أمل: أنا عارفة أ صلاح باللي مادوزناش القليل ولكن صافي تالهنا وصافي ..
صلاح: بغيت غير نعرف شنو درت ليك حتى تديري في هاكة..
أمل: صلاح بلا متخليني نجرحك.. خلينا ننساو بعضياتنا وحنا كنحتافظو لبعضنا بذكريات زوينة..
صلاح:نتي غتغلطي غلطة حياتك أ أمل.. السعادة ماشي فالفلوس..واخا أنا فقير وعلى قد الحال ولكن ممكن تعيشي معايا احسن من اللي عندو الفلوس..
أمل: واش انت ماعايشش فهاد العالم..؟ مللي تيدخل الفقر من الباب تيهرب الحب من الشرجم..ماشي بحال لا كانو الفلوس الحب تيجي تالعندك..
ناض صلاح وشاف ف أمل شوفة كلها حزن .. وخلاها ومشى..
أمل: أووف..هذا مسمار وطرقناه..وان شاء الله مغندمش على هاد القرار اللي خذيت..
خرجات أمل من القهوة وهي حاسة براسها صافي تهنات من صلاح واخا كتبغيه ولكن مها عرفات كيفاش تلعب ليها بعقلها وتقنعها تتزوج بهاد الراجل اللي تقدم ليها بدعوى أن السعادة فالفلوس ماشي فالحب واللي تتزوج براجل لاباس عليه تتعيش مرتاحة عكس اللي تتزوج بواحد فقير تيقهرها غير بالنgير وقلة الشي..ولكن أمل ومها نياو باللي ربي اللي تيرزق ماشي العبد..
أمل مدوزاتش القليل مع صلاح.. عامين وهي معاه كانت عايشة فسعادة معاه .. حيت كان تيبغيها بزاف وتاهي كانت تتبغيه لولا شخصيتها الضعيفة قدام مها.. صلاح كان تيحترمها وتيقدرها وكان مستعد يتقاتل ويجمع شوية باش يتزوجها..
المهم مللي رجعات أمل للدار لقات مها مليكة فالباب..
مليكة؛ اوا؟ أبنتي..شنو درتي مع داك المgرد راه الناس صافي جايين غذا فالعشية باش يخطبوك رسمي..
تنهدات أمل وقالت..
أمل: آه أماما صافي راه قلت ليه باللي حنا ماشي ديال بعضياتنا وصافي..مليكة: هكا نبغيك أبنتي..تيقي بي.. غير غتزوجي غتنسايه.. وغتولي تبغي راجلك .. والاهم من هادشي غتعيشي مفيكة ومبرعة.. واش السكنة ف ڤيلا وتكون عندك طونوبيلتك هي السكنة فالبرارك؟!!!دابا تشوفي باللي معايا الحق..أمل: كنتمنى أماما نلقى السعادة مع هاد الراجل..وميكونش فرق السن اللي بينا عائق بيناتنا..مليكة: تانتي خودي ليك راجل بعقلو يهزك فوق عينيه وواخا يشرف تبقاي تباني ليه كيف الوردة ماشي بحال لاتزوجتي برهوش من بعد 20 عام تشرفي نتي وهو يبقى يبان باقي صغير.. مغتبقايش تباني ليه .. غيشوف ماصغر..أمل: عندك الحق أماما صافي..غنفرح ونضحك.. ونسى كلشي.. السعادة ماشي هي اللي كنت هايشة مع صلاح السعادة هي اللي غنعيش مع راجلي مولفلوس..المهم الغذ ليه جاو الناس وكانت هادي أول مرة تشوف أمل الراجل اللي بغاها..كان رجل في الاربعين من عمرو ودارهم باينة فيهم متكبرين حيت عندهم الفلوس..كانو تيشوفو فيهم من التحت للتحت أما العريس محيدش عينو على أمل وهو تيبتسم.. تافقو على كلشي وركب ليها خاتم وبراصلي غاليين بزاف كهدية الخطبة .. خللي الهدايا اللي جاب ليها اشمنك يا تكاشط اشمنك يا قفاطن والشكلاط والحلوى والدنيا كلها عمرها ليها ورد.. وواعدها باللي عمرها غتحط إيديها فالما البارد وباللي غيعيشها أميرة..المهم داز داك النهار من بعد ماالكل فرح ونشط .. ولكن أمل كان إحساسها مغاير بزاف على إحساسهم كلهم.. كانت تتحس براسها باغا تفرح وباغا تستمتع بهاد النهار وبحال الى كاين شي حاجز .. وكل مرة كان فكرها كيخونها ويصور ليها صورة صلاح وتتحاول ترجع دغيا.. وتفهم لراسها باللي السعادة الحقيقية هي اللي غتعيش مع خالد ..اللي بفلوسو..دازت شي سيمانة وجاو دار خالد باش يبداو فإجراءات العقد حيت كان باقي غير شهر على العرس .. اللي واعدها باللي غيكون بحال ألف ليلة وليلة..وفعلا كملو الاجراءات وقادو كلشي وبداو فتحضيرات العرس .. ختارو القاعة وكلشي..
