمرة ديالك ؟؟
- ااااه
- اوى عطيه حتى نمرتي واخا
- واخا .. عطيتو نمرة دالوالدة ديالي و جلست كنسمع ليهوم ز هوما كيهضروا ... انا كنكون كولي هضرة و لكن غير نشوفو نرجع حشمانة و الهضرة مكتبغيش تخرج مني واش هادشي طبيعي؟؟
ملي خرج مادازت حتى ساعة حتى صيفت ميساج
- اشنو كتسناي بلوكي داك الفيس
اكيد كيعرف الفيس ديالي دخلت ليه و بلوكيتو و انا مقلقة و معصبة حيث الناس كاملين لكنعرف كانو فيه و يلاه بغيت حتى انا نسد دوري و نستمتع بفرحتي مع صحاباتي و لكن لا حول و لا قوة الا بالله ...
من داك النهار و انا عابشة فضيق و ملل حتى ملي حليت الفيس منعني نهائيا نهضر مع شي دري .. شحال الزواج صعيبة و الرجال كالحجر بقيت كنهضر معاه غير هو فاللول كان بيناتنا غير سلام سلام و كدير كدايرا صافي شوية بغينا كندويو بزاف عرفت فين خدام اشنو قرا و فين قرا النظرة ديالو الحياة و عرفت بلي متمسك بزاف بعائلتو و لكن قنعني
حبث حتى انا كنقول هالتي هي اللولة و نفضلها حتى على راحلي و مصلاحتهم مصلاحتي ... كان ديما كيلوح لي تصاورو ها فين انا شزف فين كنت سافر لبزاف ديال المدن و قال بلي حتا حنا الى تزوجنا غنديرو بحال هكا و نسافرو و لكن ملي هضرت معاه فشهر العسل مدواش و قال بلي مشغول ..
انا فالدار كنت انا لكنطيب اصلا ولفت هاد القاعدة حيث الواليد ديالي عزيزة عليه الماكلة ديالي انا و كنت كنبقى نتفرج و نسهر و ندير الوصفات و ناكل بزاف خاصة الزبيت و اللوز ديما حدايا كلما جلست نتفرج و كنت كلاحظ فرق فصحتي و عجبني راسي و انا كنغلاظ واخا صعيب تشوف الفرق
دازو شهرين و بقا شهر العرس و عرفنا بلي دارو من شروط ديالهم نجمعوا الفلوس و نديروا واحد العرس و يكون عندهم طلبوا جوج دالمليون منا و حتا هوما اديروا جوج دالمليون حيث عائلتهوم كبيرة كما كيقولو ... مبانش ليا الواليد مقلق كرد فعل على هدشي بل كان تعاملو عادي و حتا انا فرحت .. حنا اصلا من وسط بين و بين معندناش و مخصناش و لكن الحمدلله على كل حال .. عائلة راجلي معمرني هضرت معاهم و معمرهم هضرو معايا حتى جاو داك النهار اديو الامانة و معرفتش كفاش قدر اجمعهوم فداك الوقت القليل حتى الواليدة مكانتش كتعاودلي كانت فرحانة ليا بزاف و ليها حيث هزيت راسها قدام صحاباتها ...
مهم بقاو ليام كيظوزا و انا و خطيبي بحال عصافير الحب كنتسناو العرس و عيطنا لهائلنا درنا معاهوم اجو يوم قبل العرس و لقريب لينابزاف يوماين قبل العرس .. كنا مرتاحين و انا ديما سير لحمام و عا التبريمات و الوصفات و الكريمات و انا كنحلم بعرسي و بيا فوق العمارية حتى صونا التلفون ديالي داك النهار و دمر كولشي
كنا جالسين كنتغداو شوية صونا تلفوني و حيث عرفات الواليدة بلي خطيبي قالت ليا غير سيري هضري
ملي جاوبت تقهرت حيث مسمعت غير الو ... كديرا ... اشخبار عمتي و عمي .. ثم الكارثة ... سمعي راه مات واحد من عائلتنا و مغنديروش باقي العرس متحكمتش فراسي قلت ليه هاد التوجاد كامل و الفلوس كولشي مشا و كتقول مكينش العرس صافي ناجلوه و لكن هو مبغاش و اصر نديرو غير العقد من بعد غدا و نعيش معاهوم بلا عرس و قال اصلا غير صداع و مصاريف ... ملي قلتها لواليدة تصدمات و بقات كتنتففشعرها اشنو دير مع الناس و اشنو تقوليهوم و لكن الواليد صبرها قال لعله خير و هكا ارجع الفلوس لماليهوم هذي سنة اللق و قضاؤ ..