وفعلا كملو الاجراءات وقادو كلشي وبداو فتحضيرات العرس .. ختارو القاعة وكلشي..وبداو فتحضير بطاقات الدعوات .. المهم كلشي كان هاي كلاس وعلى اتم وجه..
وجا نهار العرس..أمل هي الوحيدة اللي كانت تتحس براسها مخنوقة واخا هي اللي خدات هاد القرار.. بحال شي واحد غادي فشي طريق ماعارفش نهايتها ولا فين غتوصلو.. كان عرسها فعلا ولا فالاحلام .. كانت تتبان بحال شي أميرة .. فلحظة شافتو قدامها .. شافت صلاح كيفاش دخل للعرس معرفاتش.. وقف قدامها وجبد پورطابلو وبدا يصور بحالو بحال المدعوين العروسة صورها وشافيها وهي اندهشت وحسات بالسخفة وقلبها بدا كيضرب ف 90 شافت فعينيه دموع وشير ليها بايديه باي باي..ومشى..بحال الى كان باغي يحتفظ بديك الصورة باش فنما يتفكر حبو ليها يشوف فالصورة وحدة باعتو على ود الفلوس....
مشى صلاح فحالو وخلا العافية شاعلة فأمل. . عاد حسات باللي السعادة هي تكوني مع اللي تتبغي ماشي مع اللي عندو الفلوس..داكشي اللي دارت بحسابو مصدقش وحسات بغلطتها ولكن مكانتش قادرة تتراجع..
داز العرس وكل واحد مشى فحالو .. أما هي مشات مع راجلها اللي تتحس براسها حداه بحال شي جماد.. سافرو لتطوان كان حاجز ليها سويت فواحد لوطيل داكشي زوين ومقاد..
وقررات أنها واخا ولات مراتو غتكون بحال شي جسد بلا روح عقاب للغلطة اللي دارت فحق راسها..
المهم دوزو 15 يوم تماك كانت عايشة بحال الملكة الكل تيخدمها ويدير ليها خاطرها والفلوس الصحاح تيحطهم راجلها باش تكون سعيدة وفرحانة معاه..
ورجعو فحالهم عوتاني ڤيلا وخدم وحشم ..كانت كل شوية تتبغي تتاصل بصلاح ومتتقدرش.. وكانت تتاخد الفانيد خزنة من راجلها باش متحملش..
بقات على داك الحال شهرين.. حتى لواحد النهار اللي جاها خالد راجلها سكران .. كانت هاديك اول صدمة ليها منو .. جا وبقا تيغوت والكل تيهدن فيه وحرجها قدام الخدم اللي عندو وبقا تيسب فيها بدون سبب وتيقوليها نتي غير مgردة وانا اللي رديتك بنادم..
والخدامة اللي مسؤولة على الكوزينة بقات تتهدن فيها وتتقوليها غير متديش عليه راه هاكة كان تيدير مع العيالات اللي سبقوك .. هذا هو الديفو ديالو ..
أمل: اويلي على هو كان مزوج؟؟
الخادمة: على مفراسكش ألالة نتي هي الزوجة رقم 5 راه تاوحدة مقدرت تصبر ليه.. كلشي تطلقو ..
أمل مشات تتجري للبيت وبقات تتبكي وتغوت حيت عاد تأكدت باللي باعت راسها على ود الفلوس باش تلقى السعادة ولكن تتسناها أيام وأيام من التعاسة .. خاصها غير توجد راسها..
الغد ليه ناضت متتهضرش مع راجلها وهو بطبيعة الحال ماعاقل على والو .. ومللي تنفخات عليه مقدرش يتقبلها ..
خالد: مالكي شنو؟؟؟
أمل: ماماليش ..
خالد: هييي شنو عندك انا راه ممساليش للهبال ديالك الى كاينة شي حاجة قوليها بلا متبقاي تلعبي معايا انا معنديش مع هاد التبرهيش..
أمل تعصبات ومحساتش براسها تقالتلو..
أمل: ندمت على النهار اللي عرفتك فيه يا السكيري الزايغ.. كنتي مزوج 4 وكادب عليا..
خالد: نتزوج تا 10 نتي مالك!!! أنا تنشري اي وحدة عجباتني بفلوسي..
أمل: حرام عليك دير في هاكة .. واش أنا سلعة تشريني؟!
خالد: أي امرا بالنسبة لي سلعة على نتي ماشي تنبانليك بنكة؟؟ على باغا الفلوس والمكانة الاجتماعية والتبرعات فابور مالك باك كان تيخدم فيهم..؟؟
أمل: صافي صافي بلا متزيد تكمل.. خليت ليك هاد الزمر كامل وغادة فحالي..
خالد: الما والشطابة تالقاع البحر..اوا صافي .. سيري منك عدد..
أمل: اللي شافك النهار الاول يقول غير واحد بنادم مثقف ومحترم الساعة انت 0
خالد: ورقتك غتوصلك ..
أمل جمعات حوايجها اللي باقي مفرحت بيهم وشدات طاكسي..ورجعات لدارهم..
واخا كل هادشي كانت مرتاحة وفرحانة حيت غتهنا من هاد خالد..
رجعات لدارهم وهي مبتاسمة ..
مليكة: اويلي وحدي!! تتي شفتك رجعتي؟!
أمل: آه أماما رجعت .. وفقت من الاحلام اللي عشت فيهم هاد 4 شهور.. وقريب غنطلق..صافي تفاهمنا؟؟
مليكة: اويلي ياديك المسخوطة شنو درتي ليه راني عارفاك..
أمل غوتات بالجهد..
أمل: صافي باراكااااااا سمعت هضرتك مرة ومغاديش نسمعها مرة خرى..خرجتي عليا .. عمرني نسمح ليك..
دخلات امل لبيتها وسدات عليها وبقات تبكي .. حيت ندمات بزاف على هادشي اللي دارت وتمنات أن الشخص اللي سعادتها معاه يسمح ليها ويكون باقي تيبغيها..
المهم من بعد شهر تطلقات أمل من داك الراجل بالتراضي وخدات حقوقها كاملة.. وتماك تاصلات بصلاح..
صلاح: ألو..
أمل: أ..أل..ألووو صلاح متقطعش أنا أمل..
صلاح بقا ساكت مقدر يقول والو..
أمل: عارفة راسي غلطت فحقك بزاااف ولكن كنت مضغوطة وربي اللي عالم بي باللي داكشي اللي درت كان نتيجة هضرة وضغط من الواليدين.. عافاك عطيني فرصة نشرح ليك .. نشوفك من هنا لساعة فالقهوة ديالنا..طوط..طوط..
لبسات أمل وخرجات باش تلاقى بصلاح وهي كلها أمل تلقاه كيتسناها..
وفعلا لقاتو حادر راسو وكيتسناها.. جلسات حداه وهي تتأمل فيه وفالنعمة اللي خلاتها تزول بكل سهولة.. وهنا تأكدت باللي السعادة ماشي فالفلوس وفالجاه وفالمكانة الاجتماعية حيت تقدري تتزوجي اغنى واحد ونتي متتبغيهش..ولكن يعاملك بحال شي سلعة رخيصة شراها بفلوسو.. غير جلسات حداه وبقات تتعاود ليه على كل ماعاشتو من قبل حتى قنعاتو وسمح ليها حيت تيبغيها وواعداتو عمرها تتخلى عليه مهما كان..وأنها غتسناه ومغتزوجش غيرو .وختمات كلامها معاه بأن السعادة أحيانا شخص وانت هو هاد الشخص اللي سعادتي معاه..
وفعلا بقاو هكاك عامين ومن بعد خدمو بجوج وتزوجو وتعاونو على الزمان .. وولدو بنت سماوها آيـــة
النهاية