ديك قضية ارجعوا لينا الفلوس معمرهوم جبدوها و ملي سولت خطيبي قالي راه خسرناهوم كنا كرينا القاهة شحال هادي و مبقاوش و ملي اكت عليه بلي خاصهوم ارحعهوم حيث مكان عرس قالي اما تسمعي الهصرة و لا الله اعاون ... صافي سكت و مقدرتش نعارض حتى حاجة من بعد
يوماين بعد جبنا العدول عندنا من بعد ماعتاذرنا لعائلة و الجيران و الحباب ... و فلحظات وليت مرتو و ولا راجلي على سنة الله و كتابو ... جمعت حوابجي فواحد الصاك و مشيت معاه ... ممشيتش فطموبيل واعرة و لا فشي مرسديس مشيت فتاكسي و لشافني كاع ميقول عروسة جديدة .. و هكا انتقلت لدار خرى مع ناس خرين مزال مكنعرف عليهوم والوا
ملي دخلت لقيت الناس تغداو و متسنوناش و حمدلله تغدبينا فدارنا واخا يلاه كانت 11 ديال الصباح .. كانو جالسين عادي بحال الى مغادي تجي عندهم شي عروسة جديدة و الدنية مغبرة و ممقداش .. تبعت راجلي و جلست حداه و قلت ليه السلام عليكم ردوا السلام و بداو كيسولوني عليا و على والدي و العائلة و ثما عرفت بلي حاسين شوية براسهوم واخا دارهم صغر على دارنا و كثار علدليها عمتي و عمي و اخت راجلي لمازال بنت متزوجاتش و ختو الكبيرة فبهوم لمزوجة و عندها ولد صغير ديما كيغوت كما لقيتو عمروا سكت و راجلهاسمعت منهوم بلي كيجي عندهم ديما مرة مرة اتقضى واخا عندهم دار و لكن عزيز عليهوم ابقاو هنا قالت ليك المحبة انا تصدمت من هاظ التفكير
شوية عيط ليا راجلي و مشينا لبيت قالي قادي حوايجك فالماريو و رتاحي .. قاديت الحوايج و جمعت البيت و نعست مفقت حتى العشية ملي كلينا قالت لي عجوزتي نجمع الطببة و نغسل الماعن و درت بهضرتها .. جات عندي خت راجلب لمزال كتقرى بقبنا كنهضروا و نصحكو هي كبيرة عليا بشي عاماين و لا ثلاثة و لكن عجبني تفكيرعا طلعنا لبيتي و تما كملنا هضرتنا و قالت بغات تشوف حوايجي وريتهوم ليها عجبوها بزاف خاصة واحد القميجة و السروال كنت عاد شريتهم فالباك و عطيتهم ليها ماشي مشكل ... الغريب انها اي حاجة كتشوفها كتعجبها . ملي وصل الليل و تعشينا مجمعت والوا حيث طلبني راجلي نمشي معاه و ندوز معاه اول ليلة لينا مع بعضياتنا
الغد ليه لقيت راجلي مشا لخدمتو و خلاني انا نتعذب مع مالين دارهم ختو بحدها لكتبغيني و كديها فيا
داز شهر بنفس السيناريو انا نجمع و نسيق و نعجن و نحط الماكلة و حيث هوما كياكلوا دغيا يلاه كندوق شوية كنلقا الماكلة سلات .. ربما هذي هي الحاحة الوحيدة لكتعجب عمتي طيابي ..
ما خت راجلي لكتبغيني كانت كل نهار سلفيني هادي عطيني هادي حتى ما خلات ليا والوا فالماريو اصلا معمرني خرجت حتى ملي كيجوي جيرانهم كيقولو ليا بقاي فالبيت بحال الى مغاديش نرفع ليهم الراس و لا خايفين من العين مفهمتش .. راجلي كان كيرجع فاليل كيمشي عند الوالدة ديالوا اهضر معاها حتى نحط العشا نمشو البيت اقضي غرضوا و اثوليا خليني دابا نغس عمرو سوليني كدايرا و لا مشا معايا نخرجوا و ندورو كما واعديني كان كلشي اكاذيب و انا صابرة و كنتحمل
واحد النهار مفقتس نودع راجلي و نوجظ ليه الفطور من ول البارح حسيت براسي ماشي طبيعية و على اقل حاجة نبكي و نحس بلي مقهورة بالاخص مولفتش الجلسة فالدار بلي منخرج و نشم الهوا ديال برا و نحس بالحياة ... المهم داك نهار تقلقت مفقتش حتال ديك 10 بقيت كنشوف فباب البيت كرهتو و كرهت كولشي معاه قلت بلا منوض جلست مدة و شوية كنسمع شي صداع وقفت و مشيت حليت الباب لقيت عجوزتي و ختو الكبيرة و الصغيرة كيهضروا و عليا انا انا من قوة الصدمة قلت ليهم - اشنو كاين ؟؟ مالكوم على هاد الصداع ؟؟ الاخت الكبيرة : - مزيان الالة عاد فقتي و جيتي كتغوتي علينا فين كنتي ملي كنا كنجمعو الدار و نخملوها - كنت مريضة مقدرتش نوض مشيت جلست و قلت عندهم الحق اغوتو و اتعصبوا حيث معارفيتش بلي مريضة و لكن غير حلست بدات عجوزتي تغوت علينا و نتي مكتعرفي ديري و نتي و نتي و نتي... انا طلع ليا الدم و تخنقت شوية معرفت حتى تقيت و فوق الزربية و معلقتش على راسي من بعد ملي فقت لقيت رلسي فسبيطار و كان راحلي حدايا فرحان و ضاحك باسني فجبهتي و قالي نتي حاملة حاملة احبيبتي اول مرة نسمع منو هاد الكلمة فرحت حيث حاملة و حيث راجلي بين لي بلي كيبغيني عانقتو و جا الطبيب و قالي امكن ليك تخرجي و بارك ليا ملي مشيت الدار ملقيتش الفرحة لكنت كنتوقع و كانو مقلقين بحال الى معجبهومش الحال مهتميتش حيث راجبي كان فرحانو طلب من ختو دير ليا الغدا و سولني اشنو كنتشها هههه فرحت داز داك نهار زوين حيث راجلي معايا و الغد ليه قالي نعسي انا نفطر فالمحلبة و لكن غير اخرج كتفيقني عجوزتي نشقا و ختو قالت واخا حاملة نديرو النوبة كما قبل و الماكلة غتبقى عليك اكيد حيث معارفينش اطيبو بحالي ... بقيت كنتعذب و ملي كيرجع راجلي كيتبدلو و اولو سمن فعسل و العشا انا لكنكون
موجداه و ملي كيعرف كتقول ليه م طلبناها مديري والوا مبغاتش كتعذب راسها معانا .. كل نهار نفس السيناريو و كل نهار كيقتلوني بهاد النفاق الشديد ديالهوم حتىوليت كنسد البيت ملي اخرج راجلي و كنبقا الداخل بلا ماكلة حتى كيقرب ارجع نحل الباب و نصبر على هضرتهوم و السبان ديالهوم و ندير شي اومليت ناكلها و نوجد العشا حيث الى مدرتوا مغادي اتعشا راجلي و مبغيتش نقلقوا حيث ولا طيب معايا و كيهضر معايا بطريقة حنينة بحال الى انا درية صغيرة و كيجيب ليا شي حاجة شي حلوة و لا وريدة هههه كانت احلامي كلها وردية و صابرة على عذاب عائلتو و الجو ديال الدار لكيخنقني و لكن كولشي تدمر داك النهار
داك النهار فقت على صوت الباب سمعت خت راجلي لكتقرا فلافاك كتعيط عليا شفت فالساعة لقيتها 12 نضت خليت الباب و دخلات قالت ليا - عفاك حبيبة سلفيني ديك الجلابة ديالك الحمرة - الجلابة اشنو غديري بها عمرك لبست جلابة - محتاجها ضروري عفاك - لا هديك الكادو ديالك خوك منعطيهش ليك و عارفة قيمتها عندي - و لكن محتاجها ملي عرفات بلي مغنعطيهاش ليها دفعاتني و عيطات لعجوزتي و ختها الاخرى و بداو كبعايرو فيا و يسبوني و يدفلو عليا بحال الى كنت غير شي بهيمة حاشاكم كرهتهم وقفت و قلت ليهوم ميمكنش تعاملوني هكا دابا نعلم راجلي و بقاو كيصحكو و قالي بلي معمرو غادي اتيقني و مغاديش اتخلى عليهوم و دفعوني تاني طحت و بقاو كيضربوني حتى عياو و مشاو خلاوني مبهدلة سديت الباب عليا و صونيت على راجلي بكيت ملي سمعت صوتو مقدرتش و عاودليه داكشي لوقع و قالي هاني جاي و قطع تسنيت و تسميت حتى سمعتو دخل الدار جا عندي نيشان و لقاني فديك الحالة تصدم شد فايدو و بقا كيعيط امو و خواتاتو حتى وحدة مكنت فدار ثم صونا على كو و جاوبات ختو و قالت ليه سخفات من بعد الصداع لوقع بينا و مراتك ملي سمعتهاد الكلام متيقت موقع ليها والوا واخا كبيرة كانت قوية علية ....... ..... مشا خرح و خلاتي واخا كنت كنعيط ليه والو بحال الى وليت شبح بقيت كنتسنى شحال حتا لنص ليل عاد سمعتهوم جايين دخلو جلسوا و راجلي ساكت ز حاذر راسو و ملي سولت عجوزتي كولات نقزات بنتها الكبيرة كتعيط نتي السباب على ود جلابة بغيتي تقتلي مي و حنا قلنا ليك ماشي بزز و لكن مبغيتيش تسمعي كيفاش قدرتي دفعي مي و داكشي لدرت فيك قليل ...... يلاه بغيت نهضر مخلتنيش سداتني فايدي و دفعاتني حسيت بوجع فكرشي و خرج مني دم كثير و هنا عرفت بلي اكيد وقعات شي حاجة لبيبي بغا راجلي انوض
مخلتوش ختو و قالت ليه خليها دابا اجي باها و مها صونينا عليهوم و غيكونو هنا ... بقيت كنتوجع حداهوم و كنبكي والوا و زايدينها كيقولو كلام خايب و سخفت ملي فقت لقيت راسي ثاني فسبيطار ة ملي شفت التعابير فوجه مي عرفت بلي البيبي مشا و بقيت كنبكي الحاجة الوحيدة لهدناتني انني الحمدلله مع بابا و ماما لغادي احموني و ميضرونيش الواليد عمرو مهضر حتى قال - صافي هادشي لدارو ليك ابنتي كثير و راه طلب الطلاق و قاليك مبغاكش ترجعي لدارو - كيفاش ؟؟؟ - ملي هضرت معاه بوحدنا هادشي لقال قاليك مبغاش وحظة لتعادي مو و عائلتو و الوراق قال غاظي اوصلوك داك النهار كان اسوا نهار فحياتي خسرت ولدي و راجلي لضحيت على قبلو بمستقبلي و دراستي و عائلتي ... خسرت ولدي هادشي لكنت كنفكر فيه خسرت الامل لبدا اضويلي حياتي و دابا ضاع كولشي هنا كتنتهي قصتي فاللحظة لسنيت على الاوراق و درنا طلاق الشقاق حيث مبغيتش نسمع عليه و على عائلتو بغيت نسا الماضي و ندفنو بحال الى معمرو مكام و قررت نبدا من جديد و نبدا نعيش كما بغيت
النهاية